• Ɲanmiɛn bɔbɔ yɛ ɔ́ wá kpɛ́ i-ɔ. “N bɔbɔ m’an sie min famiɛn’n Siɔn oka m’ɔ ti min liɛ klonglo’n su.”—Jue Mun 2:6, 8.

• Ɔ́ fín Famiɛn Davidi i osu’n nun. “B’a wu ba kun b’a man e, b’a wu ba yasua kun b’a man e. […] Davidi i famiɛn bia’n su’n, ɔ nin i famiɛn diwlɛ’n nun’n, i sielɛ’n ɔ́ trɛ́ kɔ́ i ɲrun titi, yɛ fɔundi’n su wieman le. I sielɛ’n táka kpa.”—Ezai 9:6, 7.

• Bé wá wú i Bɛtleɛmun lɔ. ‘Bɛtleɛmun […] ɔ nun yɛ min sran ng’ɔ́ síe’n ɔ́ fín-ɔn. […] Sran sɔ’n i afinliɛ’n fin lalafuɛ nun, ɔ fin laa blɛ’n nun. I ɲrun m’ɔ le i’n ɔ́ wá jú asiɛ’n i tiwa lɔ.’—Mise 5:2, 4.

• Sran’m bé yí i blo, yɛ bé kún i. “Be yoli i finfin yɛ y’a bumɛn i like fi. […] E sa tɛ’n ti’n be fitifitili i, e fɔnlɛ’m be ti’n be kpɔtɔli i.”—Ezai 53:3, 5.

• Ɲanmiɛn wá cɛ́n i, yɛ ɔ́ yó maan ɔ́ ɲán ɲrun. “A su yaciman min Ndia’n nun lɔ. A su kplinman su kɛ ɔ sufuɛ kpan ɔ wun kunmann.[…] Aklunjɔɛ o ɔ sa fama su tititi.”—Jue Mun 16:10, 11.

Kɛ ɔ fɛ i laa lele andɛ’n, sran kunngba cɛ yɛ ɔ kleli kɛ ɔ kwla sie klɔ sran’m be kpa-ɔ. Sran sɔ’n yɛle Zezi Klisi. Afin kɛ anzi kun ko toli Mari m’ɔ ti Zezi i nin’n, ɔ seli i kɛ: “Ɲanmiɛn Zoova wá fɛ́ i si Davidi i famiɛn bia’n mɛ́n i. [...] Kpɛkun i Famiɛn dilɛ’n su wieman le.”—Liki 1:31-33.

I nun mɔ Zezi o asiɛ’n su wa’n, w’a diman famiɛn. Kɛ ɔ ɔli ɲanmiɛn su’n yɛ Ɲanmiɛn sieli i famiɛn-ɔn. Ɔ ka kan’n, ɔ́ wá síe sran nga be o asiɛ’n su’n. ?Sanngɛ ngue ti yɛ e se kɛ Zezi Klisi yɛ ɔ kwla sie sran’m be kpa-ɔ? E se sɔ afin kɛ Zezi bali asiɛ’n su wa’n, ɔ yoli ninnge wie mun. Maan e kan be nun wie’m be ndɛ.

•   Zezi niannin sran’m be lika. Zezi ukali sran wafawafa kwlaa. I yasua-o, i bla-o, i bakan-o, i kpɛnngbɛn-o, i yalɛfuɛ-o, i sikafuɛ-o, ɔ ukali be kwlaa. (Matie 9:36; Marki 10:16) Cɛn kun’n, kokowefuɛ kun srɛli i seli kɛ: “Sɛ ɔ ti ɔ klun su’n, a kwla yo min juejue.” Kɛ ɔ tili i sɔ’n, bian’n yoli i annvɔ dan naan w’a yo i juejue.—Marki 1:40-42.

• Zezi kleli e like nga e kwla yo naan Ɲanmiɛn i klun w’a jɔ e wun’n. Ɔ seli kɛ: “Amun kwlá yoman Ɲanmiɛn i kanga naan amun kunngba’n amun a yo Aɲanbeun’n i kanga.” Asa’n, ɔ seli kɛ like kwlaa nga e klo kɛ sran’m be yo be man e’n, ɔ fata kɛ e kusu e yo e man be wie. Asa ekun’n, ɔ kleli kɛ nán like nga e yo’n i ngunmin su yɛ Ɲanmiɛn fɛ i ɲin sie-ɔ. Sanngɛ akunndan nga e bu’n, ɔ nin wafa nga e wun fa yo e’n, Ɲanmiɛn fɛ i ɲin sie su wie. Ɔ maan sɛ e waan Ɲanmiɛn klun jɔ e wun’n, ɔ fata kɛ e bu akunndan kpa. (Matie 5:28; 6:24; 7:12) Zezi seli ekun kɛ sɛ e waan é dí aklunjuɛ kpafuɛ’n, ɔ fata kɛ e si like nga Ɲanmiɛn kunndɛ kɛ e yo’n, kpɛkun e nian su e nanti.—Liki 11:28.

• Zezi yili klolɛ’n i nglo sran’m be lika. Ndɛ nga Zezi kannin’n wluwluli sran’m be wun dan, yɛ i wun yoli sran’m be fɛ. ‘Wafa ng’ɔ kle like’n, ɔ boli sran kpanngban be nuan. Afin wafa ng’ɔ kleli be like’n, ɔ kle kɛ ɔ le kwlalɛ.’ (Matie 7:28, 29) Ɔ seli sran’m be kɛ be ‘klo be kpɔfuɛ mun titi.’ Yɛ be nga be boboli i waka’n su bɔbɔ’n, ɔ srɛli Ɲanmiɛn mannin be. Ɔ seli kɛ: “Min Si, yaci cɛ be, afin be siman like nga be su yo’n.”—Matie 5:44; Liki 23:34.

Nanwlɛ, Zezi yɛ ɔ kwla sie sran’m be kpa-ɔ. Afin i liɛ’n, ɔ yili i nglo kɛ ɔ klo sran sakpa. ?Sanngɛ blɛ benin nun yɛ ɔ boli famiɛn dilɛ bo-ɔ?