Kɛ be yo sran kun i tɛtɛ yɛ be bu i lufle’n Zezi wun wafa nga sran sɔ’n i wun yo i’n i wlɛ. Afin be tɔnnin i suɛn, be boli i tɛtɛ kpa. Asa’n, kɛ bé dí i jɔlɛ’n b’a nianman mmla’n su. Be buli ndɛ’n be yili i su. Yɛ be kleli i ɲrɛnnɛn lele ɔ wuli. Kannzɛ bɔbɔ w’a yoman sa tɛ’n, sanngɛ i klunklo su ɔ ‘fɛli i nguan’n mannin fa kpɔli sran kpanngban be ti.’ (Matie 20:28; Zan 15:13) Kɛ é sé yɛ’n, ɔ ti Ɲanmiɛn Sielɛ’n i su Famiɛn, yɛ ɔ cɛ kan’n, ɔ́ yó maan bé yó sa nuan su sɛsɛsɛ asiɛ wunmuan’n su. Yɛ sran fi su yomɛn i wiengu tɛ kun.—Ezai 42:3.

 Kɛ Zezi ko yo i sɔ liɛn’n ko wie’n, wafa nga lika’n wá yó’n, Biblu’n kɛnnin i ndɛ. Ɔ seli kɛ:

•   Á wá nían kan be o lɛ’n, yɛ á wá wún kɛ be nunman lɛ kun. Sanngɛ asiɛ’n yó wɛtɛɛfuɛ’m be liɛ, yɛ fɔundi dan mɔ bé dí’n ti’n, be klun jɔ́ kpa fɔuun.”—Jue Mun 37:10, 11.

 Zezi yoli ninnge kpanngban mannin e. Yɛ ɔ su wa yo ninnge kpanngban ekun. ?Ɔ maan wafa sɛ yɛ e kwla kle kɛ e si ye-ɔ? Liki 22:19 nun’n Zezi seli i sɔnnzɔnfuɛ’m be kɛ maan be wla kpɛn i wie’n su. I sɔ’n ti’n, afuɛ kwlakwla’n, kɛ i blɛ’n ju’n, Zoova i Lalofuɛ’m be yo aɲia be kle kɛ be wla kpɛn Zezi i wie’n su. Afuɛ 2024 nga nun’n, Marsi i le 24 m’ɔ ti Mɔnnɛn cɛn’n i nun yɛ é yó aɲia sɔ’n niɔn. É yía wɔ aɲia sɔ’n i bo.

Kunndɛ E Wla Kpɛnlɛ Aɲia’n i yowlɛ’n.