Nga Zan klɛli’n 15:1-27
15 “Min yɛ n ti viɲin waka kpafuɛ’n niɔn. Yɛ min Si yɛ ɔ tali viɲin waka sɔ’n niɔn.
2 Min sama kwlaa ng’ɔ suman mma’n, ɔ kpɛ yi i blo. Yɛ min sama kwlaa ng’ɔ su mma’n, ɔ kpɛkpɛ su naan ɔ su mma kpanngban.+
3 Amun liɛ’n, ndɛ nga n kan kleli amun’n ti’n, amun a dun mmua b’a yo sanwun.+
4 Maan amun nin min tran titi, i liɛ’n n kusu min nin amun é trán titi. Viɲin sama’n i ngunmin kwlá suman mma. Sɛ ɔ o viɲin waka’n su’n yɛ ɔ kwla su mma-ɔ. I kunngba’n, sɛ amun nin min b’a tranman’n, amun kwlá suman mma.+
5 Min yɛ n ti viɲin waka’n niɔn. Amun yɛ amun ti viɲin waka’n i sama mun-ɔn. Sran kwlaa ng’ɔ nin min o nun titi’n, mɔ n kusu e nin i o nun’n, sran sɔ’n su mma kpanngban.+ Sɛ amun nin min nunman nun’n, amun kwlá yoman like fi mlɔnmlɔn.
6 Sran kwlaa ng’ɔ nin min nunman nun titi’n, ɔ́ yó kɛ waka sama mɔ be to yi i blo m’ɔ wu kee’n sa. Kɛ ɔ yo sɔ’n, sran’m be isa waka sama sɔ mun, kpɛkun be gua be sin nun, yɛ be yra kɔlikɔli.
7 Sɛ amun nin min o nun titi naan amun fa ndɛ nga n kan’n su’n, amun kwla srɛ like kwlaa nga amun klo’n, yɛ bé fá mán amun.+
8 Sɛ amun su mma kpanngban titi naan amun kle kɛ amun ti min sɔnnzɔnfuɛ’n, i sɔ’n nun yɛ min Si’n ɲán ɲrun-ɔn.+
9 Wafa nga Siɛ’n kloli min’n,+ i wafa kunngba’n yɛ n fa kloli amun-ɔn. Maan amun yo maan n klo amun titi.
10 Sɛ amun fa min mmla’m be su’n, ń kló amun titi, kɛ nga n kusu n fa Siɛ’n i mmla’m be su m’ɔ klo min titi’n sa.
11 “N kannin ndɛ sɔ mun n kleli amun naan amun klun jɔ kɛ nga min klun fa jɔ’n sa, naan amun klun jɔ kpa.+
12 Mmla nga ń fá mán amun’n yɛ: Amun klo amun wiengu kɛ nga n fa kloli amun’n sa.+
13 Sran nga i janvuɛ’m be klolɛ’n ti’n ɔ fɛ i wun man’n, i sɔfuɛ’n i sran klolɛ’n i dan tra sran kwlaa liɛ’n.+
14 Sɛ amun yo ninnge nga n se amun kɛ amun yo’n nn amun ti min janvuɛ.+
15 N flɛman amun kanga kun. Afin kanga’n siman like nga i min’n yo’n. Sanngɛ n flɛ amun kɛ min janvuɛ. Afin ndɛ kwlaa nga min Si kan kleli min’n, n boli su n kleli amun.
16 Nán amun yɛ amun fali min-ɔn, sanngɛ min yɛ n fali amun-ɔn. Yɛ n fali amun naan amun su mma titi, naan mma nga amun su’n, ɔ ka lɛ tititi. I liɛ’n, like kwlaa nga amun srɛ Siɛ’n min dunman nun’n, ɔ́ fá mán amun.+
17 “Amun yo ninnge nga n se amun kɛ amun yo’n. I liɛ’n, amún kló amun wiengu.+
18 Sɛ mɛn’n nunfuɛ’m be kpɔ amun’n, amun si kɛ kwlaa naan b’a kpɔ amun’n, be dun mmua kpɔli min.+
19 Sɛ ɔ ti kɛ amun ti mɛn’n nunfuɛ’n, nn mɛn’n nunfuɛ’m be kloli amun, afin amun ti be liɛ. Kɛ mɔ n fali amun mɛn’n nunfuɛ’m be afiɛn’n mɔ amun timan mɛn’n nunfuɛ kun’n+ ti’n, mɛn’n nunfuɛ’m be kpɔ amun.+
20 Maan amun fa ndɛ nga sie amun klun: Kanga’n i kpa trɛmɛn i min. Sɛ be kleli min yalɛ’n, bé klé amun yalɛ wie.+ Sɛ be fali min ndɛ’n su’n, bé fá amun liɛ’n su wie.
21 Sanngɛ min ti’n, bé fá ninnge sɔ’m bé yó amun, afin be siman Sran ng’ɔ sunmannin min’n.+
22 Sɛ ɔ ti kɛ m’an baman yɛ m’an kanman ndɛ m’an kleman be’n, nn be su buman be sa tɛ yofuɛ.+ Sanngɛ siɛn’n, be kwlá seman kɛ b’a yoman sa tɛ.+
23 Sran ng’ɔ kpɔ min’n, ɔ kpɔ min Si wie.+
24 Sɛ ɔ ti kɛ m’an yoman ninnge nga sran fi nin-a yoman be le’n be afiɛn’n, nn be su buman be sa tɛ yofuɛ.+ Sanngɛ be wunnin min nin min Si, yɛ be kpɔli e.
25 Sanngɛ ɔ yoli sɔ naan ndɛ nga be klɛli i be Mmla’n nun’n, ɔ kpɛn su. Be klɛli i kɛ: ‘Be kpɔli min sa ngbɛn.’+
26 Ń má súnman ukafuɛ’n mɔ yɛle Ɲanmiɛn wawɛ’n, m’ɔ yi ndɛ nanwlɛ’n i nglo’n.+ Sɛ ɔ fin Ɲanmiɛn wun lɔ ba’n, ɔ́ dí min ti lalo.+
27 Amun kusu, ɔ fata kɛ amun di min ti lalo,+ afin kɛ ɔ fɛ i i bo bolɛ nun’n, amun nin min o nun.
