Na parjolo, taingot ma: Diparrohahon Debata do hasusaan na masa saonari, jala paluaonNa do nasida sian hasusaan i. (Psalmen 72:13, 14) Marjanji do Debata songon na disurat di Bibel, ”Hasonangan tu hamu, angka na pinaporsukporsuk.” Andigan masa on? ”Di na tarida Tuhan Jesus tuat sian banua ginjang rap dohot angka surusuruan ni hagogoonna . . . Ibana mandabu uhum tu angka na so mananda Debata dohot tu angka na so mangoloi barita na uli ni Tuhanta Jesus.” (2 Tessalonik 1:7, 8) Masa ma on di ari na naeng ro, i ma porang ”di ari na bolon i, ari ni Debata” na digoari Armagedon.—Pangungkapon 16:14, 16.

Di porang na naeng ro, Debata manuru anakNa Jesus Kristus dohot surusuruan marporang mangalo parjahat. Nasida ma na pasohothon sude haporsuhon sian tano on.—Jesaya 11:4; Pangungkapon 19:11-16.

Sahat tu saonari, ndang muba roha ni Debata mangida porang. Marhite porang do pasohotonNa sude haporsuhon dohot hajahaton. Alai, ingkon Debata sandiri do na manontuhon andigan jala ise na parsidohot marporang. Nunga taboto andigan Debata mangaripashon parjahat jala Jesus ma na laho mangulahon i. On patuduhon molo porang na masa saonari, ndang disuru jala ndang dihalomohon Debata.

Tudosanna, songon dua halak baoa na marhahamaranggi marbadai tingki amana ndang di jabu. Dung i, ditelepon nasida ma huhut mangalualu tu amana jala masipabalibalian ma nasida asa diampini. Alai disuru do nasida paimahon amana mulak tu jabu. Hape, marbadai ma nasida muse. Ala ndang dioloi amana i, sogo ma rohana jala rap diuhum ma nasida.

Saonari, jotjot do angka bangso mangido pangurupion tu Debata tingki marporang. Alai, ndang adong bangso na diurupi Debata tingki marporang. Tangkas do didok Debata di Bibel, ”Unang baloshon hamu na jat alo ni na jat.” Jala didok do muse, “Di Ahu do pamaloson, Ahu pe mamaloshon.” (Rom 12:17, 19) Alai, didok Debata do tu naposoNa asa marpaima nasida tu Amagedon, i ma porang na binahenNa. (Psalmen 37:7) Ala ndang olo angka bangso marpaima tu tingki naung ditontuhon ni Debata gabe marporang ma nasida. Alai, ndang dihalomohon Debata parporangan i. Di Armagedon, marrimas situtu ma Debata jala ripashononNa ma sude bangso na marporang dohot ”hamusuon ro di ujung ni tano on”. (Psalmen 46:9; Jesaya 34:2) Tutu ma, di Armagedon ma pasohoton ni Debata sude porang.

Ndang masa be porang di Harajaon ni Debata. Jesus mandok di tangiangna, ”Sai ro ma harajaonmu! Sai saut ma lomo ni roham di banua tonga on songon na di banua ginjang!” (Mateus 6:10) Asing ni porang, Harajaon ni Debata pe manalpuhon hajahaton. * (Psalmen 37:9, 10, 14, 15) Alani i, mangkirim do angka naposo ni Debata tu HarajaonNa.—2 Petrus 3:13.

Sadia lelengna i do hita paimahon Harajaon ni Debata manalpuhon hasusaan dohot hajahaton? Angka surirang naung digohi patuduhon molo hita nunga mangolu di ”angka tingki parpudi” ni portibi on. (2 Timoteus 3:1-5) * Satongkinnari, Harajaon ni Debata paujungkon tingki parpudi marhite porang Armagedon.

Songon najolo, ripashononNa do halak na so ”mangoloi barita na uli ni Tuhanta Jesus”. (2 Tessalonik 1:8) Alai ingot ma, ndang lomo roha ni Debata mangida hamatean ni sasahalak, nang pe ibana mangulahon na jahat. (Hesekiel 33:11) Ala ”dipangido rohana, naeng unang ma nian mago agia ise” di tingki ro Armagedon. Alani i ma, andorang so ro ari i ”baritahononhon do barita na uli on na taringot tu Harajaon i di liat portibi on, laho mangkatindangkonsa tu saluhutna bangso”. (2 Petrus 3:8, 9; Mateus 24:14; 1 Timoteus 2:3, 4) Sitindangi Ni Jahowa marbarita na uli di liat portibi on laho mangurupi torop halak mananda jala mangihuthon Debata, asa boi nasida mangolu di portibi na so adong be porang.