Na mambahen Saksi Jahowa dang dohot marporang, i ma:

1.   Mangoloi Debata. Dipaboa do di Bibel molo naposo ni Debata mambahen “podangnasida gabe mata ni hudali” jala “ndang guruhononnasida be marporang”.—Jesaya 2:4, Bibel siganup ari.

2.   Mangoloi Jesus. Hea do didok Jesus tu apostel Petrus songon on, “Pasarung podangmi, ai na manintak podang, mago ma bahenon ni podang!” (Mateus 26:52) Marhite hata on, Jesus pasingotton akka siihutton ibana asa unang marporang.

    Songon na nidok ni Jesus, “ndang na sian portibi on nasida”. Alani i, dioloi nasida do paretta ni Jesus asa unang parsidohot tu politik. (Johannes 17:16) Dang dialo nasida akka tentara jala dang diorai nasida halak na lao gabe tentara.

3.   Makkaholongi dongan. Diparettahon Jesus do siihutton ibana asa “masihaholongan”. (Johannes 13:34, 35) Ala marsada do nasida di liat portibi on, dang olo nasida mamorangi dongan sahaporseaon nasida.—1 Johannes 3:10-12.

4.   Sitiruon sian halak Kristen di abad na parjolo. Encyclopedia of Religion and War mandok, “Akka siihutton Jesus di abad na parjolo, dang olo marporang jala dang parsidohot gabe tentara,” ala diboto nasida do “ulaon on dang hombar tu holong na niajarhon ni Jesus dohot tu parettana lao makkaholongi musu.” Sahalak teolog sian Jerman, na margoar Peter Meinhold mandok taringot siihutton Jesus di abad na parjolo, “Dang tama halak Kristen gabe tentara.”

 Makkorhon do ulaon ni Saksi Jahowa tu masyarakat. Jala dang olo hami mangalo akka pamaretta. Diargai hami do nasida songon na nidok ni Bibel:

•   “Unduk ma ganup di panggomgomi na marsahala.”—Rom 13:1.

•   “Lehon hamu ma tu Kesar, na sian Kesar; jala lehon hamu ma tu Debata, na sian Debata!”—Mateus 22:21.

 Alani i, dioloi hami do akka aturan na dibahen, digarar hami do pajak, jala las do rohanami mangoloi pamaretta na mambahen lam denggan parngoluan ni masyarakat.