Somalna molo naeng marsitandaan hita tu sasahalak, tontu tasungkun do, “Ise do goarmu?” Jadi molo tasungkun goar ni Debata, aha do didok Ibana?

“Ahu do Jahowa, i ma goarhu!”​—Jesaya 42:8.

Ringkot do goar i di Debata. Debata sandiri do na mambahen goarna i. Didok Ibana, “I do goarhu ro di salelenglelengna jala goar parningotan di Ahu marsundutsundut.” (2 Musa 3:15) Di Bibel, umgodang do goar ni Debata disurat sian angka gelarna, songon Natumimbul, Ama, Tuhan manang Debata. Jala umgodang do disurat goarna i sian goar ni halak na asing, songon si Abraham, si Musa, si Daud, manang Jesus. Jala na rumingkot, lomo do roha ni Jahowa asa diboto halak goarna i. Didok do di Bibel, “Asa ditanda nasida sasada Ho do na margoar Jahowa, Natumimbul gumomgom liat portibi on.”​—Psalmen 83:19.

Ringkot do goar i di Jesus. Di Tangiang Hatopan, diajarhon Jesus do tu angka siseanna asa manangiangkon goar ni Debata. Didok do, “Sai dipabadia ma goarmu!” (Mateus 6:9) Jala martangiang do Jesus tu Debata, “Ale Amang, pasangap ma goarmi.” (Johannes 12:28) Rumingkot do di ngolu ni Jesus laho pabadiahon goar ni Debata. Alani i, didok ibana do di tangiangna, “Nunga hupaboa goarmu tu nasida jala tongtong dope paboaonku i.”​—Johannes 17:26.

Ringkot do goar i di halak na mananda Debata. Angka naposo ni Debata najolo mamboto ingkon mangasahon goar ni Debata do nasida asa malua jala dilinggomi. “Partanobatoan na togu do Goar ni Jahowa, marhaporusan tusi do partigor i, gabe timbul do.” (Poda 18:10) Jala didok do muse,  “Nasa na manjou goar ni Jahowa, malua do.” (Joel 3:5) Di Bibel dipaboa, goar ni Debata do na mambahen angka naposona imbar sian na asing. “Ai saluhut angka bangso mardalani marhitehite goar ni debatana be, alai anggo hita mardalan marhitehite goar ni Jahowa Debatanta ro di saleleng ni lelengna.”​—Mika 4:5; Ulaon ni Apostel 15:14.

Goarna patuduhon Debata na songon dia Ibana. Godang angka pakar mandok, lapatan ni goar ni Jahowa i ma, “Ibana Mambahen Ibana Pasauthon”. Dipaboa Debata Jahowa do lapatan ni goarna i tingki mangkatai tu si Musa. Ninna Ibana do, “Ahu nuaeng Ahu sogot.” (2 Musa 3:14) Molo diterjemahon ayat i sian bahasa Heber aslina, lapatanna gabe “Ahu Boi Gabe Manang Aha pe na Huhalomohon”. Sian goar ni Debata, taboto ma Ibana do na manompa sasude. Alai asing ni i, sian goarna i pe taboto ma molo Ibana boi mambahen dirina dohot angka tompaanna gabe manang aha pe laho pasauthon sangkapna. Molo sian gelar ni Debata, taboto ma sadia balga gogo dohot huasona. Alai molo sian goar ni Jahowa, taboto ma Debata na songon dia Ibana jala aha na boi bahenonna.

Goarna patuduhon na parduli do Debata tu jolma. Sian lapatan ni goarna i, taboto ma na parduli do Debata tu sude tompaanna. Dipaboa Debata do ise goarna, ala lomo rohana asa tatanda Ibana. Asing ni i, nunga dipaboa Ibana goarna i nang pe ndang tasungkun taringot i. Jadi sian on taboto, lomo do roha ni Debata asa solhot hita tu Ibana dos songon na marale-ale.​—Psalmen 73:28.

Molo tapangke goar ni Debata, on patuduhon lomo rohanta solhot tu Ibana. Umpamana, tontu lomo do rohamu molo donganmu manjou hamu mamangke goarmuna. Alai boha ma molo ndang olo ibana mamangke goarmu? Ra olo do didok rohamu ndang olo ibana solhot tu hamu. Tu Debata pe songon i do. Nunga dipaboa Jahowa ise goarna, jala dijujui do hita asa mamangke i. Jadi molo tapangke goarna i, on patuduhon na lomo do rohanta asa solhot tu Ibana. Alana sai diparrohahon Debata do “angka na pasangap goarna”.​—Maleaki 3:16.

Mansai ringkot do mamboto goar ni Debata, asa boi mananda Ibana. Alai ndang sae holan i. Porlu do taboto songon dia parangena.