Debata na sintong i ma Sitompa saluhutna. Ndang marmula jala ndang marujung Ibana. (Psalmen 90:2) Ibana do haroroan ni barita na uli na adong di Bibel. (1 Timoteus 1:11) Ala Debata do silehon ngolu tu hita, Ibana do na tama sombaonta.​—Jaha Pangungkapon 4:11.

Ndang adong na hea marnida Debata ala Tondi do Ibana, lapatanna tumimbo do hadirion ni Debata sian nasa na mangolu di tano on. (Johannes 1:18; 4:24) Alai, boi do taboto parange ni Debata sian angka na tinompaNa. Umpamana, marragam parbue ni hau dohot bunga boi patuduhon molo Debata i parholong dohot marbisuk. Bidang ni hasiangan on patuduhon huasoNa.​—Jaha Rom 1:20.

Molo tajaha Bibel, boi do lam godang taboto parange ni Debata. Umpamana, dipaboa Bibel do tu hita aha na dihalomohon jala aha na so dihalomohon ni Debata, songon dia pambahenanNa tu jolma, songon dia Ibana mangatasi angka na masa.​—Jaha Psalmen 103:7-10.

Tung pe godang panjouon tu Debata, holan sada do goarNa. Dipaboa Ibana do tu hita ise goarNa, tingki didok ”Ahu do Jahowa, i ma goarhu!” (Jesaya 42:8) Marasingasing do laho manjouhon goarNa hombar tu angka hatana be. Dihata Batak Toba dijou ma goar i ”Jahowa”. Alai, adong do na manjou ”Yahweh”.​—Jaha Psalmen 83:19.

Nunga disesa goar ni Debata sian godangan Bibel diganti gabe panjouon songon Tuhan manang Debata. Alai, mulana disurat Bibel, dibahen do goarNa hirahira 7.000 hali godangna. Tingki diajarhon taringot Debata, dipaboa Jesus do tu halak goarNa.​—Jaha Johannes 17:26.

Tonton ma video Adong do Goar ni Debata?

Patuduhon na so holong do Jahowa tu hita molo godang parungkilon? Pigapiga halak mandokhon molo parungkilon na tahilala on i ma pangunjunan sian Debata. Alai, ndang toho i.​—Jaha Jakobus 1:13.

Sangap do manisia dibahen Debata dipaloas do nasida mamillit sipilliton. Taargai do pambahenan ni Debata on? (Josua 24:15) Alai godang do na mamillit mambahen hajahaton tu donganna. I ma alana boasa godang hasusaan. Lungun do roha ni Debata marnida hageduhon sisongon i.​—Jaha 1 Musa 6:5, 6.

Jahowa i ma Debata na manghaholongi hita. Dihalomohon Ibana do asa hita mandapot hangoluan na sonang. Ndang sadia leleng nai, laho apusanNa ma sude na mambahen hita marsitaonon. Alai, adong do alana boasa dipasombu dope sitaonon on di tingki na satongkin on. Di Parsiajaran 8, taboto ma alusna.​—Jaha 2 Petrus 2:9; 3:7, 13.

Dijou Jahowa do hita asa manjonok laho manghatai tu Ibana marhite tangiang. Ai disarihon Ibana do hita marsadasada. (Psalmen 65:3; 145:18) Rade do Ibana manesa dosanta. Diargai do usaha na tabahen laho pasonanghon Ibana, nang pe sipata gale hita. Alani i, nang pe ndang tipak hita boi do hita pajonokhon diri tu Debata.​—Jaha Psalmen 103:12-14; Jakobus 4:8.

Ala na dilehon Jahowa do hangoluan tu hita, ingkon umbalga ma nian holongta tu Ibana sian tu na asing. (Markus 12:30) Patudu ma holongta tu Debata marhite marsiajar taringot tu Debata jala mangulahon na pinangidoNa.​—Jaha 1 Timoteus 2:4; 1 Johannes 5:3.