Barita na uli marharoroan sian Jahowa, Debata na martua. Giot do rohaNa asa martua saluhut parsaripeon. (1 Timoteus 1:11) Ibana do na paulihon parrumatanggaon. Parrumatanggaon na pate porlu asa martua parsaripeon jala boi pabalgahon dakdanak di inganan na denggan. Jala ingkon oloan ni halak Karisten do uhum na pasurathon parrumatanggaonna.​—Jaha Lukas 2:1, 4, 5.

Songon dia do Debata marnida parrumatanggaon? Didok rohaNa nian parrumatanggaon i ma pardomuan ni baoa dohot na niolina hot salelengna. Dipangido Jahowa do asa unang manimbil sian dongan saripena. (Heber 13:4) Dihasogohon rohaNa do parsirangan. (Maleakhi 2:16) Alai, dipaloas pe marsirang laho mangoli muse molo adong do sian nasida na mangalangkup.​—Jaha Mateus 19:3-6, 9.

Ditompa Debata baoa dohot borua asa marsiurupan. (1 Musa 2:18) Baoa do manguluhon parsaripeon, ala ni i, ingkon sarihononna pardijabuna dohot ianakhonna jala mangajari nasida taringot tu Debata. Ingkon dipatuduhon do holong na sian roha tu pardijabuna. Baoa dohot na niolina ingkon marsihaholongan jala marsipasangapan. Ala na so adong tungganidoli manang tungganiboru na tipak, ingkon rap marsielekelehan jala marpamuati. I do ruhut ni parsaripeon na martua.​—Jaha Epesus 4:31, 32; 5:22-25, 33; 1 Petrus 3:7.

Molo tubu parbadaan di parsaripeon, baoa dohot pardijabuna ingkon marsigogo laho mambahen holong jala patuduhonsa. (1 Korint 13:4, 5) Hata ni Debata ndang manjujui parsirangan dalan asa malua sian parbadaan na somal di parsaripeon.​—Jaha 1 Korint 7:10-13.

Lomo roha ni Debata asa sonang hamu, dilehon do poda na denggan tu hamu asa sonang rohamu di haposoon muna. Dipangido rohaNa do asa oloan mu natorasmu, alana umbisuk jala umgodang do parniahapan nasida. (Kolosse 3:20) Sipanompa hita pe lomo rohaNa asa hamu marlas ni roha jala mangulahon angka na pasonanghon Ibana.​—Jaha Parjamita Sian Si Salomo 11:9–12:1; Mateus 19:13-15; 21:15, 16.

Hamu porlu girgir mangula laho paradehon sipanganon, inganan, dohot pahean tu ianakhon muna. (1 Timoteus 5:8) Asing ni i, asa las roha nasida, porlu do ajarhononmu asa di haholongi nasida Debata jala marsiajar tu Ibana. (Epesus 6:4) Tanda dohot holong na pinatuduhon muna tu Debata mansai lohot di roha nasida. Molo diajari hamu nasida sian Hata ni Debata, mangkorhon na denggan do i tu nasida.​—Jaha 5 Musa 6:4-7; Poda Sian Raja Salomo 22:6.

Apoapo dohot pujian muna hasea do i tu ianakhon muna. Dihaporluhon nasida do muse sipasingot dohot pinsangpinsang. Pangajarion sisongon i mangurupi nasida asa unang mangulahon na mambahen nasida susa. (Poda Sian Raja Salomo 22:15) Alai, unang magorsohu jala paposihu hamu laho maminsang.​—Jaha Kolosse 3:21.

Sitindangi Ni Jahowa pabinsarhon pigapiga buku na disurat laho mangurupi natuatua dohot dakdanak. Angka buku on marojahan tu Bibel.​—Jaha Psalmen 19:8, 12.