“Ibale u nsômbôl toi nyi njee a yé Djob, nigil lôñni Mbôgi Yéhôva.” Me bé nhelek i nok bibuk bi. Ha ngéda i, me bé me ma niigil Bibel ni Mbôgi Yéhôva ndik inyu ndék ngéda. Ndi inyu boñ le ni pam i nok inyuki me bé nhelek hala, nwaha me le me toñle le bé niñ yem ndék.

Me bi gwéé i tison Quezaltepeque, i Salvador. Me bé man nu nyônhe isamal ikété 15 bon. Bagwal bem ba bé boñ biliya i niiga bés i ba maliga ni i nôgôl mbén. Leonardo ki, ni Mbôgi Yéhôva ipe, i bé lo i niiga bés Bibel. Ndi me bi yan biniigana bi, me yoñ ki makidik mabe. I ngéda me bi pamna 14 nwii me ni mawanda mem ma suklu di bi bôdôl nyôba ni ôt hibañga. Ba bé nyodi i suklu yada mbus yada, inyu jôp i ntôñ mintonba. Sôk i nsôk, me bi noñ maboñok map mabe. Di bé tégbaha kel yosôna i yagal bôt moni ni i nip inyu somb hibañga.

Ntôñ mintonba u bi yila lihaa jem. Me bé hoñol le ni bo ndigi nyen me bé lama ba maliga. Kiki hihéga, mut wada mu ntôñ wés, i mbus le a bi ôt hibañga, a ke nibil mut wem libôk wada. Mu kii ba bé jo sañ, a bi bép liwanda jem, a sébél yak bisônda. Ha nyen me bi kala ni hiun, ni me me kahal ôbôs litôa jé lôñni kék inyu boñ le a nwas liwanda jem. Mut wem libôk a bi bôdôl soohe me, ndi me bi tjél i emble nye. Me bi sôk nyugut litôa jé jolisôna.

I ngéda me bééna 18 nwii, ntôñ wem u bi jo sañ ni bisônda. Mu kii me bé kôôba i leñ kindim, a bi lôôs me munu woo​—Me nyi bé lelaa hala a bi bôña. Ndi me mbigda ndigi le woo u bi lék me​—jon me bi kwo me yôm. Me bi tôdne ndigi i dokta, ha nyen ba bi yis me le me nimis woo wem u walôm, ni ôô wem u walôm, ni ki le jis jem li walôm li bé bebee le ndim.

Ndi me bi ke i boma ntôñ wem to hala kiki me bé me ngi gwéé mambabaa munu nyuu. Ndék ngéda i mbus, bisônda bi bi gwel me, bi ha me i mok. Ha ni nyen maada mem ni ntôñ wem ma bi kônde let. Di bé tégbaha kel yosôna ntôñ inyu boñ mam​—ibôdôl bikekela nu di mal je, di bé ôt Marijuana ikepam kôkôa nu di bé ke i nañal.

Ngéda me bé i mok, Leonardo a bi yuuga me. Mu kiki di bé kwel, a bi añ kun i bé me munu woo u walôm ndi a bat me le: “Baa u nyi kii biyimbne biaa bini, bi nkobla?”. Ni me me timbhe le: “Ñ, bi nkobla le, nyega malal, hibañga, rock and roll.” Ndi Leonardo a timbhe le: “Me me nhoñol le bi nkobla le dokta, mok ni nyemb. U bi nañal i dokta. Nano u yé i ndap mok. Wemede u nek bé kii y’a noñ ha.”

I yom Leonardo a bi kal me i bi tihba me ngandak; a bé pot maliga. Me bé yéñ tjiba yem memede ni ntén niñ unu me bééna. Leonardo a bi naña me i nigil Bibel ni nye, ni me me neebe. I yom me bi nigil i Bibel i bi tinde me i lona mahéñha i niñ yem. Kiki hihéga, Bibel i nkal le “bilôñ bibe bi mpuñgul maboñok malam.” (1 Korintô 15:33, buk isi lipep) Jon, jam li bisu me bé lama boñ li bé i yéñ mawanda ma mondo. I mbus, me bi kit maada ni ntôñ wem mintonba, me bôdôl ki ke i makoda Mbôgi Yéhôva i bé tégbaha i ndap mok. I likoda li Mbôgi Yéhôva nyen me bi boma Andrés nu yak nye a bé mut mok kiki me, a bi yila Mbôgi Yéhôva nyoo i ndap mok. A bi naña me i yoñ kofi ni nye. Jon, me bé ôt ha bé marijuana bikekela. Iloo ki hala, me ni Andrés di bé wan ngim nlôñ Bibel hiki kekela. Ntôn wem u mintonba u bi pala yimbe mahéñha me bé boñ. Ha ni nyen mbôgna wada mu ikété ntôñ u a bi kal me le a nyéñ pôdôs me. Me bé kon woñi. Me bé yi bé kii a bé le a boñ me ibale a nyi mahoñol mem, inyule i nyodi ntôñ mintonba kiki u, i ta bé bun. Ni nye a kal me le: “Di nyimbe le u nyoñ ha bé ngaba i makoda més, u nke ndik i makoda ma Mbôgi Yéhôva nano. Baa kii u nsômbôl boñ?” Me kal nye le me gwé ngôñ i kena yigil yem Bibel ni bisu, ni i héñha niñ yem. Me bi hel i nok nye a nkal le ibale me ñunda toi le me gwé ngôñ i yila Mbôgi Yéhôva, ntôñ wés u ga ke ni bisu i ti me lipém.Jon a kal me le: “Ibale u nsômbôl toi nyi njee a yé Djob, adba lôñni Mbôgi Yéhôva. Di mbot ñem le u ga waa boñ mam mabe. Me nti we bibégés inyule u yé i loñge njel. Mbôgi Yéhôva i nla hôla toi we. Me bi nigil ni bo i loñ Amérika, bôt bem ba lihaa bahogi ba yé Mbôgi Yéhôva. U kon bañ woñi. Kee ni bisu.” Tolakii me bé kon woñi, me bé nyonok ni maséé. Me bi ti Yéhôva mayéga ni ñem wem wonsôna. I bé pôôna wee me bi pam i mok. Ha ni nyen me bi pam i nok bibañga bi Yésu bini le: “N’a yi maliga, ndi maliga m’a kobol bé.”​​—Yôhanes 8:​32.

Ngim minlômbi nwem mi mawanda, mi béhna bo di bé ntôñ, ba bi noode me ni hibañga. I pot maliga, ngim mangéda me bé me baage. Ndi ndék ni ndék, ni ngandak masoohe, me bi pam i yémbél nya bom i.​​—Tjémbi 51:10,11.

I mbus mapam mem ma mok, ngandak i bé hoñol le me ga ke ni bisu ni niñ me bé niñ kôba. Iloole me boñ hala, me bé ke i ndap mok inyu hôla bôt ba mok bape i nigil Bibel. Minlômbi nwem mi mawanda mi bé nkwoog nkaa le me bi héñha. Ndi ngoo le, i bet ba bé oo me ba bééna bé minlélém mi mahoñol.

Kel yada nu me bé i likalô ni mankéé wada, ha nyen kunda yada ntôñ mintonba wada u bi pémél bés, u bé yéñ i nol me. Ha nyen mankéé béhna nye di bé, a bi toñle bo ni suhulnyuu le me ta ha bé ikété ntôñ u mintonba wo ki wo. Ndi me bé boñ biliya i gwel memede. I mbus le ba bi bép me, ba béhe me le me téé ha bañ makôô mu i libôga li kekikel. I mbus, ba suhul mangaa map, ba nwas bés le di kee. Bibel i bi héñha toi me. Kôba, ki me bi noode pun memede. Ndi nano me nwas le maéba ma Bibel mon ma éga me. I kaat 1 Tésalônika 5:​15 me bi nigil le: “Yoña yihe le mut nye ki nye a timbhe bañ béba inyu béba, ndi kena ni bisu i bôñlana bé ni bé mam ma yé loñge ngéda yosôna, ni boñok yak hala inyu bôt bobasôna.”

Ibôdôl nu me bi yila Mbôgi Yéhôva, me mboñ biliya i ba maliga. Hala a bé bé jam li ntomb, ndi ni mahôla ma Yéhôva Djob, matiñ ma Bibel, ni mahôla ma mawanda mem ma mondo, me bi pamba. Me gwé ha bé ki ngôñ i témb i boñ mam me bé boñ kôba.​​—2 Pétrô 2:​22.

Me bé mut a ñunup ngandak, me bak ki mut njôô. Me yé nkwoog nkaa le ibale me nke ni bisu i niñ i béba niñ i, ki me yé nwok len. Mam me bi nigil ikété Bibel ma bi héñha niñ yem. Me bi tjôô bilem gwem bibe. Me bi nigil i gwés baoo bem. (Lukas 6:​27) Nano me gwé mawanda ma ma nhôla me i hôlôs pék. (Bingéngén 13:​20) Niñ yem i gwé ngim njômbi; me yé ki maséé, inyule me ngwélél Djob nu a yé bebee i nwéhél bibéba gwem.​​—Yésaya 1:​18.

I nwii 2006, me bi ke i suklu i baañal ñañ nlam ba ba ta bé i mbiibaga. Ndék nwii i mbus, me bi biiba ni loñge sita, nu béhna nye di bi néñés ngond yés. I len ini me ntégbaha ngandak ngéda i niiga bôt bape matiñ ma Bibel ma ma bi hôla me. Me yé mañ i likoda jem, me noode hôla boñge ba wanda i keñgle minlélém mi mahôha me bi boñ i ngéda me bééna nwii nwap. Iloole me tém soñ yem memede, me tek hikuu hi niñ i boga i Djob a mbôn i Bibel.