Kiki di yé Mbôgi Yéhôva, di mboñ biliya i lédés mahaa més, ni ma bôt bés ba libôk. Di nti Djob lipém kiki Nhek lihaa. (Bibôdle 2:​21-​24; Efésô 3:​14, 15) Ikété Bibel, Yéhôva a niiga bés matiñ ma ma bi hôla bôt ikété nkoñ isi wonsôna i lédés mabii map ni i ba maséé ikété libii.

 Di mboñ biliya gwés gwobisôna i noñ maéba ma Bibel, inyule hala a nhôla bés i kônde yila loñge nlôm, loñge ñwaa, ni biloñge bi bagwal. (Bingéngén 31:10-​31; Efésô 5:22–​6:4; 1 Timôtéô 5:8) I pék i nlébna i Bibel, i nhôla yak mahaa het babiina ba gwé bé nlélém base i too. (1 Pétrô 3:​1, 2) Di tehe i yom babiina ba ba ta bé Mbôgi Yéhôva ba bi nôgda i ngéda sobiina wap a bi yila Mbôgi Yéhôva:

•   “Ñwii nwés mi libii mi bisu minsamal mi bé nyonok ni jomol ni hiun. Mbus le Ivet a bi yila Mbôgi Yéhôva, gwéha yé ni wongut yé, bi bi kônde keñep. I mahéñha a bi boñ, ma bi péyés libii jés.”​—Klauir, nu a yé Brézil.

•   “Me bi tjél le nlô wem, Chansa, a bôdôl yigil i Bibel ni Mbôgi Yéhôva, inyule me bé hoñol le ba ñôbôs mabii. Ibôdôl ha i ngéda i, me bi sôk tehe le Bibel i bi hôla libii jés.”​—Agnes, nu a yé Zambia.

 I nson wés likalô, di ñunda bôt bés ba libôk lelaa i ha pék i Bibel bisélél i nla hôla bo

•   I pohol sobiina wap ni pék

•   I yémbél mandutu ma ñwii bisu u libii

•   I yi niñ ni bagwal ba sobiina wés

•   I yi gwélél moni

•   I waa jomol

•   I nigil nwéhél

•   I niiga bon bap

 Maliga ma yé le, i nla ba hala ngim mangéda. Kiki hihéga, ikété yigil yada ba bi boñ i ñwii 1998, ba bi léba le inyu libii jada ikété môm ima i het sobiina wada a yé Mbôgi Yéhôva, babiina ba mbéna boma mandutu ngandak ngéda wada a nyila Mbôgi Yéhôva.

 Yésu a bôk kal le i bôt ba noñ biniigana gwé, ba ga boma mandutu ikété ndap yap lihaa. (Matéô 10:32-​36) Nyi mam wada le Will Durant a bi yimbe le i si ane i Lôk Rôma, “ba bé ôm base i bikristen nsohi le won u ñôbôs mabii,” a yak i len ini, ba ñôm Mbôgi Yéhôva ihogi nlélém nsohi. Baa hala a nkobla le i nwet a yé Mbôgi Yéhôva nyen a nsuu ngimanôgla?

 Mu kii ba bé kéés nsohi ba ñôm Mbôgi Yéhôva le i ñôbôs mabii, Ndap bikééhene bi kunde i bôt ba binam i Erôpa, i ba nsébél ni hop Pulasi le La Cour européenne des droits de l’hommen, i nkal le bijô bi lihaa bi bi ta bé Mbôgi Yéhôva bi mbéna lona mindañ ngéda ba ntjél neebe ni ti bôt bap ba lihaa lipém, ni kunde i niñ inoñnaga ni biniigana bi base yap.” Ndap bikééhene i i bi kônde ki le: “Hala a mbéna ba nlélém jam inyu mahaa momasô i het ñwaa bo nlôm ba ta bé base yada, jon yak Mbôgi Yéhôva i nles bé i jam li.” b Yak ngéda di mboma ndutu ni bôt ba ba neebe bé le mut a ba i base ipe, Mbôgi Yéhôva i noode noñ maéba ma Bibel mana le: “Ni timbhe bañ mut nye ki nye béba inyu béba. . . . Ibale i yé le i ba hala, kingéda la nan, wee yéna ni nsañ ni bôt bobasôna.”​—Rôma 12:17, 18.

 Mbôgi Yéhôva i noñ maéba ma Bibel i biiba “ndigi i Nwet,” hala wee i biiba ni mut nu a yé i nlélém base ni bo. (1 Korintô 7:​39) I oda ini i nlôl i Bibel, i nla ki bane bés nseñ i niñ yés i hiki kel. Kiki hihéga, nkwel wada ikété lipep li mañwin ni hop Ngisi le Journal of Marriage and Family i ñwii 2010 u nkal le “mabii i het basobiina ba yé base yada, ba ban-ga minlélém mi maboñog, ni biniigana gwada” ma noode bana maada malam kiyaga. c

 Ndi to hala, Mbôgi Yéhôva i ntinde bé i bôt ba yé ikété base yés i bagla ni sobiina wap nu a ta bé Mbôgi Yéhôva. Bibel i nkal le: “Ibale man tata a gwé ñwaa nu a ntop bé hémle, ndi ñwaa a gwéhék le a yén nyeni, wee a héa bañ nye. Yak muda nu a gwé nlôm nu a ntop bé hémle, ndi nlôm a gwéhék le a yén ni nye, wee muda a bos bañ nlôm.” (1 Korintô 7:​12, 13) Mbôgi Yéhôva i noñ i oda i.