U nla yila liwanda li Djob ibale u nke ni bisu i nigil i yi nye, u boñok kii yosôna u nla inyu lémél nye. Ha nyen Djob ‘a ga kôôge we bebee.’ (Yakôbô 4:8) Bibel i ntibil yis bés le “a ta bé haa ni hiki wada wés.”​—Minson mi baôma 17:27.

•  Kii u nlama boñ inyu yi Djob?

•  Ngim mahoñol i i téé bé bôt ba gwé inyu Djob

 Añ Bibel

•  Kii Bibel i nkal? “Tilna yosôna i nlôl ni Nyambe.”​—2 Timôtéô 3:16.

•  Kii hala a nkobla? Djob a yé Nwet matila Bibel. Hala a nkobla le i bet ba bi tila Bibel, ba bi tila bé mahoñol map, ndi Djob nyen a bi ha mahoñol mé mukété yap. Mu i kaat i tôbôtôbô ini le Bibel nyen Djob a nyelel mahoñol mé inyu bôt ba binam. A nyelel yak bilem gwé bilam, kiki bo gwéha yé, telepsép yé, ni kona yé ngoo.​—Manyodi 34:6; Ndiimba Mbén 32:4.

•  Kii u nla ni boñ? Añ Bibel hiki kel. (Yôsua 1:8) Yoñ ngéda i tibil wan i mam u ñañ, u badbaga le: ‘Kii i jam lini li niiga me inyu Nyambe ni bilem gwé?’​—Tjémbi 77:12, MN.

   Kiki héga, añ kaat Yérémia 29:11, ndi u badba le: ‘Mambe mahoñol Djob a gwé inyu yem, mahoñol ma nsañ, tole mahoñol ma kogse? Baa a yé Nyambe nu mapuna, tole a gwé ngôñ i ti me loñge botñem inyu dilo di nlo?’

 Béñge mam Djob a bi hek

•  Kii Bibel i nkal? To ibale mut a tehge bé bilem bi Djob, “bi nene loñge loñge ibôdôl i ngéda a bi hek nkoñ ’isi, inyule bi nene ni njel mam a bi hek.”​—Rôma 1:20.

•  Kii hala a nkobla? Le, i mam Djob a nhek, ma nyelel libak jé, ni bilem gwé bilam. Nlélém kiki loñge titii le mut binam a ñôt i nyelel ngim mam inyu mut nu, tole kei i tôbôtôbô mut a mbañ i nyelel ngim mam inyu nwet a mbañ yo. Kiki héga, i ngap yosôna boña mut binam a gwé i nyelel pék i Djob, yak hiañgaa ni tini tjôdôt dipe bi nkwés bés nkaa le Djob a gwé ngui i nloo héga, mu kiki a ñéga i tjôdôt ti tjodisôna di di mpémés ngandak ngui.​—Tjémbi 104:24; Yésaya 40:26.

•  Kii u nla ni boñ? Yoñ ngéda i béñge mam ma nkéña we, ma Djob a nhek, inyu tibil yi mo, u badba le, ‘Mu kiki i mam mana momasôna ma yé mbañak i nya i nhélhana, i nya i nlôôha lam, kii ma niiga me inyu libak li Djob?’ a Ndi maliga ma yé le i mam ma nkéña bés ma niiga bé bés mam momasôna di nlama yi inyu Nhek wés. Jon a bi ti bés Bibel.

 Gwélél jôl li Djob.

•  Kii Bibel i nkal? “M’a sôñ nye inyule a nyi jôl jem. A’ lôndôl me, m’a timbhe nye.”​—Tjémbi 91:14, 15.

•  Kii hala a nkobla? Le Nyambe, nu jôl jé li yé le Yéhôva, a nyoñ ngandak ndun ni babobasôna ba nyi jôl jé, ba gwéélak ki jo ni suhulnyuu. b (Tjémbi 83:18; Malaki 3:16). Djob a bi yeelene bés njee a yé mu kiki a bi yis bés jôl jé. A nkal le: “Men me yé Yéhôva, jôl jem li.”​—Yésaya 42:8.

•  Kii u nla ni boñ? Gwélél jôl li Yéhôva i ngéda u nkwel ni nye

 Soohe Yéhôva

•  Kii Bibel i nkal? “Yéhôva a yé bebee ni ba bobasôna ba nlôndôl nye.”​—Tjémbi 145:18.

•  Kii hala a nkobla? Yéhôva a nkôôge bebee ni ba bobasôna ba nsoohe nye ni hémle. Masoohe ma yé njel yada inyu bégés Yéhôva Djob, i i ñunda i njôôñ lipém di nti nye.

•  Kii u nla ni boñ? U bénga soohe Djob hiki ngéda. (1 Tésalônika 5:17) Kal nye mam ma ntééñga we, u yible nye ñem woñ.​—Psalm 62:8, MN. c

 Hôlôs hémle yoñ inyu Djob.

•  Kii Bibel i nkal? “Mut a nla bé lémél Nyambe ibale a gwé bé hémle.”​—Lôk Héber 11:6.

•  Kii hala a nkobla? Inyu kôôge Djob bebee, di nlama hémle nye. Inoñnaga ni Bibel, i hémle Djob i nkobla ndik bé le di hémle le a yé. Ndi di nlama ki bôdôl nye ñem ni ñem wés wonsôna, hala wee di bôdôl yak mimbônga nwé ñem, yak matiñ mé. I bôbôl i yon i yé hikuu inyu yila bañga yé liwanda.

•  Kii u nla ni boñ? Bañga hémle i nlôl i mam mut a nyi. (Rôma 10:17) Jon nigil Bibel, le wemede u tehe nseñ i bôdôl Djob ñem, ni maéba mé. Mbôgi Yéhôva y’a ba maséé i nigil Bibel lôñni we. d

 Boñ mam ma nlémél Djob.

•  Kii Bibel i nkal? “Gwéha i Nyambe ini le: Di nôgôl mambén mé.”​—1 Yôhanes 5:3.

•  Kii hala a nkobla? Le i ngeñ mut a mboñ biliya gwé gwobisôna inyu nôgôl mambén ma Djob, hala a yé yimbne le a ngwés toi Djob. Ha ni nyen yak Djob a neebe i yila liwanda jé.

•  Kii u nla ni boñ? I ngeñ u nigil Bibel, noode yimbe i mam Djob a ngwés ni ma a ngwés bé, u badbaga le: ‘Mambe mahéñha ma nla lona ikété niñ yem inyu lémél Nhek wem?’​—1 Tésalônika 4:1.

 Yimbe lelaa Djob a ntôñ toi we mu kiki u neebe maéba mé.

•  Kii Bibel i nkal? “Noodana, ni tehe le Yéhôva a yé loñge.”​—Tjémbi 34:8, MN.

•  Kii hala a nkobla? Djob a naña we le wemede u nôgda le a yé loñge. Mu kiki wemede mede u mba u nôgda le a ngwés we ni le a nit we, hala nyen w’a bana ngôñ i kôôge nye bebee.

•  Kii u nla ni boñ? Neebe maéba u ñañ ikété Bibel, u noñok mo, le ndi wemede u nôgda nseñ wap. (Yésaya 48:17, 18) Noode ki tehe lelaa bôt bape ba bi yémbél mandutu, ba lémés niñ yap ni niñ lihaa jap, ba léba bañga maséé mu kiki ba bi neebe mahôla ma Djob. e

 Ngim bôt i nhoñol le: Djob a yé mbale i sôli, kayéle di nla bé yi nye.

 Ndi maliga ma yé le: Di nla bé tibil nok ngim mam inyu yé, kii bo le Nyambe a yé mbuu le di nla bé tehe. Ndi hala a nkéñ bé bés le di yi nye. I maliga, Bibel i mbat bés le di nigil i yi nye inyu bana niñ boga (Yôhanes 17:3) Ni njel bibuk bi ntomb i nok, Bibel i ntoñle bés njee a yé Nhek wés, libak jé, matiñ mé, ni bitelbene a nyoñ inyu bôt ba binam ni inyu hisi. (Yésaya 45:18, 19; 1 Timôtéô 2:4) Kiki di mbôk di kal, Bibel i nyeelene yak bés jôl li Djob. (Tjémbi 83:18) Inyu manjom ma mon di nla yi Djob, di nla ki kôôge nye bebee.​—Yakôbô 4:8.