IBALE ba bi léba we tole mut woñ lihaa béba kon i i nla kena i nyemb, hala a nla lôôha tééñga we. U héya kon womede, u nlama ki kolba mahoñol mabe. Ndutu i léba biloñge bi matibla, ndééñga i bee, ni i ke i dokta hiki ngéda bi nla kéñbaha woñi woñ yak nduña yoñ ki. Ndutu i ñem lôñni béba kon bi ntééñgana ngandak.

Hee homa di nla kuhul mahôla? Ngandak bôt i bi kôhna bañga hogbe ni njel masoohe ni lisoñgol li minlôñ mi Bibel mi mi nhôgbaha.  Mahôla mape ma nla lôl bo i gwéha ni i nit lihaa jap ni mawanda map ba nit bo.

Robert nu a gwé 58 nwii, a nti maéba le: “I hémle u nhémle Djob i nla hôla we i hônba kon woñ, inyule a ga ti we ngui. Soohe Yéhôva. Toñle nye nduña yoñ. Bat nye le a ti we mbuu mpubi. Bat nye le a ti we ni lihaa joñ ngui ni le a hôla we i tégbaha kon u ikété lipém jolisôna.”

Robert a nkal le: “Ngéda lihaa joñ li nit we, hala a nlédhana ngandak inyule ba yé ha inyu yoñ. Ba nsébél me i nsiñga hiki kel, ndigi inyu bat me le: ‘I nke laa?’ Yak mawanda mem momasôna ma nti me makénd. Ba nti toi me ngui ni ngôñ i kônde ke ni bisu.”

Ibale wen u nke i yuuga liwanda joñ li li nkon, yimbe i yom Linda a nkal: “Ibabé pééna nkokon a gwé ngôñ i niñ kiki hiki mut, ndi a gwé bé ngôñ le kon wé won u ba ndigi ño nkwel inan. Jon ni kwélél i mam ni mbéna pôdôl.”

Ngui i Djob, hogbe i Bañga yé i nti, mahôla ma bôt bés ba lihaa ni ma mawanda més, bi nla kwés bés nkaa le niñ i ngi gwé mahee to ibale di gwé béba kon.