PES 03
Baa u nla bôdôl Bibel ñem?
Bibel i gwé ngandak mimbônga, i gwé ki ngandak maéba. Bebek u nla bana ngôñ i yi mam i niiga, ndi u nkon woñi. Baa u nla hémle mimbônga ni maéba ma ma nlôl i nlômbi kaat u? Baa u nla toi neebe le i mam Bibel i niiga ma nla lémés niñ yoñ i len ini yak i dilo di nlo? Didun di bôt di neebe hala. Di béñge le too di nla bôdôl yo ñem.
1. Baa miñañ di nléba ikété Bibel mi yé toi maliga?
Bibel yomede i nkal le i gwé “bibañga bi maliga le mut a nla bôdôl ñem.” (Ñañal 12:10) I mpôdôl mam ma bi pémél bôt ba bi niñ toi. (Añ Lukas 1:3; 3:1, 2.) Ngandak bôt ba miñañ ni bahun hisi ba bi léba le i mam Bibel i mpôdôl kiki bo nwii, bôt, bahoma ni miñañ ma yé toi maliga.
2. Inyuki di nla kal le Bibel i yé kaat i i ntagbe bé ngéda?
Bibel i mpôdôl ngim mam ma ma bé yiba bé ngéda ba bé tila yo. Kiki ’héga, i mpôdôl mam ma njoñ yi. Ngandak bôt i bé hémle bé i mam Bibel i nkal inyu njoñ yi. Ndi i len ini, bôt ba njoñ yi bomede ba nkal le Bibel i mpot maliga ngéda i mpôdôl mam ma njoñ yi. Mabéhna mé momasôna “ma yé ntiik ngéda yosôna, nano, ni i boga ni boga.”—Tjémbi 111:8.
3. Inyuki di nla hémle i mam Bibel i nkal inyu dilo di nlo?
Bibel i gwé mbañ, hala wee i nlegel “mam ma yé ngi bôña.” (Yésaya 46:10) Ngandak nwii i bisu bi ngéda, Bibel i bi legel le ngim mam i bé lama bôña. I bi tibil yaga toñol lelaa niñ i ga ba i ngéda yés. Munu yigil ini, di ga tehe ngim mam Bibel i bi bôk i Iegel ni lelaa ma bi yon i nya i yé hélha!
KÔNDE TÉM
Béñge lelaa bôt ba njoñ yi ba ngéda yés ba yé kiñ yada ni Bibel, noode ki wan ndék mbañ i Bibel.
4. Njoñ yi i yé kiñ yada ni Bibel
I ngéda kôba, ngandak bôt i bé hoñol le hisi hi kéhi i ngii ngim yom. Tuk VIDÉÔ.
Béñge yom kaat Hiôb i bi pot hala a yé 3 500 nwii. Añ Hiôb 26:7, i mbus, ni kwélél mbadga ini:
-
Inyuki hala a nla hélés bés ngéda Bibel i nkal le “A nkéi ki hisi i ngii to yom”?
Hala a yé bebee le 200 nwii le bôt ba binam ba bi nok le ni njel hiañgaa nyen malép ma nla bet i ngii ma yila ond, ndi ma tiimba kwo kiki matôi ma nop (i yom hop Pulasi u nsébél le cycle de l’eau.) Béñge jam Bibel i bi bôk i kal 3 500 nwii i bisu bi ngéda. Añ Hiôb 36:27, 28, i mbus ni kwélél mambadga mana:
-
Kii i yé hélha munu loñge ndoñi Bibel i nti?
-
Baa i pes kaat u ntip añ i nlédés hémle yoñ inyu Bibel?
5. Bihélha bi mam Bibel i bi bôk i pôdôl
Añ Yésaya 44:27–45:2, i mbus ni kwélél mbadga ini:
-
Mambe mam Bibel i bi bôk i pôdôl 200 nwii bisu bi ngéda ilole Babilôn a ntjiba?
Miñañ mi bôt ba binam mi nkal bés le Kirus, kiñe Persia ni bisônda gwé ba bi yémbél tison i Babilôn i nwii 539 B.N.Y. a Kirus ni bisônda gwé ba bi tém soso mbôga inyu boñ le malép ma bé kéña tison i Babilôn ma nyoñ njel ipe. Bôt ba Babilôn ba bi hôya makôga ma lipénd ma néhi. Jon Babilôn a bi kwo ibabé le Kirus ni bisônda gwé ba joo gwét. I len ini, iloo 2 500 nwii i mbus ngéda, Babilôn a ngi yii ntjék, mut nye ki nye a nyééne ha bé mu. Nano, béñge kii Bibel i bi bôk i pôdôl mu jam li.
Añ Yésaya 13:19, 20, i mbus ni kwélél mbadga ini:
-
Lelaa mbañ ini, i bi yon?
I loñ Irak i len ini, tison Babilôn i yé ntjék
6. Bibel i bi pôdôl mam di ntehe i len ini
Bibel i nkal le di niñil i “dilo di nsôk.” (2 Timôtéô 3:1) Béñge yom Bibel i nkal inyu dilo di nsôk
Añ Matéô 24:6, 7, i mbus ni kwélél mbadga ini:
-
Bibel i nkal le bôt ba ga tehe mambe mam i dilo di nsôk?
Añ 2 Timôtéô 3:1-5, i mbus ni kwélél mambadga mana:
-
Bibel i nkal le ngandak bôt i ga bana mambe maboñok i dilo di nsôk?
-
Baa yak we u ma tehe bôt ba gwé maboñok mana?
BÔT BAPE BA NKAL LE: “Bibel i yé ndik kaat miñañ.”
-
Ndi kii i nkwés we nkaa le Bibel i mpot maliga?
I SEM KWEP
Miñañ, njoñ yi ni mbañ bi ñéba le u nla bôdôl Bibel ñem.
Mambadga ma mbigda
-
Baa Bibel i yé kaat i i mpot toi maliga tole i yé ndik kaat miñañ?
-
Baa Bibel ni njoñ yi bi nkiha?
-
U nhoñol le Bibel i nla toñle bés i mam ma ga bôña i dilo di nlo? Inyuki?
KÔNDE YÉÑ
Baa Bibel i ntembee ngéda i mpot mam ma njoñ yi?
Mambe mam ma ñéba bés le di niñil i “dilo di nsôk”?
“Mbañ Bibel isamal i ni ntehe i nyon” (Nkum Ntat, 1 Mpuye 2011)
Béñge lelaa mbañ i i bé pôdôl énél i Grikia i bi yon.
Béñge lelaa mbañ i Bibel i bi hôla mut wada i héñha litehge jé li Bañga i Djob.
“Pour moi, Dieu n’existait pas” (La Tour de Garde No. 5 2017)
a Bibañga bini le B.N.Y. bi nkobla le “Bisu bi ngéda yés,” bini le N.Y. bi nkobla le “Ngéda yés.”
Yak ini i nla lémél we
MAMBADGA BÔT BA MBÉNA BAT
Lelaa Mbôgi Yéhôva i ntégbaha bôt yigil i Bibel?
Mbôgi Yéhôva i nla hôla we i nigil Bibel ibabé i saa; yigil i ntagbe kiki nkwel ipôla bôt iba, u nla ki gwélél to imbe ngobol i Bibel. U kon bañ woñi i naña lihaa joñ jolisôna tole mawanda moñ.
