Tuhan ané ngaé jagaté makejang. Ida tusing ngelah pajumu lan panyuud. (Kidung 90:⁠2) Orti luung Cakepan Suciné tekané uli Ida. (1 Timotius 1: ​11) Krana Tuhan ngemaang idup, tuah Ida dogén ané patut iraga sembah.​—Baca Wahyu 4:​11.

Tusing ada anak ané taén ningalin Tuhan krana Ida maraga Roh, artiné kaidupan Ida tegehan tekén kaidupan ané ada di guminé. (Yohanes 1:​18; 4:​24) Nanging, iraga bisa nawang sipat Ida uli ciptaan-Né. Contoné, makudang-kudang jenis buah lan bunga nunjukang yén Ida sayang lan wicaksana. Linggah jagaté muktiang kuasan Ida.​—Baca Roma 1:​20.

Iraga bisa liu nawang sipat Idané yéning maca Cakepan Suci. Contoné, Cakepan Suci ngajahin iraga apa ané kademenin lan tusing demenina baan Ida, carané Ida maurusan lan carané ngatasin masalah.​—Baca Kidung 103:​7-​10.

Yesus taén ngomong kéné: ”Ajin titiang sane ring suarga, parab Palungguh Aji mangda kaluihang.” (Matius 6:⁠9) Yapin Ida liu ngelah gelar, nanging parab utawi adané tuah abesik. Carané ngorahang adan Idané malénan di sabilang basa. Di basa Indonesia kasambat ”Yehuwa”, nanging ada masih ané nyambat ”Yahweh”.​—Baca Kidung 83:⁠18.

Di liunan Cakepan Suci adan Idané suba kaapus lan kaganti nganggo gelar Tuhan utawi Aji. Sakéwala dugas Cakepan Suciné katulis, adan Idané ada lebian tekén ping 7.000. Dugas ngajahin indik Tuhan, Yesus nyambatang adan Idané.​—Baca Yohanes 17:⁠26.

Krana liu ada masalah, apaké ento artiné Yehuwa tusing nyayangin iraga? Liu anaké ngorahang pakéwehé ané tepukin iraga ento tekané uli Tuhan. Ené tusing beneh.​—Baca Yakobus 1:​13.

Ida ngajinin gati sabilang maurusan ajak manusané, Ida ngemaang manusané ngaé pilihané padidi. Apaké iraga demen ajak kebébasané ené? (Yosua 24:15) Liu anaké milih malaksana jaat tekén anak lénan. Ento krana, liu ada masalah. Atin Yehuwa sebet ningalin laksana buka kéto.​—Baca Purwakaning Dadi 6:​5, 6.

Yehuwa nyayangin iraga. Ida demen apang iraga bagia. Tusing buin makelo, Ida lakar ngilangang apaja ané ngranaang iraga kéweh. Satondéné ento, ada alasan ané kuat Ida nepin kenapa masalah enu ada. Di Palajahan 8, iraga lakar nawang apa alasané.​—Baca 2 Petrus 2:9; 3:​7, 13.

Yehuwa ngundang iraga maekin Ida lan mawicara nganggé pangastawa. Ida rungu tekén iraga. (Kidung 65:2; 145:18) Ida nyak ngampunin iraga. Ida ngajinin iraga dugas iraga ngaénang atin Ida liang, yapin iraga sesai pelih. Iraga bisa paek ajak Ida yadiapin iraga tusing sampurna.​—Baca Kidung 103:​12-​14; Yakobus 4:⁠8.

Krana Yehuwa ngemaang iraga kaidupan, rasa sayang tekén Ida patutné gedénan tekén rasa sayang iraga tekén manusa. (Markus 12:30) Rasa sayang iraga ngenah yéning iraga terus malajah lan nuutin sabdan Idané. Iraga pasti ngancan paek ajak Ida.​—Baca 1 Timotius 2:4; 1 Yohanes 5:⁠3.