Orti luung tekané uli Yehuwa, Tuhan ané bagia, tetujon Ida apang makejang kluargané bagia. (1 Timotius 1:​11) Ida ané nyumunin kluarga. Ngantén ané sah penting apang kluargané bagia lan pianak-pianaké tumbuh di lingkungan ané aman. Anak ané tinut tekén Tuhan patutné taat tekén hukum pamréntah lan hukum adat unduk ngantén.​—Baca Lukas 2:​1, 4, 5.

Manut Tuhan, anak ané suba ngantén kénkén patutné? Tetujon Ida anak ané suba ngantén tusing dadi belas, patutné terus pada saling satia. (Ibrani 13:⁠4) Yehuwa tusing demen yén anak ané suba ngantén mapalasan. (Nabi Maleaki 2:​16) Kéwala, Yehuwa ngemaang anak Kristen pegat makurenan lan buin nganten, yéning kurenané mamitra.​—Baca Matius 19:​3-6, 9.

Yehuwa ngaé anak luh lan muani apang adung lan saling tulungin. (Purwakaning Dadi 2:​18) Dadi pemimpin kluarga, suami patutné magaé buat kluargané lan ngajahin pianakné unduk Tuhan. Ia patut nunjukang rasa sayang ané tulus tekén kurenan. Anak makurenan patutné pada saling ngormatin lan nyayangin. Krana tusing ada pasangan ané sampurna, buka dadua patutné malajah saling ngampurayang. Ento ané ngranaang kluargané bagia.​—Baca Epesus 4:​31, 32; 5:33; 1 Petrus 3:⁠7.

Yén nemu pakeweh, pragatang unduké ajak dadua nganggo sipat sabar lan tusing dadi pedih. (1 Korintus 13:4, 5)  Yén nepukin masalah ané biasa-biasa, pegat makurenan tusingja ajahan uli Cakepan Suci.​—Baca 1 Korintus 7:​10-​13.

Yehuwa ngelah tetujon apanga cerik-ceriké makejang bagia. Ida ngemaang tuntunan ané paling luung apang masa bajangé bagia. Ida seneng apang cerik-ceriké malajah uli hikmat lan pengalaman mémé bapané. (Kolose 3:​20) Yehuwa seneng yéning cerik-ceriké marasa liang dugas nyalanang ané beneh.​—Baca Guru Pangajian 11:9–​12:1; Matius 19:​13-​15; 21:​15, 16.

Ragané patut seleg magaé apang bisa nyediaang dedaaran, umah lan penganggo buat pianaké. (1 Timotius 5:⁠8) Ané utama apang bagia, mémé bapa patut ngajahin pianak apang tinut tekén Tuhan. (Epesus 6:⁠4) Tetuladan mémé bapa ané luung unduk rohani bisa nyentuh atin pianaké. Yéning ajah-ajahané madasar baan Cakepan Suci, ento bisa ngaénang pianak ngelah sipat-sipat ané melah.​—Baca Pangeling-eling 6:​4-7; Pitutur 22:⁠6.

Liu sajaan gunané yén mémé bapa nyemangatin lan muji pianakné. Ia perlu masih koreksi lan ukuman. Yén ngelatih cara kéto, bisa ngelindungin pianaké apang idupné tusing sangsara. (Pitutur 22:15) Sakéwala, yéning ngukum eda bes keras.​—Baca Kolose 3:⁠21.

Saksi-Saksi Yehuwa nyediaang buku ané khusus katulis buat nulungin mémé bapa lan pianakné. Bukuné ento makejang madasar uli Cakepan Suci.​—Baca Kidung 19:​7, 11.