Yehuwa ngaé gumi buat umah manusané. Ento artiné, Adam lan Hawa manusa kapertama tusing idup di suargan. Tuhan suba ngaé malékat apang idup di suargan. (Ayub 38:​4, 7) Tuhan ngejang manusa kapertama di tongos ané melah ané madan taman Eden utawi Pirdaus. (Purwakaning Dadi 2:​15-​17) Ida ngemaang ipun lan katurunané masa depan idup bagia selaminé di guminé.​—Baca Kidung 37:29; 115:⁠16.

Ipidan, tuah taman Eden dogén ané asri di guminé. Manusa kapertama lakar ngelah katurunan tur ngebekin guminé. Manusané lakar nguasain guminé apang makejang dadi pirdaus. (Purwakaning Dadi 1:​28) Guminé lakar terus dadi tongos idup umat manusané lan tusing taén lakar uug.​—Baca Kidung 104:⁠5.

Adam lan Hawa tusing nyak nyalanang préntah Tuhan dadiné ipun ajake dadua katundung uli tamané ento. Pirdausé ilang, tusing ada buin manusa ane bisa ngembaliang. Cakepan Suci ngorahang, jagaté ento suba kuasaine tekén ”jadmane dursila”.​—⁠Ayub 9:​24.​—Baca Purwakaning Dadi 3:​23, 24.

Apaké Yehuwa tusing payu ngisinin tetujoné buat manusa? Tusing! Ida Maha Kuasa. Tetujon Idané tusing lakar buung. (Nabi Yesaya 45:18) Ida lakar ngembaliang tetujon Idané buat manusa patuh cara ané ipidan.​—Baca Kidung 37:​11, 34.

Kayang Yesus mamrentah dadi raja, Pirdaus lakar buin ada. Yesus lakar mimpin pasukan malékaté buat ngematiang manusa ané nentang Yehuwa di perangé ané madan Armagedon. Yesus lakar ngurung I Setan 1.000 tiban makeloné. Umat Idané lakar selamet ulian katuntun lan kalindungin baan Yesus. Ipun lakar ngerasaang idup langgeng di gumi Pirdaus.​—Baca Wahyu 20:​1-3; 21:​3, 4.

Buin pidan Tuhan lakar ngilangang kajaatan di guminé? Yesus ngemaang ”cirin” yén panyuud guminé suba paek. Kondisi guminé jani ngancan kéweh kajalanin, ento nunjukang iraga idup di ”pamuput jagate.”​—Baca Matius 24:​3, 7-​14, 21, 22.

Kayang Yesus mamréntah 1.000 tiban di guminé uli suargan, ia lakar ngilangang makejang pakéwehé. (Nabi Yesaya 9:​6, 7; 11:⁠9) Yesus lakar ngapus dosa-dosan anaké ané nyak nuutin Tuhan. Dadiné ulian Yesus, Ida lakar ngilangang penyakit, tua lan mati.​—Baca Nabi Yesaya 25:8; 33:⁠24.

Anaké ané nuutin Tuhan lakar idup di Pirdaus. (1 Yohanes 2:​17) Yesus ngutus murid-muridné buat ngalih anak ané polos lan ngajahin ipun carané apang kasenengin olih Tuhan. Ané jani, Yehuwa nyiapang yutaan manusa apang idup di gumi Pirdaus ané lakar teka. (Nabi Sepanya 2:⁠3) Di Balai Ibadat Saksi-Saksi Yehuwa, anaké bisa malajah dadi kurenan lan mémé bapa ané jemet. Pianak lan mémé bapané malajah bareng-bareng lan nyalanang ajahan Cakepan Suci apang idupné ngancan luung.​—Baca Nabi Mika 4:​1-4.