Jupajj akham sänwa: “Mä jachʼa markajj yaqha jachʼa marka contraw sartani, mä gobiernosti yaqha gobierno contraw sartarakini. Jachʼa terremotonakaw utjarakini, manqʼat pistʼañanakasa usunakasa ukjan akjanwa utjani” sasa (Lucas 21:10, 11). Taqe ukanakajj mä tiemponakwa phoqasiñapäna, ukhamatwa Diosan Reinopan wali jakʼankjjatapajj qhan yatisispäna. ¿Ukanakajj phoqasiskiti, oraqpachanti phoqasiski? ¿Kunanakas ukanakan phoqasiskatap uñachtʼayi?

1. GUERRANAKA

Mä jachʼa guerraw 1914 maran utjawayi, ukham guerrajj janiw uñjasirïkänti. Historia toqet yatjjatatanakajja, 1914 marajj jan armkañ maränwa sasaw sapjje, kunattejj uka maranwa primera guerra mundialajj aka oraqpachan jan waltʼayawayi. Uka guerranjja tanquenaka, altnäm sarir bombanaka, ametralladoranaka, gases tóxicos ukanaka ukat yaqha ukham jan waltʼayir armanakaw nayrïr kutin aptasïna. Uka qhepatjja segunda guerra mundialaw utjarakïna, ukanwa bombas atómicas ukanakajj uñstäna. 1914 marat aksarojja, guerranakajj ukjan akjan utjawayi, walja millón jaqenakaw uka guerranakan jiwawayapjje.

2. TERREMOTONAKA

Britannica Academic ukarjamajja, sapa marajj mä 100 jachʼa terremotonakaw utji, ukanakajj sinti “jan walinakwa” utjayi. Maysa toqetjja, Estados Unidos markankir Servicio Geológico ukankirinakajj akham sapjjewa: “1900 maratpach utjki uka registronakarjamajja, sapa marajj mä 16 jachʼa terremotonakaw utjani” sasa. Jichha tiemponjja, mä terremoto janïr paskipanwa terremoton pasañapajj yatisjje, ukatwa walja terremotonakas utjkaspa ukhamajja sasin inas yaqhepajj amuyapjjchispa. Ukhamäkchisa, jachʼa terremotonakajj aka oraqpachanwa jaqenakar tʼaqesiyaski, jiwarayaskaraki. Janipuniw ukhamajj uñjasirïkänti.

 3. MANQʼAT PISTʼAÑANAKA

Guerranak utjipana, corrupción utjipana, qollqet pistʼañanak utjipana, jan ukajj yapunak jan suma achupanwa manqʼat pistʼañanakajj aka oraqpachan wal utji. Programa Mundial de Alimentos sat organizacionajja, akham sasaw yatiyawayi: “Aka oraqpachanjja, 821 millón jaqenakaw jan manqʼañanïpkiti, jupanak taypitjja 124 millón jaqenakaw manqʼatjam jiwarasipkaraki” sasa (2018 Year in Review). Sapa marajja 3,1 millón wawanakaw manqʼa jan utjipan tʼukharkipstas jiwapjje. 2011 maranjja, sapa patak wawanakat niya chikataniw manqʼa jan utjipan aka oraqpachan jiwawayapjje.

4. USUNTAÑANAKA UKAT CONTAGIOSO USUNAKA

Organización Mundial de la Salud ukajj mä yatiyäwipan akham siwa: “2001 marat aksarojja kunayman contagioso usunakaw utjawayi. Nayrajj utjkäna uka cólera, peste negra, fiebre amarilla sat usunakajj mayampiw uñstjje. Ukatjja jan uñtʼat usunakaw uñstawayaraki, ukanakat yaqhepajj akanakawa: síndrome respiratorio agudo y grave, gripe pandémica, síndrome respiratorio de Oriente Medio, ébola ukat zika” sasa. Jichhanakakiw COVID-19 usus utjawayaraki. Cientificonakasa mediconakas walsa usunak toqet yatjjatawayapkchejja, janiw taqe usunakatak qollanak jikjjatapkiti.

5. ORAQPACHANWA DIOSAN ARUPAJJ YATIYASISKI

Jesusajj yaqha señalat parlkasajj akham sänwa: “Reinon aka suma yatiyäwinakapajja aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mateo 24:14). Aka oraqpachan kunayman jan walinakas utjkchejja, 8 millonats jila jaqenakaw Diosan Reinopan suma yatiyäwinakap 240 markanakan yatiyasipki, waranqats jila arunakanwa yatiyasipkaraki. Ukhamajj janipuniw uñjasirïkänti.

Jesusajj kunanak pasañapattï parlkäna taqe ukanakajj jichhürunakanwa phoqasiski. ¿Ukanakajj kunsa uñachtʼayistu? Kuntï Jesusajj siskäna uka arunak amtañäni, jupajj akham sänwa: “Ukanak pasir uñjapjjäta ukhajja, Diosan Reinopan jakʼankjjatap yatipjjäta” sasa (Lucas 21:31).

Jesusajj kuna señalattï parlkäna ukarjamasa ukat Bibliarjamasa, Diosan Reinopajj 1914 a maranwa alajjpachan uttʼayasïna. Uka maranwa Diosajj Jesucristo yoqapar reyit uttʼayarakïna (Salmo 2:2, 4, 6-9). Niyaw Diosan Reinopajj aka oraqjjar apnaqjjani, ukatjja taqe gobiernonakwa chhaqtayani. Aka oraqsti mä suma paraisoruw tukuyjjani, ukanwa wiñayatak jakasjjañäni.

Jesusajj mayisiñ yatichkistu uka oracionajj niyaw phoqasini, jupajj akham sänwa: “Reinomajj jutpan. Munañamajj luratäpan, kunjamatï alajjpachan luraski ukhamarak aka oraqens luraspan” sasa (Mateo 6:10). Ukhamajja, ¿kunsa Diosan Reinopajj 1914 marat aksarojj luraski? ¿Jaqenakar apnaqañ qalltjjani ukhajj kunsa lurani?