• Diosampi ajllitäniwa. ‘Naya pachpaw reyijarojj ajllista [...], markanakjja herenciar uñtat katuyjjäma, oraq tukuskam apnaqañamatakiw churjjarakïma’ (Salmo 2:6, 8, TNM).

• David reyin tronop katoqani. “Mä wawaw jiwasataki nacini, Diosaw mä yoqall wawa churistani [...]. Davidan tronopanwa qontʼasirakini, jupan reyïñ chʼamapasti taqe cheqankarakiniwa [...]. Jupan reinopasti suma utjnoqatäniwa” (Isaías 9:6, 7).

• Belén markanwa nasini. ‘Jumasti, Belén marka jumatwa mä apnaqerejj mistuni. Jupan chʼamapajj aka oraq tukuykamaw purini’ (Miqueas 5:2, 4, TNM).

• Uñisitäniwa jiwayatarakïniwa. “Jupajj janis khitimpi uñjatäñapas wakiskaspa ukham jiskʼachatänwa, ukhamäkipansa uñisnuktanwa, apanukuraktanwa [...]. Ukampis jupajj jiwasan Diosasataki saytʼasitas laykuw chhojjriñchjatänjja, jiwasan ñanqha luratanakas laykuw wali tʼaqhesiyatänjja” (Isaías 53:3, 5).

• Jaktayatäniwa jachʼañchatarakïniwa. “Jumajj janiw jiwar katjjaruykitätati janirakiw arkiriman janchip ñusantañaps munkätati [...]; jakʼamansti wiñay kusisiñaw utjaraki” (Salmo 16:10, 11).

Taqe ukanakajj Jesucristompikiw sumpach phoqasi. Mä angelajj Jesusan mamaparojj akham sänwa: “Diosaw juparojj David awkipan tronop churani [...]. Janirakiw Reinopajj tukuskaniti” sasa (Lucas 1:31-33).

Aka oraqenkkasajja, Jesusajj janiw kunapachas apnaqkänti. Ukampis Diosan Reinopan Reyipjamajj aka oraqeruw alajjpachat apnaqanini. ¿Kunatsa jupaw suma reyïspa sasin sissna? Aka oraqenkkasajj kunanaksa luräna ukanak uñjañäni.

•   Jesusajj jaqenakat wal llakisïna. Jupajja chachanakarusa, warminakarusa, wayn tawaqonakarusa, jilïr jaqenakarus wal yanaptʼäna. Janipuniw khitirus yaqhachirïkänti (Mateo 9:36; Marcos 10:16). Lepra usuni mä jaqejj “munsta ukhajj qolltʼasitasmawa” sasin jupar säna ukhajja, Jesusajj wal jupat sinttʼasïna ukat qolltʼarakïnwa (Marcos 1:40-42).

• Kunjamsa Diosan chuymapar purtʼsna, uk Jesusaw yatichawayistu. Jupajj akham sänwa: “Janiw jumanakajj Diosampir Qollqempir esclavot servipkasmati” sasa. ‘Kunjamtï jaqenakampi uñjatäñ munapktajja, ukhamaraki jumanakajj jupanakar uñjapjjam’ sasaw sarakïna. Ukatjja, Diosajj janiw kuntï lurktan ukak yatiñ munkiti, jan ukasti kunanakatsa lupʼisktan kunjamas jikjjatastan ukanakatsa yatiñ munarakiwa sasaw yaticharakïna. Ukatwa Diosan chuymapar purtʼañatakejj taqe jan walinak chuymasat apsuñasa (Mateo 5:28; 6:24; 7:12). Ukatjja wali kusisit jakasiñatakejj Diosan munañaparjam sarnaqañasa, jupar istʼañas kunja wakiskirisa ukanaksa Jesusajj qhanañcharakïnwa (Lucas 11:28).

• Jesusaw mayninakar munasiñ yatichawayistu. Jesusajj arunakapampisa luratanakapampis jaqenakan chuymaparuw purtʼäna. Bibliajj akham siwa: “Jaqenakajj wal musparapjjäna, ukham wali sum yatichatap layku. Jupajj [...] mä jilïr jaqjamaw yatichäna” sasa (Mateo 7:28, 29). Jupajja, “enemigonakamar munasiñampi uñjasipkakim” sasaw ewjjtʼäna. Jupa pachpaw jiwayapkäna ukanakatak akham sasin oräna: “Alajjpachankir Awki, jupanakar perdonam, kuntï lurapki ukjja janiw yatipkiti” sasa (Mateo 5:44; Lucas 23:34).

Jesusakiw apnaqañatakejj suma wakichtʼata. Jupajj cheqpachapuniw wal munasistu, yanaptʼañsa wal munarakistu. Ukampis ¿kunapachas Jesusajj apnaqañ qalltani?