Familianakataki

¿Kuntï wawamajj Diosat yateqki ukanakat pächasjjeti?

Walja wayn tawaqonakajj awk taykapan religionaparojj sarasipkakiwa janiw mistsupkiti (2 Timoteo 3:14). Ukampis janiw taqenejj ukham lurapkiti. ¿Kuntï Diosat wawamar yatichkta ukanakat pächasjjchi ukhajj kamachasmasa? Kunsa Jehová Diosan Qhanañchirinakapajj lurapjje uk jichhajj uñjañäni.

“Awk taykäjan religionaparojj janiw sarañ munjjti. Amuyatajj janiw nayatakïkiti” sasaw 18 marani Cora * sat mä tawaqetajj satayna.

DIOSATJJA religionajjapuniw cheqpach yatichi ukat Bibliakiw sum jakasiñatakejj yanaptʼistu sasaw sispachäta. Ukatwa wawamar uka toqet yatichañ wal munpachätajja, ukajj walikïskiwa (Deuteronomio 6:6, 7). Ukat wawamajj jiltjjasin ¿religión toqet jan yatiñ munjjani ukhasti? Jiskʼäkasin wal yateqañ munirïkän ukanakat jichhajj pächasjjani ukhajj ¿kuns luräta? (Gálatas 5:7.)

Utaman ukham jikjjatasta ukhajja, cristian awkjamajj janiw askïkti sasajj jan llakisimti. Kunjamti yatjjatkañänejja, yaqha toqenakatwa wawamajj ukhamäskaspa. Ukampis kunjam arunakampiy uka toqet wawamar parljjaychïta, ukarjamaw religión toqet yatiñ munaskakispas jan ukajj jukʼampikis jitheqtawayjjaspa. Jumatï jupampi chʼajjwañ qalltätajja, aynachtʼayjjakitamwa. Inamayakiw chʼam tuküta uk jan armasimti (Colosenses 3:21).

Ukatakejja apóstol Pablon aka ewjjtʼapar istʼañaw wali askejja, jupajj akham siwa: “Tatitun mä serviripajj janiw nuwasiñanakan sarnaqañapäkiti, ukatsipana taqenimpis sumankañapawa. Munasirïñapawa yatichañatakejj sumäñapa, ukhamarak llampʼu chuymanïñaparakiwa” sasa (2 Timoteo 2:24). Kuntï religionaman yatichki ukanakat wawamajj pächasjjchi ukhajja, ¿kunjamats jumajj ‘suma yatichirïsma’?

Wali amuytʼasirïñamawa

Kunatsa wawamajj ukham amuyjje uk sum amuytʼañamawa. Uka toqet mä qhawqhanak uñjañäni:

▪ ¿Cristianjam tantachasipkta ukan janit amigonïki ukatch sapak jikjjatasi? Leonor sat 19 maran mä tawaqetajj akham siwa: “Amigonakanïñ munasawa, yateqañ utan amigonak jikjjatta. Ukaw ajay toqen walja maranak aynachtʼayitu. Cheqansa, jan wali amigonak  jikjjattasaw Diosar yupaychañanjja aynachtʼawayta. Jichhajj wal amtasta” sasa.

▪ ¿Kunatsa Dios toqet parlañ ajjsarayaspacha? Ramón sat 23 marani mä waynitojj akham siwa: “Colegionjj masinakäjar Diosat parlañajj wali chʼamïriwa. Janiw mayja jaqëkiristsa jan ukajj ‘wali sums Diosar loqtkirïst’ ukham uñtʼayasiñs munirïkti. Jan jupanakjam sarnaqañ munirinakarojj yaqhachapjjerïnwa, nayajj janiw ukham yaqhachayasiñ munirïkti” sasa.

▪ ¿Diosan arunakaparjam sarnaqañajj chʼamäkaspas ukhamt amuyi? Renee sat 16 maran mä tawaqetajj akham siwa: “Wiñay jakañajj nayatakejj mä jachʼa altos utankkaspas ukhamawa, janiw ni mä gradsa makatañ qalltkti. Uka gradanak makatañsa wal ajjsarayasta, ukatwa religionäj jaytjjañ amtta” sasa.

Jupamp parltʼañamawa

Wawamastï, ¿kuna jan waltʼäwinakans uñjasiraki? Uk sum yatiñatakejj jisktʼañaw wakisi. Ukampis wali amuyumpiw jisktʼañama, janiw chʼajjwañar sarañamäkiti. Santiago 1:19 qellqatajja akham sasaw amuytʼayi: “Jankʼakïñapaw istʼañataki, ukampis janiw jankʼaki kunsa parlañapäkiti ni colerasiñapäkarakisa” sasa. Ukhamasti, parlañatakejj tiempo apstʼasiñamawa, ukat ‘llampʼu chuymampiw’ kunjam­tï yaqha jaqempejj parlkasma ukham yatichañamaraki (2 Timoteo 4:2).

Amuytʼañäni, wawamatï, tantachäwinakar jan sarañ munjjchi ukhajja, pacienciampiw kunatsa jan sarañ munjje uk yatjjatañama. Kunjamsa mä awkejj wawapar yanaptʼañ munasajj jukʼamp aynachtʼayi uk jichhajj uñjañäni:

Wawa: Janiw tantachäwinakar sarañ munjjti.

Awki: ¡Ukampejj kamsañs munta!

Wawa: Tantachäwinakajj qariyjjakituw papitu.

Awki: ¡¿Diosajj aborj-jjetuw sañt ukampejj munta?! ¡Janipuniw akchʼas walïkiti! Aka utan jakkasajja, munams janis, nänakampiw tantachäwir saräta.

Awk taykaw wawanakar Diosat parlapjjañapa, ukat wawanakajja istʼasipjjañapawa sasaw Bibliajj qhanañchi (Efesios 6:1). Ukampis ¿wawamajj juman obligataki tantachäwinakaru ukat ukham yaqha luräwinakar saraspa uk munasmati? Janiwa, antisas kunja wakiskiris Diosar serviñajja, uk jupa pachp amuyasispa ukat amtapat sarañapwa munasmajja.

Ukat yanaptʼañatakejja, kunatsa jan tantachäwinakar sarañ munjje uk nayraqat amuyañamawa. Kuntï uñjaniwayktan ukanjja, awkin ¿kunjam parlañapas wakisispäna? uk jichhajj uñjarakiñäni.

Wawa: Janiw tantachäwinakar sarañ munjjti.

Awki: ¿Kunats jan sarañ munjjt wawa?

Wawa: Tantachäwinakajj qariyjjakituw papitu.

Awki: Ay wawa, mä hora jan ukajj pä hora mayawjan qonuñajj qariñjamäspawa. ¿Kunas sint qariytamjj wawa?

Wawa: Kunatjjay ukhamasktjja, janiw yatkti. Amuyatajj yaqha cheqar sarjjerista ukhaw walejjerista.

Awki: ¿Ukhamarakt amigonakamajj jikjjatasipjje?

Wawa: ¿Kuna amigonaka? Suma amigöjajj sarjje ukhat jichhakamajj janiw khitimp parltʼasiñäjas utjjeti. Taqenis wali kusisitaw sarnaqapjje, nayarojj janiw khitis yäqkituti.

 Amuytanti, awkejj wawapar sum istʼasajja, kunatsa ukham wawapajj jikjjatasïna uk yatjjatawayi, ukat wawapajj jukʼampirakiw awkir confiyjje. Qhepat kuna jan waltʼäwin uñjasïn ukhasa, jan ajjsartʼasaw awkipar yatiyani ( “Paciecianïñamawa” siski uka recuadro uñjjattʼäta).

Kunanakas Diosar yupaychañan jan nayrar sartayki ukanakar saykatapjjaspa ukhajj kusisitaw jikjjatasipjjaspa, ukat religionapatsa janiw mistuñ munapkaspati, ukwa tiempompejj walja wayn tawaqonakajj amuyasipjje. Ramón waynat wasitamp parltʼañäni. Jupajja, cristianötwa sasin masinakapar parlañ amtasakiw khatatjjerïna. Ukampis janiw kujam­tï jupajj amuykäna ukhamäkänti, jan arsartʼasaw kuntï jupajj creykän ukanakat larusipkchïn ukhas yatiyäna.

Jupajj akham siwa: “Mä kutejj colegionkir masïjjaw nayats ukat religionajatsa wal larusitu. Ukjasti wal mulljasta, cursojankir masinakäjas nänakarukis wal uñchʼukipkitaspa ukham amuyasiyäta. Ukatjja, antisas nay religionapat jisktʼä sasaw amuytʼasta. Ukat jisktʼt ukhasti nayat sipansa jukʼampiw jupajj sustjasi. Cheqansa walja wayn tawaqonakaw religionankapjje, ukampis janiw kuns yatipkiti. ¡Nayasti jupanakat sipansa religionajatjj qhanañchiristwa! Ukhamajja jupanakaw antisas ajjsarasipkañapajja janiw nayajj ajjsarañajäkiti” sasa.

¿JANIT AKHAM LURKASMA? Wawamajj cristianöñ toqet kuns amuyi uk jisktʼma ukat istʼarakma. ¿Kuna askinakaw cristianöñanjj utji sis jupajja? Ukat ¿Kunaw jan askïkit sarakisa? ¿Cristianöñati jan ukajj jan cristianöñach jupatakejj jukʼamp aski? ¿Kunats ukham amuyi? (Marcos 10:29, 30.) Kuntï wawamajj amuyki ukjja, pä cheqaruw qelltʼaspa. Chʼeqäwjarojja kunanakas jupatak jan askïki uk qellqtʼaspa ukat kupïwjarojja, askiw siski ukarak qellqtʼaspa. Ukhamatwa kunas jan walïki uk jupa pachp amuyasispa, ukat kunas walïspa uks thaqarakispawa.

Amuytʼasiñapatak yanaptʼam

Qʼajjo wayn tawaqonakajj Janiw jiskʼa wawanakjamajj amuyapkiti sasaw awk taykanakasa ukhamarak yatjjatat jaqenakas sapjje (1 Corintios 13:11). Cheqpachansa, jiskʼa wawanakajja taqe kunarus iyawsapjjakispawa. Ukampis qʼajjo wayn tawaqonakajj taqe kunsa sum yatjjatañ munapjje. Amuytʼañäni, jiskʼa wawanakatakejj Diosaw taqe kuns luratäyna sasin yateqañajj walikispawa (Génesis 1:1). Ukampis qʼajjo wayn tawaqonakajj janiw ukak yatiñ munapkaspati. Jan ukasti akham sasaw jisktʼasipjjaspa: “¿Diosan utjatap kunjamatsa  yatiristjja? ¿Kunatsa munasir Diosajj jan walinak utjaskakiñap munpacha? ¿Kunjamatsa Diosajj wiñayatpach utjpacha?” sasa (Salmo 90:2).

Wawajajj janiw Diosar yupaychañan nayrar sartkaniti sasin inas amuychisma. Ukampis ukajj janiw ukhamäkiti, antisas ukaw wawamarojj nayrar sartañatakejj yanaptʼaspa. Cheqas ukham jisktʼanakaw cristianjam nayrar saratañatakejj wal yanaptʼi (Hechos 17:2, 3).

Ukham jisktʼasisajja, wawamajj ‘chʼikhi amuyunïñwa’ yateqaski (Proverbios 3:21, 22). Ukaw Criston yatichäwinakapajj “taqe toqeru sinti jachʼätapa” amuytʼañatakejj yanaptʼani, wawäkan ukhajj janiw uk amuykänti (Efesios 3:18). Ukhamasti, jichhaw kunatsa Diosar yupachaychapjje uka toqet yatjjatañ yatichañama, ukhamat jan kunatsa pächasipjjañapataki (Proverbios 14:15; Hechos 17:11).

¿JANIT AKHAM LURKASMA? Kunanakatsa jan jisktʼasipjjerïkta uka jisktʼanakatwa wawamampejj yatjjatañama, inas akham jisktʼasipjjchisma: “¿Diosajj utjaskapuniw sasajj kunats sistjja? ¿Diosajj nayat llakisiw sasajj kunatsa sistjja? ¿Diosan leyenakap istʼañajj kunjamsa yanaptʼitu?” sasa. Janiw wawamarojj kunjamtï jumajj amuykta ukham amuyañapatakejj obligañamäkiti, jan ukasti jupapachpa amuytʼasiñapatakiw yanaptʼañama. Ukhamatwa kuntï jumajj creykta ukanak creyerakïni.

“Diosar yupaychañapataki yanaptʼam”

Timoteojj “wawatpachwa” Diosan arunakap uñtʼäna sasaw Bibliajj qhanañchi. Ukhamäkipansa, Apóstol Pablojj akham sasaw ewjjtʼäna: “Kuntejj yateqkta, ukat iyawsarakta ukarojj jan pächasis arkam” sasa (2 Timoteo 3:14, 15). Awk taykanaka, inas wawamajj Timoteo waynjam wawatpach Diosan arunakap yateqawaychi. Ukampis jichhaw Diosar jupa pachpa amuyañapatak wawamar yanaptʼañama.

El libro Lo que los jóvenes preguntan. Respuestas prácticas (volumen 1) siski uka libronjja akham siwa: “Cheqansa wawamatï juma chik jakaskchi ukhajja, kuntï Dios toqet yatichkäta ukanak yateqañapatak mayiñamajj walikïskiwa. Ukampis janiw jariyataki yateqañapäkiti jan ukasti Diosar jupa pachpa munasiñapatakiw yanaptʼañama”. Ukhamasti, uka arunakarjamaw wawamarojj Diosar confiyañapatak yanaptʼäta. Ukat Diosar confiyasjjani ukhajja, kunjamtï jumajj Diosar yupaychañ yatichkta ukhamarakiw Diosar chuymapat yupaychani (1 Pedro 5:9). *

[Qhanañchäwinaka]

AMUYTʼAÑATAKI JISKTʼANAKA

▪ ¿Diosar creyitäjat wawäjajj jisktʼitu ukhajj kunjams parljjaytjja?

▪ ¿Kunjamsa aka yatichäwejj wawajamp sum parltʼasiñäjatakejj yanaptʼitaspa?

[19 janan recuadropa]

¿Amuyunakapti mayjtʼayapjje?

¿Kuns amuyapjje? Jehová Diosan Qhanañchirinakapajj wawanakaparojj munkir jan munkirwa religionapar irpapjje.

Kunatï cheqäki: Bibliarjamaw Jehová Diosan Qhanañchiripapki uka awk taykanakajj Diosar munasipjjañapatak wawanakapar yatichapjje (Efesios 6:4). Ukampis wawanakapajj wayn tawaqojjapjjani ukhajja, Diosar servipjjaniti janich ukjja, wawanakap pachpaw amtjjapjjani uksa yatipjjarakiwa (Romanos 14:12; Gálatas 6:5).

[20 janan recuadropa/fotopa]

Paciencianïñamawa

 Qʼajjo wayn jan ukajj tawaqet wawamamp parlañajj inas wali pacienciatakïchi. Ukampis pacienciamp parlätajja, jan ajjsartʼasaw kuns awisatamjja. Mä tawaqetajj akham siwa: “Mä arumajja, awkïjarojj taqe kunwa yatiyta, akham sasa: Mä waynampiw uñtʼasisipkta, página de red social siski ukanïtwa ukat utat sarjjañ munta, sasa. Ukat parlasipkt ukhajja, pacienciampiw istʼitu. Cheqansa, janiw khiti awkis wawapajj mä waynampi jampʼatisirïtapa ukat mensajenak qellqasin sapakut apayirïtap yatisajj pacienciamp istʼkaspati, wal colerasajj toqjjaspawa. Jichhajj jan ajjsartʼasaw papitujar taqe kuns yatiyä, jupajj yanaptʼitaniwa” sasa.

[21 janan recuadropa]

¿Khitis wawamar yanaptʼaspa?

Awisajja, wayn tawaqonakajj yaqhanakan yanaptʼapwa munapjje, janiw familiapamp yanaptʼayasiñ munapkiti. Inas jumajj Diosar taqe chuym loqtir mä chachar jan ukajj mä marmir uñtʼsta, jupaw wawamarojj yanaptʼaspa. ¿Janit jupar yanaptʼa maykasma? ukham lurasajja, juman lurañam yaqharukis jaytkasma ukham janiw amuyañamäkiti. Timoteot amtañäni. Juparojj apóstol Pablow wal yanaptʼäna ukat Pablos Timoteomp sarnaqasajj wali askinak jikjjattarakïna (Filipenses 2:20, 22). *

[Qhanañchäwi]