መጋቢት 27, 2024 | የታደሰው፦ ግንቦት 13, 2024
ሩሲያ

ወቅታዊ መረጃ—ወንድሞች ጥፋተኛ ተባሉ | ልበ ሙሉ፣ ዝግጁና አዎንታዊ ሆኖ መጽናት

አጫውት

ግንቦት 13, 2024 በአልታይ ግዛት፣ በባርናውል ከተማ የሚገኘው የሌኒንስኪ አውራጃ ፍርድ ቤት፣ በወንድም ዩሪ ኮሎቲንስኪ፣ በወንድም ሚካይል ሬሼትኒኮቭ እና በወንድም አናቶሊ ሳሪቼቭ ላይ የጥፋተኝነት ብይን አስተላልፏል። ሦስቱም የሁለት ዓመት ከሦስት ወር የገደብ እስራት ተበይኖባቸዋል። በአሁኑ ወቅት ወህኒ አይገቡም።

አጭር መግለጫ

ዩሪ ኮሎቲንስኪ

ትውልድ፦ 1955 (ሞልዶቫ)

ግለ ታሪክ፦ በማዕድን ማውጫ ውስጥ የከባድ ማሽን ኦፐሬተር ሆኖ ይሠራ ነበር

በ1977 ከናታሊያ ጋር ተጋቡ

መከራ እንዲህ የበዛው ለምን እንደሆነ ያሳስበው ነበር። ከይሖዋ ምሥክሮች ጋር ማጥናት ሲጀምር ከመጽሐፍ ቅዱስ ላይ ለጥያቄዎቹ መልስ አገኘ። ዩሪ እና ናታሊያ በ1995 ተጠመቁ

የሰጠው ሐሳብ

ይሖዋ እንደሚደግፍህ እንድትተማመን የረዳህ የመጽሐፍ ቅዱስ ታሪክ የትኛው ነው?

እስራኤላውያን ከግብፅ ከወጡ በኋላ የነበሩበትን ሁኔታ ብዙ ጊዜ አስባለሁ። ምድረ በዳ ላይ በነበሩበት ጊዜ ሁሉ ይሖዋ ይመራቸውና ይጠብቃቸው ነበር። ይሖዋ ለእኔም ተመሳሳይ ነገር እያደረገልኝ እንደሆነ ይሰማኛል። ፍርድ ቤት በተጠራሁ ቁጥር ይሖዋ ቀድሞኝ ሲሄድ ይታየኛል። ይሖዋ እንደሚደግፈኝ ስለሚሰማኝ እሱ እንደሚወደኝና በማንኛውም ፈተና ሥር በታማኝነት ለመጽናት የሚያስችል ብርታት እንደሚሰጠኝ እርግጠኛ ነኝ። ትክክል የሆነውን እያደረግኩ እንደሆነ ከመቼውም ጊዜ ይበልጥ እርግጠኛ ነኝ፤ ለይሖዋ ስም ጥብቅና ለመቆም ስል አቅሜ የፈቀደውን ሁሉ ለማድረግ ተዘጋጅቻለሁ።

ሚካይል ሬሼትኒኮቭ

ትውልድ፦ 1949 (ማክሲነር፣ ኪሮቭ ክልል)

ግለ ታሪክ፦ ከ50 ለሚበልጡ ዓመታት የአውቶቡስ እና የከባድ መኪና ሹፌር ሆኖ ሠርቷል

ከመጀመሪያዋ ባለቤቱ አንድ ወንድና አንዲት ሴት ልጅ አፍርቷል፤ እሷ በካንሰር ሕይወቷ ካለፈ በኋላ በ2021 አንቶኒናን አገባ

ስለ መጽሐፍ ቅዱስ ጥያቄዎች ቢኖሩትም ከቤተ ክርስቲያኑ መልስ ሊያገኝ አልቻለም። ከይሖዋ ምሥክሮች ጋር በማጥናት እውነትን ሲያውቅ ተደሰተ። በ2000 ተጠመቀ

የሰጠው ሐሳብ

ለስደት ዝግጁ መሆንህ የጠቀመህ እንዴት ነው?

ወንድሞቻችንን እና እህቶቻችንን መያዝና ማሰር ሲጀምሩ ለፈተና ዝግጁ መሆን እንድችል ይሖዋን ጥበብ እንዲሰጠኝና ራሴን መግዛት እንዲያስችለኝ ለመንኩት። የእሱን እርዳታ በተደጋጋሚ መመልከቴ ይሖዋ በተገቢው ጊዜ ለጸሎታችን መልስ እንደሚሰጥ ያለኝን እምነት አጠናክሮልኛል። እሱ ከጎኔ እንደሆነ አልጠራጠርም። በመሆኑም የፍርድ ቤቱ ውሳኔ ምንም ይሁን ምን አልፈራም። በይሖዋ እርዳታ እስከ መጨረሻው ታማኝ መሆን እንደምችል አውቃለሁ።

አናቶሊ ሳሪቼቭ

ትውልድ፦ 1949 (ካርፖቮ፣ አልታይ ግዛት)

ግለ ታሪክ፦ ጡረታ ከመውጣቱ በፊት የግራፊክ ዲዛይን ባለሙያ ነበር

በ1990 ከናዴዥዳ ጋር ተጋቡ። አንድ ወንድ ልጅ አላቸው

ከቀዶ ሕክምና እያገገመ በነበረበት ወቅት ከይሖዋ ምሥክሮች ጋር ተገናኘ። ይሖዋ ግፍንና መከራን ለማስወገድ የሰጠውን ተስፋ ሲማር በጣም ተደሰተ። ናዴዥዳ በ2001፣ አናቶሊ ደግሞ በ2002 ተጠመቁ

የሰጠው ሐሳብ

አዎንታዊ ሆነህ እንድትቀጥል የሚረዳህ ምንድን ነው?

በ1 ጴጥሮስ 3:14 ላይ የሚገኘውን “ሆኖም ለጽድቅ ስትሉ መከራ ብትቀበሉ ደስተኞች ናችሁ” የሚለውን ጥቅስ ለማስታወስ እሞክራለሁ። ፈሪሳውያን ሐዋርያትን ያሳደዷቸው መስበካቸውን ለማቆም ፈቃደኛ ባለመሆናቸው ነበር። ሐዋርያት ለኢየሱስ ስም ሲሉ የደረሰባቸውን ውርደት በጽናት ተቋቁመዋል፤ በዚህም ደስተኞች ሆነዋል። እኔም የእነሱን ምሳሌ መከተል እፈልጋለሁ። የሚደርስብኝ ስደት አንገቴን እንዲያስደፋኝ አልፈቅድም። እንዲያውም የጥንቶቹን ክርስቲያኖችና የራሱን የኢየሱስ ክርስቶስን ምሳሌ እየተከተልኩ እንደሆነ ስለማውቅ በእጅጉ እጽናናለሁ።

በይሖዋ ላይ እምነት በመጣልና በእሱ በመመካት ረገድ ግሩም ምሳሌ የሚሆኑ እንዲህ ያሉ ወንድሞች ስላሉን አመስጋኞች ነን። የይሖዋ ታማኝ ፍቅርና እንክብካቤ እንደማይለያቸው ሙሉ እምነት አለን።—መዝሙር 25:10

የክሱ ሂደት

ግንቦት 25, 2021

ሚካይል የክስ ፋይል ተከፈተበት
ግንቦት 27, 2021

የሚካይል ቤት ተፈተሸ። እሱና አንቶኒና ምርመራ ተደረገባቸው። ሚካይል የጉዞ ገደቦች ተጣሉበት
ጥቅምት 6, 2022

አናቶሊ እና ዩሪ የክስ ፋይል ተከፈተባቸው፤ ከዚያም ክሳቸው በሚካይል መዝገብ እንዲካተት ተደረገ
ጥቅምት 7, 2022

አናቶሊ እና ዩሪ የጉዞ ገደቦች ተጣሉባቸው
ጥር 19, 2023

ክሳቸው በፍርድ ቤት መታየት ጀመረ

እነዚህንስ አይተሃቸዋል?

አዳዲስ ዜናዎች

በእምነታቸው ምክንያት የታሰሩ—ሩሲያ

በሩሲያ የሚኖሩ የይሖዋ ምሥክሮች በእምነታቸው ምክንያት ታስረዋል። ስለ እነዚህ የይሖዋ ምሥክሮች እንድታነብ እንጋብዝሃለን፤ በአሁኑ ወቅት እስር ቤት ያሉትን የይሖዋ ምሥክሮች ስም ዝርዝር የያዘውን ፋይልም ማተም ትችላለህ።

አዳዲስ ዜናዎች