Anhã. Gyehova Dasɩvʋlɔmaa bɛádɩndɛ betiyia vaccine wɔlɛ. Yɛnwʋ vaccine wɔlɛ kɛɛ ɩdɩ Kilisinyianii bela yɩ pɔkɔzilɛ. Gyehova Dasɩvʋlɔmaa sʋ̃maa si pɔkɔ kɛɛ bɛkɛma bɔkɔwɔ vaccine bɛ.

 Yɛpɩbɛ adimakɛlɛzalɛba na yɛ anyɩ ɩsɔ anyunumihɔlɛ mɔɔ benyia wɔ adimakɛlɛzalɛ nu nɩ paa. Yɛ anyɩ ɩsɔ mmɔdɩnɩ mɔɔ dɔkɩtamaa nɩɩ mmenii mvʋlɔ bɔbɔ nɩ, yi titili wɔ mmɩlɩ mɔ adimakɛlɛ be ibigyia yi nu sʋlɔ nɩ.

 Nhyɩhyɛlɩyɛ mɔɔ bɛzabɛ mɔɔ beli anyunumi wɔ adimakɛlɛzalɛ nu bɛyɛ nɩ, Gyehova Dasɩvʋlɔmaa bedidi ɔzʋlɔ. Kɛ ndianwʋ nɩ, ɔzʋmɩ mmɩlɩ mɔ COVID-19 adimakɛlɛ nɩ wɔlɩ yɩ tʋ nɩ, Gyehova Dasɩvʋlɔmaa bedindimi ndwokɔ sʋ̃maa wɔ wɛbsayɩtɩ eyi zʋ bɛva bɛhyɛ mmenii ɛzɩzɩbɛ kɛɛ belí banɩwɔlɛ nwʋ nhyɩhyɛlɩyɛ nɩ zʋ. Eyi be yɛ lɛ kezimɔ nwʋmɔ hyinyia kɛɛ yelébike mmenii sʋ̃maa, mmenii sʋ̃maa mɔɔ yɛ nɩɩ bɛ keyiyia nu wɔ egyimalilɛ azʋlɔtʋ tʋ nwʋ nhyɩhyɛlɩyɛ, kezimɔ yɛkɛva yɛ nwʋ yekeziye wɔ mmɩlɩ ɛgyɩkɩ̃ɩ̃ be nu, yɛ sa nwʋ mɔɔ yɛkɔwʋwʋ, mask mɔɔ yekowula nɩɩ nhyɩhyɛlɩyɛ bela mɔɔ mbanimbani kɛhã kɛɛ yɛva yɛyɛ egyima nɩ.—Wulomimaa 13:1, 2.

 Alʋbɔ sʋ̃maa ɛdɩ yɛ Gyehova Dasɩvʋlɔmaa bɛ awuuku nɩɩ nninyeni mvʋlɔ hwɩ̃ adwɩnɩ iziye egyinalɛzʋ ndwokɔ eyimmɔ zʋ a:

•   Adimakɛlɛzalɛ nwʋ pɔkɔzilɛ azʋlɔtʋ ɩdɩ abiyela yɩ pɔkɔzilɛ.—Galatiyiamaa 6:5.

   “[Magazine eyi] iáhile adimakɛlɛzalɛ anzɛnyɩɩ awudo pɔkyɩɩ be mɔɔ ɩsɛ kɛɛ abiye fa di egyima. Mfomi, ɩtwɩ̃ adwɩnɩ isiye ndwokɔ aditili be zʋ na iyiaki ɩma ɛɣɩngalɛmaa yɩ kɛɛ bɛzabɛ bezí bɔ pɔkɔ.”—Awake!, February 8, 1987.

   “Kɛ abiye nɩɩ yɩ nnwuakula bɔkɔwɔ vaccine anzɛnyɩɩ bɔlɔ́wɔ nɩ, ɩdɩ bɛzabɛ bɔ pɔkɔzilɛ.”—Awake!, August 22, 1965.

•   Yɛpɩbɛ adimakɛlɛzalɛ iluwakɛɛ yebu nnwʋanlɩ kɛ ɩtʋ bʋlɔ paa.—Egyima 17:28.

   “Gyehova Dasɩvʋlɔmaa bɔkɔ dɔkɩtamaa nɩɩ asʋ̃piti egyimayɛlɛmaa bɛ ɛkɛnɩ bɔkɔ bɛpɩbɛ mmʋwalɩyɛ na ama beanyia pɔkɔdɩlɛ baaba. Bɔdɔ nnwʋanlɩ na bɛpɛ kɛɛ bekyina Bayɩbʋlʋ yɩ zʋ bɛyɛ mɔɔ bɔkɔhʋla bela na ama bɛawʋwa azɩ bɛahyɛ.”—The Watchtower, July 1, 1975.

   “Gyehova Dasɩvʋlɔmaa bede nnuno nɩɩ adimakɛlɛzalɛ betiã nu. Bɛpɛ kɛɛ benyia pɔkɔdɩlɛ baaba na ama bɛawʋwa nnwʋanlɩ nu bɛahyɛ. Nɔhʋanlɛ odwokɔ yɛ lɛ kɛɛ, dɩkɛɛ Luuku mɔɔ nɩ ɩwɔ asʋ̃mavʋlɔ bɛ mmɩlɩ zʋ nɩ, Gyehova Dasɩvʋlɔmaa bo nu be dɩ dɔkɩtamaa . . . Gyehova Dasɩvʋlɔmaa bɛ anyɩ ɩsɔ egyima ɛzɩzɩbɛ mɔɔ bɛzabɛ mɔɔ bekila yɛ pɔkɔdɩlɛ zʋ bɛyɛ nɩ paa. Akʋ̃ sʋ̃, bɛ anyɩ ɩsɔ pɔkɔdɩlɛ mɔɔ mmenii eyimmɔ bɔ mmɔdɩnɩwɔlɛ ɩma mmenii nyia wɔ adimakɛlɛ azʋlɔtʋ nwʋ nɩ.”—The Watchtower, February 1, 2011.