OZUMALƐDƖYƐ 01

Kɛ Bayɩbʋlʋ Nɩ Ɩkɔhʋla Ɩkɔwʋwa Wʋ Ikezia a?

BƆ́

Ye nu sʋ̃maa wɔ ndwokɔɣizialɛ mɔɔ ɩfalɩ ɛbɩlawɔlɛ, amanɩyɛnwʋnlɛ, owulo nɩɩ mɔɔ ikezizi wɔ eɣile be nɩ nwʋ. Akʋ̃ sʋ̃ ɩyɛ a, ɛbɩlawɔlɛ nu ndwokɔ dɩkɛɛ kezimɔ yekenyia ozukua yekehila yɛ abusunwa nɩɩ kezimɔ yekenyia anyɩnlɩlelɛ wɔ yɛ abusunwa nu nɩ ɩkʋla idide yɛ. Mmenii sʋ̃maa bɔnwʋ yɩ kɛɛ, Bayɩbʋlʋ yɩ ɩwʋwa bɛ ma benyia ɛbɩlawɔlɛ nu ndwokɔɣizialɛ nɣezile nwʋ munwalɩyɛ nɩɩ fʋlɔdulɛ mɔɔ bɛkɛva bɔkɔwɔ bɛ ɛbɩla. Ezi abiye sʋ̃ mɔɔ Bayɩbʋlʋ yɩ ɩkɔhʋla ɩkɔwʋwa yɩ a?

1. Mɩnla ndwokɔɣizialɛ yɛ Bayɩbʋlʋ ɩma nwʋmɔ munwalɩyɛ a?

Bayɩbʋlʋ yɩ ɩfa ndwokɔɣizialɛ eyimmɔ mɔɔ nwʋmɔ ihyinyia nwʋ munwalɩyɛ ɩma: Yɛzʋ̃ ɛhɩnlafʋã a? Mɩnla ti mɔɔ yɛda azɩ a? Mɩnla ti mɔɔ yɛnwʋ amanɩyɛ a? Sɛ yewu a, ɛhɩnla dɩka yɛ yɛkɔ a? Sɛ abiyela pɛ azʋ̃nudwolɩyɛ a, nɩ mɩnla ti mɔɔ kʋnɛ ɩzʋnɩ zɛ yɩ a? Mɩnla yɛ ikezi eɣile be a? Bayɩbʋlʋ ɩhyɛ yɛ ɛzɩzɩbɛ kɛɛ, yɛbɩbɛ́ ndwokɔɣizialɛ mɔɔ ɩdɩdɩ ɛzɛ nwʋ munwalɩyɛ. Mmenii sʋ̃maa yɛ ɔzɔ, na benyia nwʋmɔ munwalɩyɛ mɔɔ ɩma bɛ ahʋnlɩnɩ ɩdɔ bo kunlu.

2. Mɩnla ɔhʋanɩ zʋ yɛ Bayɩbʋlʋ yɩ ɩkɛma yekenyia anyɩnlɩlelɛ wɔ yɛ ɛbɩlawɔlɛ nu a?

Bayɩbʋlʋ yɩ ɩfa fʋlɔdulɛba ɩma yɛ. Kɛ ndianwʋ nɩ, ikilehile mmusunwa kezimɔ bekenyia anyɩnlɩlelɛ ankasa. Ɩma yɛnwʋ mɔɔ ɩsɛ kɛɛ yɛyɛ mmɩlɩ mɔ nninyeni ɩhyɛ yɛ zʋ, nɩɩ kezimɔ yɛkɛva anyɩnlɩlelɛ yɛkɛyɛ ye egyima. Mmɩlɩ mɔ yesunzuu ɔnwʋma eyi nwʋ nɩ, ɔkɔnwʋ mɔɔ Bayɩbʋlʋ yɩ ikilehile ɩfalɩ ndwokɔ adile eyimmɔ nɩɩ mvʋlɔ nwʋ. Ɛkɛɣa ɔkɔnwʋ kɛɛ ‘Ɛhɛlɛlɛ nɩ munwatĩĩ [odwokɔ bela mɔɔ ɩwɔ Bayɩbʋlʋ yi nu nɩ] ɩdɩ baaba.’—2 Timoti 3:16.

Ɔnwʋma eyi ɩ́dɩ Bayɩbʋlʋ. Mfomi, ɩbʋwa ma wʋzawʋ ɛpɩbɛlɩ Bayɩbʋlʋ yi nu. Meti yesiãã wʋ kɛɛ, kɩnga Bayɩbʋlʋ nu ndwokɔ mɔɔ bɔhwɩ̃ adwɩnɩ beziye ɔzʋlɔ wɔ dɩyɛzumanlɛ azʋlɔtʋ yi nu nɩ, na fa tindiã mɔɔ osumaa nɩ nwʋ.

SUMÁ SƲ̃MAA

Sunzú kezimɔ Bayɩbʋlʋ yɩ ɩwʋwa mmenii, kezimɔ ɛkɛma wʋ anyɩ ikeleli yɩ ɛɣɩngalɛ nwʋ, nɩɩ sianti mɔɔ mfasʋ wɔ zʋ kɛɛ ɛkɛma abiye ɩkɔwʋwa wʋ ma ɛkɛdɩ yɩ tʋ nɩ nwʋ.

3. Bayɩbʋlʋ yɩ ɩkɔhʋla ikehile ɔhʋanɩ yɛ

Bayɩbʋlʋ ɩdɩ kɛɛ tɔɔkyɩ mɔɔ itwe baaba paa. Bayɩbʋlʋ ɩkɔhʋla ɩkɔwʋwa yɛ ma yekezizi abɔkɔ baaba na yɛanwʋ mɔɔ ikezi wɔ eɣile be sʋ̃.

Kɩnga Ndwomi 119:105, na akʋ̃ bozunzú ndwokɔɣizialɛ eyimmɔ nwʋ:

Enii mɔɔ ɩhɛlɛlɩ ndwomi eyi nɩ, mɩnla adwɩnɩ yɛ nɩ ɩlɛ wɔ Bayɩbʋlʋ yɩ nwʋ a?
Kɛ obu Bayɩbʋlʋ yɩ ese a?

4. Bayɩbʋlʋ ɩlɛ yɛ ndwokɔɣizialɛ nwʋ munwalɩyɛ

Baalɛ be ɩɣa ɩnwʋnlɩ kɛɛ, Bayɩbʋlʋ ɩlɛ ndwokɔɣizialɛ be mɔɔ ɩhyɩ yɩ adwɩnɩ alʋbɔ sʋ̃maa nɩ nwʋ munwalɩyɛ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.

VIDIYO: Miáyiaki Wʋ Anyɩnlɩlazʋ Yɩ Nu Kyɩ̃! (1:48)

Wɔ vidiyo yi nu nɩ, mɩnla ndwokɔɣizialɛ yɛ nɩ baalɛ nɩ ɩwɔ a?
Bayɩbʋlʋ yɩ mɔɔ izumanlɩ nɩ, kɛ ɩwʋwalɩ yɩ izeli a?

Bayɩbʋlʋ yɩ ɩhyɛ yɛ ɛzɩzɩbɛ kɛɛ yeɣiziá ndwokɔ. Kɩnga Matiyu 7:7, na akʋ̃ bozunzú eyi nwʋ:

Asʋ̃ ɔwɔ ndwokɔɣizialɛ be mɔɔ osunzu kɛɛ Bayɩbʋlʋ yɩ ɩkɔhʋla ɩkɛyɩ yi munwa a?

5. Sa wʋ anyɩ ɩkʋla ideli Bayɩbʋlʋ ɛɣɩngalɛ nwʋ

Mmenii sʋ̃maa bɛ anyɩ ideli Bayɩbʋlʋ ɛɣɩngalɛ nwʋ na benyiaa ɔzʋlɔ mfasʋ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.

VIDIYO: Bayɩbʋlʋ Ɛɣɩngalɛ (2:05)

Wɔ vidiyo yi nu nɩ, nɩ kɛ mmɩlantɩyɛ nɩɩ nɣɛdɛkɛ yɩ bɛtɩ nɣanlɩ wɔ ɛɣɩngalɛ nwʋ bese a?
Ɩwɔ numɔ kɛɛ nɩ bɛábɛ ɛɣɩngalɛ dɩyɛ, naasʋ̃ mɩnla yɛ ɩma akʋ̃ bɛ anyɩ ɩɣa ileli Bayɩbʋlʋ ɛɣɩngalɛ nwʋ a?

Bayɩbʋlʋ yɩ ɩkã kɛɛ ɩkɔhʋla ɩkɛma fʋlɔdulɛ mɔɔ ɩma ɛɣɛɛlɛɣɩkyɩlɛ nɩɩ anyɩnlɩlazʋ yɛ. Kɩnga Wulomimaa 15:4, na akʋ̃ bozunzú odwokɔɣizialɛ eyi nwʋ:

Ɛɣɛɛlɛyɩkyɩlɛ nɩɩ anyɩnlɩlazʋ nwʋ ndwokɔ mɔɔ ɩwɔ Bayɩbʋlʋ yi nu nɩ, asʋ̃ wʋ anyɩ ideli nwʋ a?

6. Mmenii mvʋlɔ bɔkɔhʋla bɔkɔwʋwa yɛ ma yɛkɛdɩ Bayɩbʋlʋ yɩ tʋ

Sɛ yɛfa Bayɩbʋlʋ mɔɔ bɛzabɛ bɛkɩnga nɩ yesiye ahanlɩ a, mmenii sʋ̃maa bɔnwʋ kɛɛ sɛ bɛ nɩɩ mmenii mvʋlɔ bɔbɔ nu bosuma a, ɩbʋwa paa. Kɩnga Egyima 8:26-31, na akʋ̃ bozunzú odwokɔɣizialɛ eyi nwʋ:

Kɛ ɩkɛyɛ na yɛadɩ Bayɩbʋlʋ yɩ tʋ a?—Kilá nkyɩkyɛmi 30 nɩɩ 31.

Na nɩ Yitiyopiyianii nɩ ihyinyia mmʋwalɩyɛ na ama ɩadɩ mɔɔ ɩkɩngaa nɩ yɩ tʋ. Nnɛ, mmenii sʋ̃maa bɔnwʋ yɩ kɛɛ sɛ bɛ nɩɩ mmenii mvʋlɔ bɔbɔ nu bosuma Bayɩbʋlʋ yɩ a, ɩbʋwa paa

ABIYEMMƆ BƐKÃ KƐƐ: “Bayɩbʋlʋ zumanlɛ ɩdɩ mmɩlɩ ɛzɩkɛlɛ.”