Ansaana Gyisɛsɩ ibawu nɩ, ɩhanlɩ kɛɛ: “Bɔkɔwɔ Odwokɔba eyi mɔɔ ɩfalɩ Nyamɩnlɩ Bulombunlililɛ nɩ nwʋ ɛlawulo wɔ oyuwadɩ yɩ dɩka bela, ama abiyela ɩadɩ Odwokɔba nɩ na akʋ̃ awielɩyɛ nɩ ɩaɣa.” (Matiyu 24:14) Naasʋ̃ mɩnla ɔhʋanɩ zʋ yɛɛ bɔkɔhʋla bɛkɛyɛ ɔzɔ oyuwadɩ munwala odwokɔhanlɛ egyima eyi a? Iluwa ndianwʋ mɔɔ Gyisɛsɩ ɩyɛlɩ mmɩlɩ mɔɔ nɩ ɩwɔ azɩlɛ yɩ zʋ nɩ mɔɔ bɛkɛva bɛkɛyɛ egyima yɩ nɩ zʋ.—Luuku 8:1.

Yɛbɔ mmɔdɩnɩ kɛɛ yɛkɔhɔ mmenii bɛpɛ wɔ bɛ awudo. Gyisɛsɩ ɩdɩdɩlɩ yɩ adʋwavʋlɔ nɩ mɔɔ kɛɛ bɔwɔ odwokɔba nɩ nwʋ ɛlawulo wɔ abika abika nu. (Matiyu 10:11-13; Egyima 5:42; 20:20) Wɔ adʋwavʋlɔ bɛ mmɩlɩ zʋ nɩ, bɛhyɩhyɛlɩ azɩlɛ-sini pɔkyɩ̃ɩ̃ be bɛmanlɩ ɔzɔ odwokɔhanlɛmaa nɩ. (Matiyu 10:5, 6; 2 Kɔlɛntɩmaa 10:13) Ɔzɔ la sʋ̃ yɛ nnɛ, bɛhyɩhyɛ yɛ odwokɔhanlɛ egyima yɩ bʋwɔ a, na asafʋ bela ɩlɛ azɩlɛ-sini mɔɔ ɩyɛɛ numɔ egyima. Eyi ɩma yɛkʋla yedi Gyisɛsɩ yɩ ahyɛdɩ mɔɔ ise kɛɛ “yɛhã yɩ Odwokɔba nɩ yehile mmenii munwatĩĩ na yeli yɩ nwʋ dasɩlɛ” nɩ ɩzʋ.—Egyima 10:42.

Yɛyɛ mɔɔ yɛkɔhʋla bela kɛɛ yɛkɔhɔ mmenii bɛpɛ wɔ dɩka bela mɔɔ yɛkɔnwʋ bɛ. Gyisɛsɩ izialɩ ɩyɛlɩ ndianwʋ fʋlɔ iluwa odwokɔ yɩ mɔɔ ɩhanlɩ ihileli mmenii wɔ bagua zʋ, dɩkɛ ngyemvile munwa anzɛnyɩɩ twonwa be bo bula nwʋ nɩ. (Maakɩ 4:1; Dwɔɔnʋ 4:5-15) Amɩyɛzayɛ sʋ̃ yɛkã Bayɩbʋlʋ nu ndwokɔ yekeli mvʋlɔ wɔ dɩka bela mɔɔ yɛkɔnwʋ bɛ nɩ—wɔ bagua nu, wɔ ɔhʋanɩ nu, wɔ egyimayɛlɛ nnɩka, wɔ ɛɣɛlɛlilɛ nnɩka, anzɛnyɩɩ wɔ foonu zʋ. Akʋ̃ sʋ̃ yedi mmenii mɔɔ yɛnɩ bɛ da yɛ apaa yɩ nu, yɛ egyimanumaa, yɛ sukuulumaa, nɩɩ yɛ mmusunwamaa dasɩlɛ mmɩlɩ mɔɔ yenyia ɔnwʋmɔ ɔhʋanɩ nɩ. Eyi mɔɔ yɛyɛ yɩ nɩ munwala ɩwʋwa ma ɩyɛ bʋwɔ kɛɛ mmenii mbɩmmbɩɩ mɔɔ bɔwɔ oyuwadɩ yɩ dɩka bela nɩ bɛdɩ “odwokɔba” nɩ mɔɔ ɩma nnwʋanlɩ yɩ nɩ.—Wulomimaa 1:16.

Asʋ̃ ɔkɔhʋla ɔkɔdwɩnɩ abiye mɔɔ ɛpɛyɩ kɛɛ ɛkã odwokɔba mɔɔ ɩfalɩ Nyamɩnlɩ yɩ Bulombunlililɛ nɩ, nɩɩ mfasʋ mɔɔ ikenyia eɣile be wɔ ɔzɔ odwokɔ yɩ nɩ zʋ ekehile yɩ a? Mɩáfa ɔzɔ anyɩnlɩlazʋ odwokɔ eyi nɩ siye wʋ nwʋ. Bɔ́ mmɔdɩnɩ kã kile ebiyemmɔ sʋ̃ ndɛndɛ!

• Mɩnla “odwokɔba” yɛɛ ɩsɛ kɛɛ yɛkã a?

• Mɩnla ɔhʋanɩ zʋ yɛɛ Gyehova Dasɩvʋlɔmaa yɩ nɩ bosumazuma ɔhʋanɩ mɔɔ Gyisɛsɩ iluwalɩ ɔzʋlɔ ɩhanlɩ odwokɔba nɩ a?