Anɛ o bi o he sane bimi nɛ ɔmɛ hyɛ lo? Ke jã a, lɛɛ pi mo pɛ. Nihi ngɛ je kɛ wɛ bi ɔ sanehi nɛ he hia nɛ ɔmɛ. Anɛ o ma nyɛ maa na heto ɔmɛ lo?

Nihi ayɔhi abɔ ma ha heto ke, “Ee!” Mɛni he je? Ejakaa a na a sane bimi ɔmɛ a hetohi nɛ haa nɔ tsui nɔɔ e mi ngɛ Baiblo ɔ mi. O maa suɔ nɛ o le nɔ́ nɛ Baiblo ɔ de lo? Ke jã a, lɛɛ o ma ná blɔ nya nɛ Yehowa Odasefohi to nɛ a kɛ kaseɔ Baiblo ɔ he se. *

Ngɛ anɔkuale mi ɔ, ke e ba Baiblo ɔ kasemi mi ɔ, ni komɛ deɔ ke: “I be deka kulaa.” “Baiblo ɔ sisi numi yee.” “I sume nɛ ma kase.” Se ni komɛ hu de we jã. A bua jɔ kaa a maa le nɔ́ nɛ Baiblo ɔ tsɔɔ. Mo susu nɔ hyɛmi ní nɛ ɔmɛ a he nɛ o hyɛ:

• “I ya Katoliki kɛ Protestant sɔlemi. Jehanɛ hu, i ya Sikh bi kɛ Buddha bi a jami mi, nɛ i kase mawu jami he ní ngɛ yunivɛsiti hulɔ. Se i ná we ye sane bimihi nɛ kɔɔ Mawu he ɔmɛ a heto. Kɛkɛ nɛ Yehowa Odasefo no ko ba ye we mi. Hetohi nɛ e ha mi kɛ je Baiblo ɔ mi ɔ ha nɛ ye tsui nɔ ye mi, nɛ i kplɛɛ nɔ kaa e kɛ mi nɛ kase Baiblo ɔ.”—Gill, e je England.

• “Jinɛ i ngɛ si himi mi sane bimihi fuu, se hetohi nɛ ye osɔfo ɔ kɛ ha mi ɔ ha we nɛ ye tsui nɛ nɔ ye mi. Se Yehowa Odasefo no ko ba ye ngɔ, e kɛ Baiblo ɔ pɛ nɛ ha ye sane bimi ɔmɛ a heto. Benɛ e bi ke ji ma suɔ nɛ ma kase babauu lo ɔ, i kɛ bua jɔmi kplɛɛ nɔ.”—Koffi, e je Benin.

• “I suɔ nɛ ma le si fɔfɔɛ mi nɛ gbogboe ɔmɛ ngɛ. I he ye kaa gbogboehi ma nyɛ maa ye nihi nɛ a hɛ ngɛ ɔ awi, se i ngɛ hlae nɛ ma le nɔ́ nɛ Baiblo ɔ de ngɛ he. Lɔ ɔ he ɔ, i kɛ ye huɛ ko nɛ e ji Odasefo no ɔ bɔni Baiblo ɔ kasemi.”—José, e je Brazil.

• “I kane ɔ Baiblo ɔ se i nui sisi. Kɛkɛ nɛ Yehowa Odasefohi ba ye we ɔ mi, nɛ a tsɔɔ mi Baiblo mi gbamihi fuu a sisi saminya. I ngɛ hlae nɛ ma kase ní kpahi kɛ piɛɛ he.”—Dennize, e je Mexico.

• “I susuɔ ke ji Mawu susuɔ ye he niinɛ. Lɔ ɔ he ɔ, i ma ye juɛmi nya si kaa ma sɔle kɛ ha Mawu nɛ Baiblo ɔ tu e he munyu ɔ. E nɔ jena a, Odasefohi enyɔ fia ye sinya, nɛ i ha nɛ a kɛ mi je Baiblo mi ní kasemi sisi.”—Anju, e je Nepal.

Níhi a si kpami nɛ ɔmɛ kaiɔ wɔ munyuhi nɛ Yesu tu ɔ. E de ke: ‘A gbaa nihi nɛ le kaa Mawu jami he hia mɛ.’ (Mateo 5:3) Ngɛ anɔkuale mi ɔ, a bɔ adesahi konɛ a suɔ kaa a maa le Mawu. Mawu pɛ nɛ e ma nyɛ maa ye bua wɔ konɛ waa le lɛ, nɛ e peeɔ jã kɛ gu e Munyu nɛ ji Baiblo ɔ nɔ.

Lɛɛ kɛ a peeɔ Baiblo mi ní kasemi ha kɛɛ? Kɛ o ma na he se ha kɛɛ? A ma ha sane bimi nɛ ɔmɛ a heto ngɛ munyu nɛ nyɛɛ se ɔ mi.