BAIBLO Ɔ TSAKEƆ NIHI A SI HIMI
He Tsuaa He Nɛ Ma Ya A, Tu Ngɛ Ye He
-
JEHA NƐ A FƆ LƐ: 1958
-
HE NƐ E JE: ITALY
-
BƆ NƐ E NGƐ HA BE KO NƐ BE: E KƐ E HE YA BƆ OJO FIALI A HE
BƆ NƐ I NGƐ HA BE KO NƐ BE:
A fɔ mi ngɛ Rome ma wayo ko mi, nɛ ohiatsɛmɛ hiɛ ngɛ lejɛ ɔ wawɛɛ. Si himi ɔ mi wa wawɛɛ. I nɛ́ ye yayo gble, nɛ huɛ bɔmi kpakpa be i kɛ ye papaa wa kpɛti. He nɛ i hi ɔ ha nɛ benɛ i ngɛ wae ɔ, i kase hɛ mi wami.
I bɔni jumi loko i ye jeha nyɔngma. Kekleekle be nɛ i tu fo kɛ je we mi ji benɛ i ye jeha 12. Ye papaa ba ngɔ mi ngɛ polisihi a ní tsumi yi ɔ si abɔ kɛ ba we mi. I kɛ nihi pɔɔ nya sami wawɛɛ
I ba le jumi wawɛɛ nitsɛ
BƆ NƐ BAIBLO Ɔ TSAKE YE SI HIMI HA:
Benɛ a je mi ngɛ tsu mi ɔ, i to ye yi mi kaa ma ya slaa ye nyɛ wayo ko. I li kulaa kaa ye nyɛ wayo ɔ kɛ e bimɛ enyɔ ba pee Yehowa odasefohi. A de mi ke i kɛ mɛ nɛ ya kpe nɛ Odasefo ɔmɛ peeɔ ɔ. Akɛnɛ i ngɛ hlae nɛ ma le nɔ́ tutuutu nɛ a peeɔ ngɛ lejɛ ɔ he je ɔ, i nyɛɛ a se kɛ ya. Benɛ wa ya su Matsɛ Yemi Asa a nɔ ɔ, i de mɛ ke i suɔ nɛ ma hi si ngɛ sɛ nɛ kɛ sinya a nya kɛ we ɔ nɔ. I de mɛ jã akɛnɛ i ngɛ hlae nɛ ma hyɛ nihi nɛ maa ba Asa a nɔ kɛ nihi nɛ maa je kpo ɔ he je. Ngɛ anɔkuale mi ɔ, i hɛɛ tu ngɛ ye he.
Kpe ɔ nɛ i ya jamɛ a ligbi ɔ ha nɛ ye si himi tsake kulaa. I kae kaa jamɛ a ligbi ɔ, e pee mi kaa i ngɛ je kpa ko mi. Nihi kɛ bua jɔmi ba nya ye he saminya, a pee mi nibwɔ, nɛ a kɛ mi sɛ ní wawɛɛ. Loloolo ɔ, i kaiɔ bɔ nɛ Odasefo ɔmɛ je a tsui mi nɛ a je mi mi himi kpo kɛ tsɔɔ mi ɔ. Odasefo ɔmɛ ngɛ slɔɔto kulaa ngɛ nihi nɛ i kɛ mɛ bɔ ɔ a he!
I ha nɛ Odasefo ɔmɛ kɛ mi bɔni Baiblo ɔ kasemi. Benɛ ní kasemi ɔ ngɛ hɛ mi yae ɔ, i na kaa e sa nɛ ma tsake ye si himi kulaa. I ngɔ ga womi nɛ ngɛ Abɛ 13:20 nɛ deɔ ke: “Nɔ nɛ kɛ ní leli nyɛɛɔ ɔ, e leɔ ní. Se nɔ nɛ kɛ kuasiahi bɔɔ ɔ, haomi lɛ baa e nɔ” ɔ kɛ tsu ní. I yɔse kaa e sa nɛ ma je ye he kɛ je ojo fiali a kuu nɛ ní basabasa pɛ a peeɔ ɔ he kulaa. Enɛ ɔ peemi be gbɔjɔɔ, se Yehowa ye bua mi nɛ i pee jã.
Be nɛ ɔ mi ji kekleekle be nɛ i bɔni ye he nɔ yemi
I ha nɛ ye he tsɔ ngɛ nɔmlɔ tso mi. I bɔ mɔde wawɛɛ nɛ i kpa sigaleti numi, nɛ i kɛ tsopa yaya tsu we ní hu. I sã ye yi bwɔmi nɛ hɛ kusuu ɔ, i kpa tue nya ní womi, nɛ i tsua we yakayaka ní hu. Be nɛ ɔ mi ji kekleekle be nɛ i bɔni ye he nɔ yemi.
Jinɛ i sume ní kanemi kɛ ní kasemi kulaa, lɔ ɔ he ɔ, jinɛ e he wa ha mi kaa i kɛ ye juɛmi maa ma Baiblo ɔ nɛ i ngɛ kasee ɔ nɔ. Se i bɔ mɔde wawɛɛ, nɛ bɔɔbɔɔbɔɔ ɔ, i ba ná suɔmi kɛ ha Yehowa, nɛ nɔ́ ko bɔni tsakemi ngɛ ye mi, lɔ ɔ ji, ye he nile bɔni mi fɔ bumi. Behi fuu ɔ, ye yi mi peeɔ mi enyɔɔnyɔ kaa Yehowa kɛ ní yayahi nɛ i pee ɔ be mi pae. Ke e ba jã nɛ i kane bɔ nɛ Yehowa ngɔ Matsɛ David yayami nɛ hɛdɔ ngɛ he ɔ kɛ pa lɛ ɔ, e woɔ ye bua wawɛɛ.
Nɔ́ kpa ko hu nɛ e peemi ye ha mi ji kaa ma ya fiɛɛ ha nihi ngɛ a wehi a mi. (Mateo 28:19, 20) I ye gbeye kaa ma ya na nɔ ko nɛ be ko ɔ, i ye lɛ awi loo i pee lɛ nɔ́ yaya ko! Se bɔɔbɔɔbɔɔ ɔ, i ba ná kã. Benɛ i ba bɔni nihi ye buami konɛ a le wa Tsɛ nɛ ngɛ hiɔwe nɛ e kɛ yayami kee nɔ faa a he ní ɔ, ye tsui nɔ ye mi wawɛɛ.
BƆ NƐ E YE BUA MI HA:
Yehowa he ní nɛ i kase ɔ he ye yi wami! Ye huɛmɛ nɛ i kɛ mɛ bɔ ɔ a kpɛti nihi fuu gbo, nɛ a kpɛti ni komɛ hu lɛɛ a wo mɛ tsu, se imi lɛɛ i ngɛ bua jɔmi nitsɛ ngɛ ye si himi mi, nɛ i ngɛ hwɔɔ se be kpakpa ko blɔ hyɛe. I kase he si bami, kɛ bɔ nɛ a peeɔ tue bumi ha, nɛ ye mi mi fu we mlamlaamla hu. Enɛ ɔ ha nɛ i le bɔ nɛ a kɛ nihi hii si saminya ha. Amlɔ nɛ ɔ, i ngɔ yo nɛ e he ngɛ fɛu nɛ a tsɛɛ lɛ ke Carmen. I kɛ ye yo ɔ waa kɛ bua jɔmi ngɛ nihi ye buae konɛ a kase Baiblo ɔ.
Amlɔ nɛ ɔ, i ngɛ ní tsumi kpakpa tsue