Abɛ 14:1-35
14 Yo juɛmitsɛ fiaa e we kɛ maa si,Se yo kuasia ngɔɔ lɛ nitsɛ e nine kɛ huleɔ lɛ kɛ pueɔ si.
2 Nɔ nɛ nyɛɛɔ ngɛ dami mi ɔ yeɔ Yehowa gbeye,Se nɔ nɛ e blɔhi dɛ ɔ* gbeɔ Mawu he guɛ.
3 He nɔ womi munyu nɛ kuasia tuɔ ɔ ngɛ kaa tue gblami tso,*Se juɛmitsɛmɛ a nya maa po a he piɛ.
4 He nɛ nahi be ɔ, lohwehi a niye ní daka mi tsɔɔ,Se na ku he wami haa nɛ a kpaa ní babauu.
5 Odase yelɔ anɔkualetsɛ be lakpa yee,Se lakpa odase yelɔ yeɔ lakpa be fɛɛ be.
6 He fɛu yelɔ hlaa juɛmi, se e ná we eko,Se nɔ nɛ ngɛ nɔ́ sisi numi ɔ, e yi kaa e maa le ní.
7 Moo yu o he ngɛ kuasia he,Ejakaa o be nile nae ngɛ e nya mi.
8 Juɛmi haa nɛ hɛ mi tɛlɔ nuɔ blɔ nɛ e ngɛ nɔ nyɛɛe ɔ sisi,Se kuasiahi lɛɛ a kuasia jemi ɔ sisiɔ mɛ.*
9 Kuasiahi ngɔɔ fɔ yemi* kɛ peeɔ fiɛmi,Se dali suɔ nɛ a dla a kpɛti pɛ.*
10 Tsui ɔ pɛ lɛ le bɔ nɛ nɔ́ dɔɔ lɛ* ha,Nɛ nɔ kpa ko kɛ lɛ be nyɛe maa dla e bua jɔmi ɔ.
11 A ma kpata yiwutsotsɛmɛ a we hɛ mi,Se dali a bo tsu maa bɔ.
12 Blɔ ko ngɛ nɛ e da ngɛ adesa hɛ mi,Se nyagbenyagbe ɔ, e kɛ nɔ yaa gbenɔ mi.
13 Ke nɔ ko ngɛ muɔe po, e tsui ma nyɛ maa hi lɛ yee,Bua jɔmi ma nyɛ ma ya gbe nya ngɛ aywilɛho yemi mi.
14 Nɔ nɛ e tsui wo blɔ yaya a ma kpa níhi nɛ maa je mi kɛ ba a,Se nɔmlɔ kpakpa ma kpa nɔ́ nɛ maa je e ní peepeehi a mi kɛ ba a.
15 Nɔ nɛ e juɛmi nya wɛ* ɔ heɔ munyu fɛɛ munyu yeɔ,Se nɔ nɛ e hɛ mi tɛ ɔ susuɔ nɔ́ fɛɛ nɔ́ nɛ e peeɔ ɔ he.*
16 Juɛmitsɛ hyɛɔ e he nɔ saminya, nɛ e jeɔ e he ngɛ nɔ́ yayami he,Se kuasia peeɔ e ní basabasa,* nɛ e heɔ lɛ nitsɛ e he yeɔ tsɔ.
17 Nɔ nɛ e mi mi fuɔ mlamlaamla a, e jeɔ kuasia,Se nɔ nɛ susuɔ níhi a he saminya a,* a nyɛɔ lɛ.
18 Nihi nɛ a juɛmi nya wɛ* ɔ ma ná kuasia jemi kaa weto ní,Se hɛ mi tɛli lɛɛ, a kɛ nile fĩɔ mɛ jlasi.
19 Nimli yayamihi ma kplã si ha nimli kpakpahi,Nɛ yiwutsotsɛmɛ ma kplã si ngɛ dali a we agbo ɔmɛ a nya.
20 Ohiatsɛ ɔ, nihi nɛ a kɛ lɛ ngɛ ɔ po nyɛɔ lɛ,Se niatsɛ huɛmɛ hiɛ babauu.
21 Nɔ nɛ gbeɔ e nyɛmi nɔmlɔ he guɛ ɔ peeɔ yayami,Se nɔ fɛɛ nɔ nɛ jeɔ mi mi sami kpo kɛ tsɔɔ nihi nɛ a ní ngɛ mɔbɔ ɔ ngɛ bua jɔmi.
22 Anɛ nihi nɛ a toɔ ga yaya a be blɔ tlae lo?
Nihi nɛ a to a yi mi kaa a maa pee nɔ́ kpakpa a lɛɛ, a ma je suɔmi nɛ se pui kpo kɛ tsɔɔ mɛ, nɛ a maa ye mɛ anɔkuale.
23 Se nami ngɛ ní tsumi kpakpataa fɛɛ ní tsumi kpakpataa he,Se ke o hii si nɛ o ngɛ munyu tue puu kɛkɛ ɔ, o maa ye ohia.
24 Juɛmitsɛmɛ a jlasi ji ní nɛ a ná a;Se kuasiahi lɛɛ kuasia kɛkɛ lɛ a jeɔ.
25 Odase yelɔ anɔkualetsɛ baa wami* yi,Se nɔ sisilɔ yeɔ lakpa be fɛɛ be.
26 Nɔ nɛ yeɔ Yehowa gbeye ɔ ngɛ hɛ kɛ nɔ fɔmi nɛ mi wa,Nɛ lɔ ɔ maa pee wesa he kɛ ha e bimɛ.
27 Yehowa gbeye yemi ji wami nyu hɛngmɛ,E jeɔ nɔ kɛ jeɔ gbenɔ klamahi a mi.
28 Nihi babauu nɛ matsɛ ngɛ ɔ ji e we agboje,Se nɔ yelɔ nɛ e be nihi ngɛ e sisi ɔ, e nɔ yemi ɔ guɔ.
29 Nɔ nɛ mi mi fu we mlamlaamla a ngɛ nɔ́ se kɔmi wawɛɛ,Se nɔ nɛ be tsui si tomi jeɔ e kuasia jemi kpo.
30 Tsui nɛ e he jɔ ɔ haa nɔmlɔ tso ɔ wami,*Se hunga jemi ngɛ kaa hiɔ nɛ haa nɛ wuhi saa.
31 Ke o fia nɔ nɛ e ní ngɛ mɔbɔ ojo ɔ, o ngɛ e Bɔlɔ ɔ* jɛe,Se nɔ fɛɛ nɔ nɛ jeɔ mi mi sami kpo kɛ tsɔɔ ohiatsɛ ɔ woɔ Mawu hɛ mi nyami.
32 Yiwutsotsɛ nitsɛ e ní yayami maa tsɛ̃ lɛ kɛ fɔ si,Se dalɔ ma ná wesa he ngɛ e we anɔkuale yemi ɔ he je.
33 Juɛmi hiɔ si dii ngɛ nɔ nɛ nuɔ nɔ́ sisi ɔ tsui mi,Se e jeɔ e he kpo ngɛ kuasiahi a kpɛti.
34 Dami haa nɛ ma yaa nɔ,Se yayami ji hɛ mi si puemi kɛ ha ma bi.
35 Matsɛ bua jɔɔ sɔmɔlɔ nɛ e kɛ nɔ́ se kɔmi tsuɔ ní ɔ he,Se e mi mi fuɔ nɔ nɛ tsuɔ zo ní.
Sisi Ningmahi
^ Aloo “blɔhi kpɛ̃ ɔ.”
^ Ngɛ Hebri gbi mi ɔ, “He nɔ womi tso ngɛ kuasia nya mi.”
^ Baiblo komɛ de ke, “nihi.”
^ Aloo “pɛ dlami.”
^ Aloo “Se kake peemi ngɛ dali a kpɛti.”
^ Aloo “e klaa.”
^ Aloo “Nɔ nɛ be níhi a si kpami.”
^ Ngɛ Hebri gbi mi ɔ, “susuɔ nane fɛɛ nane nɛ e hiaa a he.”
^ Aloo “Se kuasia mi mi fuɔ.”
^ Aloo “nɔ nɛ ngɛ nyɛmihi nɛ a kɛ susuɔ nɔ́ he ɔ.”
^ Aloo “Nihi nɛ a be níhi a si kpami.”
^ Aloo “klaa.”
^ Aloo “he wami.”
^ Aloo “Peelɔ ɔ.”
