Abɛ 15:1-33
15 Heto nɛ a haa kɛ gbi blɛuu* ɔ tsiɔ mi mi fumi nya,Se munyu gegeege* tleɔ abofu si.
2 Juɛmitsɛmɛ a lilɛ ngɔɔ nile kɛ tsuɔ ní saminya,Se kuasiahi a nya jeɔ kuasia jemi kpo.
3 Yehowa hɛngmɛ ngɛ he fɛɛ he,E naa nihi nɛ a peeɔ ní yayamihi kɛ nihi nɛ a peeɔ ní kpakpahi tsuo.
4 Lilɛ nɛ e he jɔ* ɔ ji wami tso,Se munyu nɛ a plɛ hɛ mi ɔ haa nɔ kɔni mi jɔ̃ɔ.*
5 Kuasia bui e tsɛ tsɔsemi,Se nɔ nɛ e hɛ mi tɛ ɔ kplɛɛɔ hɛ mi kami nɔ.
6 Juetli babauu ngɛ dalɔ we mi,Se nɔ́ nɛ yiwutsotsɛ kpaa a* ngɔɔ haomi kɛ baa e nɔ.
7 Juɛmitsɛmɛ a nya gbɛɔ nile kɛ fĩaa,Se kuasiahi pee we jã.
8 Yehowa hiee* yiwutsotsɛmɛ a we afɔle,Se e bua jɔɔ dali a sɔlemi he.
9 Yehowa hiɔ yiwutsotsɛ ní peepee,Se e suɔ nɔ nɛ diɔ dami ní peemi se.
10 Nɔ nɛ kpa nɔ́ nɛ da peemi ɔ, e naa tsɔsemi kaa nɔ́ yaya,*Se nɔ fɛɛ nɔ nɛ hiɔ hɛ mi kami ɔ ma gbo.
11 Yehowa naa Yɔkɔ* kɛ hɛ mi kpatami muɔ ɔ* po heii;
Hluu nɛ́ adesahi a tsui mi!
12 He fɛu yelɔ sume nɔ nɛ kãa e hɛ mi.*
E be juɛmitsɛmɛ a ngɔ yae.
13 Tsui nɛ e bua jɔ ɔ haa nɛ nɔ tsɔɔ e hɛ mi,Se tsui yemi gbeɔ nɔ mumi.
14 Tsui nɛ nuɔ nɔ́ sisi hlaa nile se blɔ,Se kuasia bua jɔɔ kuasia jemi he.*
15 Nɔ́ nalɔ ligbi ɔmɛ tsuo ɔ, haomi sɔuu,Se nɔ nɛ e ngɛ bua jɔmi tsui ɔ* ngmɛɔ okplɔɔ daa.
16 Nɔ́ ko bɔbɔyoo nɛ nɔ ko ngɛ nɛ Yehowa gbeye yemi piɛɛ he ɔHi pe ní nami babauu nɛ yeyeeye peemi piɛɛ he.
17 E hi kaa o maa ye ba flɔɔ ngɛ he nɛ suɔmi ngɛPe nɛ o maa ye na ku nɛ wo zɔ ngɛ he nɛ ninyɛ ngɛ.
18 Nɔ nɛ woɔ e mi mi la a tleɔ pɛ si,Se nɔ nɛ e mi mi fu we mla a jɔɔ pɛ he.
19 Hejɔtsɛ blɔ ngɛ kaa mio piɛ,Se dali a blɔ ngɛ kaa gbɛjegbɛ ngua nɛ nɔ da.
20 Bi juɛmitsɛ haa nɛ e tsɛ nyaa,Se kuasia gbeɔ e nyɛ he guɛ.
21 Nɔ nɛ be juɛmi* ɔ bua jɔɔ kuasia jemi he,Se nɔ nɛ kɔɔ nɔ́ se ɔ nyɛɛɔ kɛ yaa e hɛ mi tɛɛ.
22 He nɛ nɔ́ he susumi be ɔ,* yi mi tomihi yi manye,Se kɛ gu ga woli babauu a nɔ ɔ, níhi yaa nɔ saminya.
23 Nɔ nɛ haa* heto nɛ da a bua jɔɔ,Nɛ munyu nɛ a tuɔ ngɛ be nɛ sa mi ɔ—hyɛ bɔ nɛ e hi ha!
24 Nɔ nɛ ngɛ nɔ́ se kɔmi ɔ ngɛ blɔ nɛ kuɔ kɛ yaa wami mi ɔ nɔ,E yuɔ e he ngɛ blɔ nɛ kple kɛ yaa Yɔkɔ* mi ɔ he.
25 Yehowa maa hule he nɔ woli a we kɛ pue si,Se e maa po yalɔyo* huzu he piɛ.
26 Yehowa hiɔ yiwutsotsɛ ga tsɔmi ɔmɛ,Se munyu ngɔngɔɛhi a he tsɔ ha lɛ.
27 Nɔ nɛ e guɔ sisimi blɔ nɔ kɛ náa ní ɔ ngɔɔ haomi* kɛ baa lɛ nitsɛ e we mi bimɛ a nɔ,Se nɔ nɛ hiɔ nyɔ mi ní ɔ maa ya nɔ maa hi wami mi.
28 Dalɔ* pueɔ e yi mi tɛ loko e haa sane heto,*Se yiwutsotsɛmɛ a nya jeɔ ní yayamihi kpo.
29 Yehowa kɛ yiwutsotsɛmɛ a kpɛti kɛ wawɛɛ,Se e buɔ dali a sɔlemi tue.
30 Hɛngmɛ nɛ nɔ tsɔ* haa nɛ nɔ tsui nyaa;Amaniɛ bɔmi kpakpa haa nɛ wuhi a he waa.*
31 Nɔ nɛ buɔ hɛ mi kami nɛ haa nɔ wami tue ɔKɛ juɛmitsɛmɛ lɛ ngɛ we mi.
32 Nɔ fɛɛ nɔ nɛ e kuaa tsɔsemi ɔ bui e wami,*Se nɔ fɛɛ nɔ nɛ e buɔ hɛ mi kami tue ɔ náa nɔ́ sisi numi.*
33 Yehowa gbeye yemi ji tsɔsemi nɛ haa nɔ peeɔ juɛmitsɛ,Nɛ he si bami baa loko hɛ mi nyami baa.
Sisi Ningmahi
^ Aloo “kɛ mi mi jɔmi.”
^ Aloo “munyu nɛ dɔɔ nɔ.”
^ Aloo “Lilɛ nɛ tsaa nɔ.”
^ Ngɛ Hebri gbi mi ɔ, “munyu kpɛ̃kpɛ̃ɛ kuɔ mumi ɔ.”
^ Aloo “Se yiwutsotsɛ hiɔwo.”
^ Aloo “hiɔ.”
^ Aloo “kaa nɔ́ ko nɛ nya wa.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “kɛ Abadon.” Hyɛ Munyu Komɛ A Sisi Tsɔɔmi.
^ Aloo “nɔ nɛ tsɔɔ lɛ ní.”
^ Ngɛ Hebri gbi mi ɔ, “kuasia nya yeɔ kuasia jemi.”
^ Aloo “nɔ nɛ ngɛ tsui kpakpa a.”
^ Ngɛ Hebri gbi mi ɔ, “be tsui nɛ nuɔ nɔ́ sisi.”
^ Aloo “Ke a sɛɛ we yi mi munyuhi ɔ.”
^ Ngɛ Hebri gbi mi ɔ, “Nɔ nɛ e nya haa.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “ahoyo.”
^ Aloo “hɛ mi si puemi.”
^ Ngɛ Hebri gbi mi ɔ, “Dalɔ tsui.”
^ Aloo “susuɔ bɔ nɛ e ma ha sane heto ha a he saminya; susuɔ níhi a he loko e tuɔ munyu.”
^ Aloo “Hɛ mi muɔ jɛɛ nɛ a kɛ hyɛɛ nɔ hɛ mi ɔ.”
^ Ngɛ Hebri gbi mi ɔ, “haa nɛ wuhi woɔ zɔ.”
^ Aloo “klaa.”
^ Ngɛ Hebri gbi mi ɔ, “náa tsui.”
