Goola lainy gudx Paddington, toib lagary ro rabés xidalguixo buñ gudx Londres (Inglaterra). Golésa né xinaʼya né guionca beela ni más lagol que naʼ. Bixiosa diti tampa goyoʼbu né lóodo portín gosochgoluʼbu.

Dzú góca mbioxien, xinaʼya bisuidybu naʼ ñoni oración guirá goxin. Gopa toib Biblia mitien ro nosi gopni libro xtuny Salmo né biyobi mod ñony cantar láani. Toibtica buelt biila toib diitz ló toib libro ni ná: «Sioʼ dzú ma diti saraaguel». Diitzreʼ diti bidudyni lagary naʼ ñaasi goxin; buni pensary xi láani gac ló dzú ni sietra. Goodxi naca: ¿Noʼ xi portín nabani ló Gudxlio la? ¿Xí roni reʼ? ¡Diti goniiny naʼ ñati!

Goniiny naʼ ñaana xi ngú galchiser. Por ngú biyobi mod naninéya buñ ni ma goity né goyaʼya ro baʼ né ximiga de yolayscuel. Láaca bidopa né layibu par nabiʼdo películas ni nadzuibygoluʼ. Guirá ni bibiʼdo bitzuibyni lóodo, per láaca bioladxdo láani.

Chiisa íz gopa, né nirosondi mod bibani. Gosaló godóba gues né ma diti labúu nasiana láani. De ngú gosalóya godóba mariguan. Dzú gopa 11 íz buny prueby alcohol ná diti bioladxi mod nacni, per bioladxi que bisochni naʼ. Bioladxi canción né láaca bioladxi nayaʼya. Né nagachca bireʼya goxin par labúu goyaʼya lanii né láaca nagachca bibigueta par diti ñoʼ chú nabiʼ naʼ. Stoib dzúcu ma diti labúu goyaʼya scuel portín nigolú cadzaga. Né órni goyaʼya scuel guirá ór gooya alcohol. Né ná cayoʼ scuel gooya alcohol.

Último íz ni goyaʼya scuel bietj ló calificación xtuni. Xinaʼya diti gonbu xi cayoni por ngú bireʼganbu né bidzuitzbu né naʼ. Godíildo né bireʼya lidxi. Diti xidzú golesnéya xinobi Toni, láabu gócbu rastafari. Pórsi galgobáan bunybu, né bitoʼbu drogas né buñ bimbu láabu xomod buñ mal. Diti xidzú gocxiina, 16 íz napa órni goyoʼ primerdiguieʼ xiindo.

Bimbuya testigos xtuny Jehová laʼga goyoʼya toib lagary ro goyoʼ pórsi buñgonaʼ ni gosann stoib. Servicios sociales gocné naʼ por ngú labúu golésa lagarycu. Chop buñgonaʼ Testigos guirá ór goyguenyibu stipnés mbioxhlas ni ma noʼ xiin. Toibtica dzú goyoʼya ro cayooyibu diitz par naslooya que Testigos diti rasuidyibu xinésni. Per ná scú biyopyibu mod golexayibu galrranabdiitz ni gopa, nayadit golexayibu láani né biquiinyibu la Biblia. Bioladxi que gocyibu buñtzay né godabioyibu naʼ. Por ngú gosaguela bisudi la Biblia né layibu.

Bioladxi ni bisudi ló la Biblia por ngú bitzaʼya mod góca. Desde dzú góca mbioxien bidzubi ñati, órcu bisudi ni goniʼ Jesús que buñ ni ma goity siás lad gueʼet (Juan 5:​28, 29). Láaca bienna que Dios rioʼ galrrasaʼ por naʼ (1 Pedro 5:7). Diitz ni sieed ló Jeremías 29:11 bidxinni lainy xcalnabani. Cú náni: «Portín naʼ nantzaya pensary ni napa par lóoto, ngú ná Jehová, xpensari nacni par guiguaʼto goxt diti par gonyni mal lóoto, par tzoʼ ni guicaʼto ló dzú ni sietra né par gapto esperanza». Gosaló buni crer que labúu guibani ló toib Gudxlio móz (Salmo 37:29).

Testigos xtuny Jehová godabioyibu naʼ. Primer buelt ni goyaʼya xireuniónyibu bidudi cuent que nacyibu buñtzay né natzaay xcalrrienyibu. Guiráyibu galán rooyibu diitz (Juan 13:​34, 35). ¡Sacró godabioyibu naʼ diti xomod guidaʼ ro goyoʼya! Testigos diti buny juzgaryibu mod bibani. Binladxyibu naʼ por ngú goleʼyibu xtiempyibu par gocnéyibu naʼ. Gosaca suusi ñoʼya lad toib famil rodann.

Órni bisudi la Biblia, bidudi cuent que non natzaʼya mod nabani par labúu nasoba ni rony mandary Dios. Nigolú gosac nagana nasiana de nagoba gues. Láaca bidudi cuent que tipnés música biscuanyni ló gan de nagoba mariguan stoib, por ngú gosalóya bicadiaga stipnés música, ma diti goyaʼya lanii nili saʼ, ro goona que labúu ñeʼya alcohol. Né biyobi ni ñac ximiga, buñ ni labúu ñacné naʼ (Proverbios 13:20).

Par ló dzúcu, Tony láaca ma casuidy la Biblia né testigos xtuny Jehová. Laʼga carexa galrranabdiitz ni napbu de la Biblia, bidudybu cuent que ni casuidybu nigolúni. Bisiambu guirá ni bunybu, bisiambu guirá ximigbu, ma diti gócbu buñ gobáan nili godóbu mariguan. Bidudydo cuent par labúu ñonydo xchiin Jehová mod raniiny láabu non ñonydo galtzeʼel, né modreʼ labúu naguaʼ xiindo sacró. Por ngú íz 1982 bunydo galtzeʼel.

Rasetnaladxi biyobi ló revistas Guiich ni caniʼ né ¡Despertad! * experiencias de buñ ni labúu bisian cós mal ni goniiny naʼ nasiana. Guirá ndeʼ buny animarni naʼ; bidudyni fuers naʼ par diti nareʼgana. Guirá ór gonaba lóo Jehová diti naxacladxbu né naʼ. Tony né naʼ goyonisdo xomod testigos xtuny Jehová ló beʼo july íz 1982.

Ni ma naʼca ximig Jehová ngú bilaa naʼ. Tony né naʼ bibiʼdo ximod gon Jehová lóodo órni cualódo galnagan. Ma bisuidydo gapdo confianz lóbu órni cacalódo galnagan né guirá ór radudydo cuent que ranbu xfamildo (Salmo 55:22).

Nigolú rabaladxi que labúu gocnédo xiingaʼndo né xiindzapdo par gacyibu ximig Jehová. Scúca, rabaladxi que guirá xiaga cayimbuyibu Jehová más.

Ma diti rareʼ xcaʼala goxin portín, ma diti roni pensary xi gac ló dzú ni sietra nili roni pensary ló galgoity. Tony né naʼ nodieʼdo cayonydo xchiin Jehová, guirá xomal riguendo congregaciones de testigos xtuny Jehová par labúu gony animardo xhermando. Rony compañerdo layibu par guisuidyibu buñ, pal napyibu fe lóo Jesús, láaca labúu sabanyibu tipzó.