Órni buñ rotzña, rasaló rap xidal clas galnagan. Portín gadzé mod nac xpensaryibu, gadzé mod rasacyibu né diti toibsi mod bisniʼs bixiosyibu layibu. Láaca sigory guirá galnagan reʼ rieedni de stoib lad o cós ni diti cabés buñ.

Labúu gonylo pensary que más galán guialadxlo galnagan ni cadudylo lóo, per la Biblia ná que non guicalólo láani (Mateo 5:23, 24). Labúu guiguaʼlo goxt né tzeʼel lo pal rasoblo xilitz la Biblia.

NI NÁ LA BIBLIA: «Noʼ toib tiemp [...] par guiniʼ buñ» (Eclesiastés 3:1, 7). Goleʼ tiemp par guiniʼlo xí galrradíil noʼ. Góoch tzeʼel lo xí rasaclo, xí ronylo pensary de láani né diti guiatzladxlo. Guirá ór goniʼ por cós ni nigolú né tzeʼel lo (Efesios 4:25). Ná pal cadzuitzlo buny guantary né diti guininálo. Órni buñ raniʼ nadadiguieʼ ndeʼ labúu racaa par diti tzoʼ galrradíil (Proverbios 15:4; 26:20).

Pal diti ronylo pensary toibsi mod né tzeʼel lo, buny por gaclo natzaayxat; gondxiʼ né gop respet láabu (Colosenses 4:6). Biyopy mod cuéxalo galrradíil ni maca, né diti guisian guininéto saʼto (Efesios 4:26).

NI LABÚU GONYLO:

• Golaʼij toib ór par guiniʼto xí galnagan noʼ

• Órni tzeʼel lo caniʼ, diti néca looy guiniʼlo. Láaca sadxin ór guiniʼlo

NI NÁ LA BIBLIA: «Colgap galrronladx buchto, colgonyxiroʼ saʼto, non guisanirto gonyto láani» (Romanos 12:10). Rasacgoluʼ que guicadiaglo né gonylo por guienlo xi ni rasac tzeʼel lo, raquiin tzoʼlo xalagarybu né gaclo buñdxo (1 Pedro 3:8; Santiago 1:19). Diti gonylo sani cacadiaglo tzeʼel lo, órni labúuni bisian ni cayonylo né bicadiagtzay láabu o gonabdiitz láabu pal labúu gooyto diitz stoib ór. Pal rabiʼlo tzeʼel lo xomod xcompañerlo diti xomod xi enemiglo ndeʼ sony que «diti ni maca guidzuitzlo» (Eclesiastés 7:9).

NI LABÚU GONYLO:

• Bicadiag ni caniʼ tzeʼel lo ná diti rioladxlo láani

• Bieen xí láani nainy tzeʼel lo gaiby looy. Bibiʼ xí raduidy diitz lóbu né ximod raniʼbu

NI NÁ LA BIBLIA: «Noʼ galnasác ló nitisi dxiin nadip, per buñ ni nosi raniʼ diti racaʼ xitcal» (Proverbios 14:23). Diti nosi guiniʼto ximod cuéxato galnagan xalagary ngú colgony láani. Sigory raquiin gonylo xtem, per pal ronylo láani sacaʼlo galnasác (Proverbios 10:4). Pal guiropcato ronyto dxiin toibsi, sacaʼto «galnasác por dxiin nadip» ni ronyto (Eclesiastés 4:9).

NI LABÚU GONYLO:

• Colgony pensary xí cós labúu gony cada toibto par cuéxato galnagan ni napto

• Cada tidxó tiemp colguininé saʼto balac cós ni ma goniʼto gonyto ma bunyto