Bambata pai nga gi rengo re ima rengba ka fu wasa foro: Mbori nabi agu arungosiro abi du rogo zegino areme, na ko naida ka mangapai tipaha. (Atambuahe 72:13, 14) Ko ima kidohe rogo Fugoko yo nga Ziazia Kekeapai nga ko nika fu “ongoda” fu agu aboro nambu be agberãngbi. Ti gini regbo? “Rago yugo Gbia Yesu ngbangbaturũ yo na amaraika gako tandu . . . ko aíra bape fu agu yo aina nga Mbori ya, na agu yo agia nga sangba wene pangbanga nga ga gaani Gbia Yesu ya.” (2 ATesaroniko 1:7, 8) Gi rago yugo Yesu re nika manga ku mbatayo ti gu regbo Ziazia Kekeapai ayambaha nga “gu vura nga ga gu bakere rago nga ga Mbori, nga gu ko du na tandu apai dũ,” du kura rimoho nga Aramegido.—Yugoti 16:14, 16.

Rogo gu vura nika manga ku mbatayo re, Mbori amanganga sunge na aboro tipa ka sovura kuti gbegberẽ apai te, ono ko nika mangasunge na Wiriko nga Yesu Kristo gbiati agu aboro nga atoro du na bakere ome tiyo. Agu abasovura nika ye ngbangbaturũ yo re nika nyasariipa arungosiro dunduko.—Yesaya 11:4; Yugoti 19:11-16.

Da ku areme, ga Mbori bipai tipa vura aˈarianga tihe te. Ko nabi vura kindi ni wene gene tipa ka nyasariipa arungosiro na gbegberẽ apai. Ono a wa si adu bakuru kusayo, kina Mbori du na rengo beko ka sia gu regbo si aida i so gu vura re ti ni na gu boro si aida ni soho. A wa bi anihe, Mbori ima diaberã nga gu vura du tipa ka nyasariipa gbegberẽ apai dunduko na ka irobape tipa agu aboro i arungosiyo, si nga gu vura  nika manga ku mbatayo na Wiriko nga Yesu Kristo du nika soho. Gipai re nayugo gupai nga Mbori aidanga na agu avura i asoho areme te, ka si vura du vuru nga ndu gupai i soho ti ni nangera wa si ni wenehe.

Ka yugoho na kpiapai: Mo berẽnga pa awirina ue tona ka takpata dagbatiyo mbu bayo kusayo. I ki rugusi kpata tooni tipa ka yamba bayo rogo terefuni. Guni ki pe gupai nga gu kurani ni tona kpata ono guni ki ya gu kurani du ninaarungosi ni. I dunduko nazungodi bayo kini moi bangiriyo nga ko nika ngbe angbe nayo rogo gu tagbagapai re. Ono tie tingbafuo bayo gi gupai du ngbayo dunduko, ko ki pe gupai fuyo nga i mbu kpata ka pidoko daho ko ka yego ni ku kporo ka mbakada gupai re. Tipa wiri bete regbo, agi awirina re ki tona ka pidoko. Ono tie, ka si aimanga ya i ki tona ka takpata berewe. Ho bayo nika yego ni ku kporo, rago angbanga tiko na yo te na ko ki fu mbusa fuyo dunduko mbiko i abasasangbako.

Areme, agu aboro nasovura dagbatiyo nazungodi Mbori tipa ko undoyo. Ono Mbori arimisongo tiko ku rogo agu avura namanga areme te. Kuba gure, Fugoko nga Ziazia Kekeapai napehe ziazia nga: “Ka oni karaga nga gbegberẽpai fu boro ku ba gbegberẽpai wa sa ya,” na “ka oni mangi nga boro ti pai fu roni ya.” (ARomo 12:17, 19) Kurigure, ko ima pe gupai fu aboro nga si naida i “sungudi ko zezeredi” tipa ko mangipai, na ko nika mangaha amanga ti regbo Aramegido. (Atambuahe 37:7) Ho aboro aasungudo nga Mbori ni ya tipa ko mangipai na i ki tona ka sovura, ko abi ngbatunga agu avura re ni gu mangaapai nga ga gbangbati na ka si afunga ngbarago fuko ya. Sidu, Mbori nika yugo gako zinga na ki nyasiriipa gu kpakaraapai nga ga aboro bara sa kindi ti regbo Aramegido ‘ni manga ko pai, vura nyasi digida kpotosende no.’ (Atambuahe 46:9; Yesaya 34:2) Nirengo, Aramegido nika ngia gu vura nika nyasariipa avura dunduko.

Pa nyasariipa avura nika ngia maku sa dagba agu amaku yo ga Mbori Kindo nika ye na ni. Yesu afura tipa gu Kindo re rogo gako kparakpee yo badungu aboro naima inoho naya: “Ga ngbi yé, ani mángi rogo kpotosende wa mo akpi nyemu he, wa du he ngbangbaturũ yo.” (Matayo 6:10) Ga Mbori Kindo nika nyasariipa avura dunduko na ki nyasiriipa tara vura du a nga gbegberẽ apai. * (Atambuahe 37:9, 10, 14, 15) Si airiwongo te nga, apekefuo Yesu napido agu amaku ga Mbori Kindo nika ye na ni.—2 Petero 3:13.

Ono tie bagizo regbo wai si aida ani sungudi ga Mbori Kindo si nyasiriipa ambugo, arungosiro na gbegberẽ apai? Agu asangbaanebi nga ga Ziazia Kekeapai nga gu nadigisotihe nayugoho ayugo nga ani naraka “rogo kusa rago” watadu yangara areme nga ga gi sino mangaapai re. (2 Timoteo 3:1-5) * Barambeda, Mbori nika nyasariipa gi yangada areme re vurube gu vura nga Aramegido.

A wa ani ni bihe mbata kusayo, agu aboro nika kpi rogo gu yangara vura re nika ngia agu aboro “agia nga sangba wene pangbanga nga ga gaani Gbia Yesu ya.” (2 ATesaroniko 1:8) Ono oni tingidi gupai nga, rago angbanga ti Mbori na kpio boro kodihe na gbegberẽ boro te. (Yezekere 33:11) Mbiko gupai nga “ko akpi nga nyemu aboro kpi” rogo gi yangara vura re te, ko naida gu wene pangbanga du tipa gaani Gbia nga Yesu du ni tungusi tungusihe “rogo zegino dunduko mbiko ndika fu arikaaboro dũ” mbata fu digido zegino da. (2 Petero 3:8, 9; Matayo 24:14; 1 Timoteo 2:3, 4) Nirengo, vurube gu tungusapai aDezire Yekova amangaha rogo zegino dunduko, aboro areme na momu tipa ka ino Mbori na ka gia sangba gu wene pangbanga du tipa Yesu, na ka raka ka bi gu uru vura nika dunga ti ni berewe ya.