Gu vura nga Aramegido narukuba gu yangara vura nika manga dagba gu zogarago nga aboro na Mbori. Zavura awere, agi azogarago re gbiati agu aboro nasongodaha nasoga Mbori na i aidanga ka du kutii gako pagbia te. (Atambuahe 2:2) Gu vura nga Aramegido nika nyasa riipa gu zogarago nga ga aboro kusayo.​—Daniere 2:44.

 Gu fugo nga “Aramegido” i mangisunge na ni gbua bara sa rogo Baibiri rogo Yugoti 16:16. Gu sangbanebi du rogo Yugoti nayugo gupai nga rogo “gu ba i niya ti ni rogo pa Ebere yo, Aramegido,” “abakindo zegino dunduko” nika dunguratiyo “sa gu vura nga ga gu bakere rago nga ga Mbori, nga gu ko du na tandu apai dũ.”​—Yugoti 16:14.

 Ada nika sovura ti regbo Aramegido? Yesu Kristo nika ngbe kumbatayo fu gu riivura nga ga Mbori du ngbangbaturũ tipa ka diabe avura Mbori. (Yugoti 19:11-16, 19-21) Agu avura Mbori re nakoda agu aboro dunduko nasoga Mbori na nabisirapa ko.​—Yezekere 39:7.

 Gu vura nga Aramegido re Middle East yo du si nika manga ni nzunzu? Oó. Kuba gu nga si mangi rogo bangisa ba, gu vura nga Aramegido nika manga rogo zegino dũ.​—Yeremaya 25:32-34; Yezekere 39:17-20.

 Rogo gu fugoyo nga Aramegido (pa-Ebere, Har Meghiddohnʹ), nga “Gangara Megido.” Megido angia kura dagbarago sa rogo gu ringara aYisaraere nandu mbata. Apangbanga ima fura tipa gu kere nyanyaki avura i asoho rogo gi rago re, kodihe na gu du paha ni kekehe rogo Baibiri. (Abasapungbanga 5:19, 20; 2 Abakindo 9:27; 23:29) Ono tie, Aramegido ayugongo pa ba nga gu du mbembedi na gu rago nadu bakuru kusayo i anaayambaha nga Megido te. Bagangara ho du yo a te, zavura gu kpasakpasarago du rogo ga Yizerere dagbarago re arengbanga ka rengba na gu bange aboro dunduko nika dunguratiyo ka sovura kuti Mbori te. Kuba gure, Aramegido narukuba wai rikaaboro rogo zegino dunduko nika dunguratiyo tipa ka sovura kuti Mbori.

 Apai nika du wai ti regbo gu vura nga Aramegido? Wa vura duhe nga ani ainongo wai Mbori nika mangasunge na gako ome te, ko nika duadu na agu aũvura duwa ngbatunga gu ko amangisunge na ni mbata kusayo​—morogumba, bazigizo, kere nana mai, we na baruti, ikpirogumba, gbiati akaza. (Eyobo 38:22, 23; Yezekere 38:19, 22; Abakuka 3:10, 11; Zekaraya 14:12) Ti regbo baguzoro, bete avura Mbori kinaho nika imo tiyo dagbayo, ni yangaraha tie, i nika ye ka ino gupai nga Mbori du nasovura kutiyo.​—Yezekere 38:21, 23; Zekaraya 14:13.

 Ya mo Aramegido nika ngia digido zegino? Digido gaani kpotosende nika ngiaha te, mbiko kpotosende nga nyenye kpurani. (Atambuahe 37:29; 96:10; Batungusipai 1:4) Kuba gupai nga si gbarasipa aboro dunduko kusayo, Aramegido nika batasa aboro mbiko “rimbasa aboro” nga ga Mbori amoyambu nika bata abata.​—Yugoti 7:9, 14; Atambuahe 37:34.

 Kupati gu nga fura tipa kpotosende, rogo Baibiri, gu fugo nga “zegino” ti kura aregbo, si naru aru kuba gu gbegberẽ aboro namanga gupai Mbori aidanga ha ya. (1 Yoane 2:15-17) Rogo gi bangiriba re, Aramegido nika ngia “digido zegino.”​—Matayo 24:3, King James Version.

 Ti gini regbo Aramegido nika manga? Ho Yesu aafura ni tipa gu “bakere gberãngbi” nga gu nika digo na gu vura nga Aramegido, ko aya: “Ono boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba.” (Matayo 24:21, 36) Wa vura duhe wo, Baibiri nayugo gupai ayugo nga Aramegido nika manga ti regbo ye Yesu nga gu aboro nikaa bingo ko ni bangirise ya, nga gu natona rogo 1914.​—Matayo 24:37-39.