AGU aKristano naadu rogo bambata sa kama agarã amangi bakere ome ka gbia badungu aboro na gu “wene pangbanga nga ga Ngbi.” (Mt. 24:14) Agu akurayo adu kinaho naandu ku rogo kura aringara. Ni kpiapai, gu mokedi nangia Pauro andu ku rogo gu rago du gu ringara nga Turkey awere rogoho na ki tungusipai yo ni bakerehe ti regbo gako nunguro ni mokedi. * Fuo agarã 2,000 kusa, rogo 2014, i amangi kparakpara tua nga ga tungusapai berewe Turkey yo. Tipagine i ambakadi pa gu tua re ti ni? Ada namangi gu tua re?

Bange abatungusipai Turkey yo ima susa 2,800, ono bange aboro dunduko rogo gu ringara re nga amirioni 79. Gere nayugo gupai nga batungusapai 1 na aboro beni 28,000 si aida ni tungusipai fuyo. A wa rengbe oni ka berãha, abatungusipai tungusipai gbua fu bete aboro rogo gu ringara re. Gu ndupai i amangi gi kparakpara tua nga ga tungusapai re ti ni angia ka tungusapai fu badungu aboro vuru umba regbo yo. Awirina nga akumba na adee bangeyo adu wa 550 nga aguyo naape pa aboro Turkey, aye rogo kura aringara ku Turkey yo ki tungusipai na agu awirina nga ga gu ringara re yo ti regbo gu tua re. Sangbana gu tua re angia gine?

I amangi bakere dezirepai. Dungurati sa Istanbul yo akepai ki ya: “Ho aboro abi rani ni, i asanahe nga: ‘Kparakpara bakere dunguratise kinaho namanga ane? Ani nabi aDezire Yekova rogo aba dunduko!’” Dungurati sa rogo gu gbata nga Izmir akepai ki ya: “Kumba sa naamangasunge rogo ba rugo atorombiri andu fuo bakumba sa nga ga gu dagbarago re ki sana ko nga, ‘Ginipai namanga? Oni ima kiiso gaoni sunge tungusapai?’” Nirengo, badungu aboro aima inopa gu tua re.

Agu awirina naaye rogo kura aringara re aima gbia bakere ngbarago ti gu sunge tungusapai re. Steffen, nga guko naaye Denmark yo, aya: “Aʹuru dunduko mi arengbe ka tungusapai fu agu aboro naagianga pa Yekova mbata ya. Mi aima bi tire nga mi aayugo rimo Yekova nzunzu fu aboro.” Jean-David nga guko naaye France yo akepai ki ya: “Ani anaatungusapai rogo bangisa bangiri gene tipa asaa. Si aima du ni riko wenepai! Badungu aboro aainongo aDezire Yekova te. Badungu akporo ani anirengbe ka tona fugo, ka yugo vidio sa dagba gaani avidio, na ka fu waraga fu irakporo rogoho.”

 Agu awirina naadu 550 re agamu awaraga nga 60,000 fu aboro vuru aposo yo ue gbua! Nirengo, bakere dezirepai aima manga ti regbo gu tua re.

Kakaka nyemu sunge tungusapai asono. Gu kparakpara tua re aima du na bakere maapai kurii agu awirina nga ga gu ringara re. Badungu aboro atona berãpa mangasunge Kindo ti aregbo dũ. Bange agu abazakigene natungusapai ti aregbo dũ Turkey yo asono na 24 rii kama vuru agu adiwi yo 12 naadu tingbafuo gu tua re.

Agu awirina naaye rogo kura aringara apeke pa wai gu tua re adu na maapai kurii gayo sunge tungusapai zavura ho i aga ni ku rogo gayo aringara. Wirina nga guri naaye Germany yo du rimori nga Şirin, akepai ki ya: “Si taata fu agu awirina du Turkey yo i tungusipai ho i ambakadanga tiyo ambakada ni tipaha ya. Zee namanga re ni kerehe ka tungusapai ho mi ambakadanga tire ni tipaha ya. Ono gu kparakpara tua re aima undo re, mbiko gu kpiapai nga ga agu awirina du rogo gu ringara re, na bakere kparakpee, mi arengbe ka manga gupai mi aarengbanga ka manga mbata ya. Mi aatungusapai kini kparaka atrakte bangiri agene! Zee amanganga re awere wa gu naadu mbata te.”

Johannes nga guko naaye Germany yo aya: “Mi aima wirika badungu apai ti gimi sunge tungusapai. Agu awirina du Turkey yo naida nzunzu ka yugo rengo fu badungu aboro. I namanga dezirepai ti ai gu regbo i agbia momu. Mi adiberã kaa manga kina gu bangisapai re ho mi ayego ni ku Germany no. Na awere, mi natungusapai nzunzu fu dungu aboro kisusi gu nidu mbata.”

Zeynep nga guri naaye France yo aya: “Gu tua re aima du na bakere maapai kurii gimi sunge tungusapai. Si aundo re mi du na bakere wingbaduse na ki du na bakere kido kuti Yekova.”

Abatungusipai aye kadu mbembedi na akurayo. Gu nyemuse gbiati kodatise naadu dagba awirina nga aguyo naaye rogo aringara ni bakiakia aima du na bakere maapai kurii. Jean-David i nipe pako mbata kusayo aya: “Awirina aima dia rani kugume.” Ko ape gupai berewe nga: “I abi rani ni abakureayo na ni papara gayo aborokporo. I adi rani kugume ku rogo akpuyo. Mi aima ino nga ani nga awirina sa rogo zegino dunduko; mi aima gedaha tipa dungu aregbo rogoho gaani awaraga. Ono gere nangia gu regbo mi abihe ni tire nzunzu. Mi abihe ni pa bakere momu kadu ni boro sa dagba  ga Yekova aboro yo, na mi natambua ko tipa gi bawene momu re.”

Claire nga guri naaye France yo aya: “Si ngia ani aye Denmark yo, France yo , Germany yo, watadu Turkey yo, ani adu dunduko ni aborokporo sa. Si adu wa ka i ya Mbori aima dia angbanda aringara dunduko kusayo.”

Stéphanie nga guri naaye France yo aya: “Gu kparakpara tua re ayugu gupai furani nga anga sino mangaapai watadu fugo du nakoda rani te, ono gaani nyemuse tipa Yekova du.”

Dungu agu awirina naaye rogo kura aringara re atona ka berã pa gate ku Turkey yo tipa ka songoda gu bakere sunge si aida i mangihe kindi yo. Bete aguyo ima ga koyo. Ani natambua agi awirina re bakere gbe.

Ni kpiapai, oni berẽnga pa umba badona nga gu naadu na abatungusipai rogoho 25 rogo kura tuturũ rago. Tipa dungu agarã, bakumba adu yo gbua sa. Oni bingo gu ngbarago agu abatungusipai re adu na ni rogo 2015, ho agu aboro nandu kaa tungusapai rogo agu arago du na bakere zingo rogoho aye ni Germany yo na Netherlands yo ka songoda yo!

Ginipai agi awirina ga ku Turkey yo re nga aguyo naima du yo tipa bete regbo apehe tipa gayo raka yo? Nirengo, ti kura aregbo si ima du na akpakarapai, ono Mbori nafu bakere amaku afu fu agu awirina naga ku rogo agu aba du na bakere zingo rogoho. Oni bingo agu apai akurayo nagumbaha:

Federico nga gu wirina naaima manga rogatise garãko naima susa 40, nga guko naaguari Spain yo ka ga ku Turkey yo aya: “Zanga du na bakere aũkumuko bere mi naazio tire kutini naundo re mi du na bakere regbo bere, na si nambugene fere mi naamaa berãre sa agu apai nyakipaha gbe.” Ya mo ko rengbe ka ngarasa kura aboro i mangi gi ngbatunga sunge re? Ko aya: “Ii, nirengo! Ho mo aga ni ku rogo kura ringara na gu ndupai nga ka undo kura aboro i ini Yekova, gure nga mo namaa tiro ku beko yo nzunzu. Mo nabi gupai nga Yekova nangera fuoro kisusi gu mo naabihe mbata.”

Rudy nga wirina sa naaye Netherlands yo garãko naima mbeda kuti 60, nga guko naaima manga rogatise aya: “Ani nagbia bakere ngbarago ho ani amanga sunge tungusapai ni rogo gu ba du na bakere zingo rogoho, na kini yugu rengo fu gu badungu aboro naagianga  paha mbata ya. Bi gu ngbarago du aboro na ni ho i adia rengo ni kugume ni gupai nafu bakere ngbarago fu boro.”

Sascha, nga wirina sa naaye Germany yo garãko naima susa 40, nga guko naaima manga rogatise aya: “Agu aregbo dunduko du mi gene tungusapai yo, mi nagbia aboro nga aguyo naagianga rengo mbata no ya. Fu momu fu ngbatunga agu aboro re i ini Yekova nafu bakere ngbarago fere.”

Atsuko, nga wirina sa naaye Japan yo du garã ri wa 35, nga guri naaima manga rogatise aya: “Mbata kusayo, mi aaida gupai nga Aramegido ye ni ipo. Ono fuo ani ga ku Turkey yo, mi nafu tambuahe fu Yekova tipa gupai nga ko kindi na zerangbaduse na aboro. Ho mi abi wai Yekova anungusa gako apai ni, si nasa re mi du na bakere nyemu kadu mbembedi gbe na ko.”

Alisa, nga wirina sa du garãri naima susa 30 nga guri naaye Russia yo aya: “Mangasunge fu Yekova rogo gi ngbatunga sunge tungusapai re ima undo re mi hia wene asino Yekova dunduko.” (Tam. 34:8) Ri ape kurapai nga: “Anga Yekova nga kina Buba sa te, ono ko a nga mbembedi Bakureami, nga guko mi aino ko gbe rogo dungu apai yo. Raka re ima hi be weneapai, wenewene apangbanga, gbiati dungu amaku!”

Mbiko gu kparakpara tua nga ga tungusapai namangi Turkey yo re, badungu aboro agi wene pangbanga. Ono wa vura duhe wo, bakere dagbarago kinaho yo i ata tungusanga pai rogoho ya. Agu awirina ga ku Turkey yo naagbia aboro na aʹuru dunduko nga aguyo naagianga pa Yekova mbata ya. Ya mo mo naida ka mangasunge rogo gu ngbatunga dagbarago re? Kangia wo duhe, ani nangarasa ro nga: ‘Mo tumba nga bangiro, ka ngera nga ku ati yo, si ima vura avura wa ka i ke he ake.’ (Yo. 4:35) Ya mo mo rengbe ka undo rogo gu papara zegino nga gu du na agu ati rogoho naima “vura avura wa ka i ke he ake”? Kangia wo duhe, mo tona manga apai awere nga gu rengbe ka undo ro mo da ti gu sasa re. Gu rengo duho nga: Kiiso gamo sunge tungusa wene pangbanga da ku “digida sende yo” nika ye na gu bakere amaku foro ka i aringbisanga ha na kurahe ya!—Amo. 1:8.