‘KII zuzu ati, abamangisunge du ni umba yo; oni kpári ke fu Gbia ati ko kedi abamangisunge ku rogo gako ati.’ (Rk. 10:2) Agi afugo Yesu agumbaha agarã wa 2,000 kusayo re nasakapai wenengai tipa gupai du Myanmar yo areme. Wai duhe wo? Abatungusipai gbua 4,200 Myanmar yo natungusa wene pangbanga fu aboro du bangeyo nga amirioni 55.

Ono tie, “Gbia ati” nga Yekova, ima zio ngbadu akama awirina yo rogo aringara ni bakiakia, na i ima ye ku rogo gi ringara du rogo gu papara Asia du bangbanda sudiyo na uroyo tipa ka undo sunge ke ahe rogo toro yo. Ginipai naasa yo i mbu gayo ringara ka ye ku rogo gi ringara re? Wai du i agbia undo ka guari rogo gayo ringara ka ga ku Myanmar yo? Na gini amaku i agbiaha? Ani bingoho.

Bete agarã kusayo, imawirianya aba Kazuhiro, nangia bazakigene Japan yo, he ki ma ko, na i ki ndu na ko ku bambungua yo. Munganga ape gupai fuko nga ko mangi garã ue zanga kama tarambiri. Gipai re aima zigbä Kazuhiro. Ko asana tiko nga, ‘Wai du mi nikaa mangasunge abazakigene kindi, nga gu sunge mi nakpinyemuhe?’ Ko amangi kparakpee kakaka, ki zungodi Yekova ko zaki gene fuko ko naandu kindi kumbatayo kaa mangasunge ni bazakigene.

Kazuhiro aya: “Fuo diwi sa kusa, bakureami nga guko naamanga sunge tungusapai Myanmar yo agi pa gu kpakarapai mi adu rogoho. Ko ayambu re ki ya fere wẽ: ‘Aboro nata Myanmar no gbe na tarambiri tinda aboro ti marã. Ka mo ye kono, mo ima rengba kaa ndu kindi kumbatayo na gamo sunge tungusapai zanga mo naagbe tarambiri agbe!’ Mi asana gimi munganga singia gupai namanga re rengbe ka mbugene fere mi ndu ku Myanmar yo. Kina ngbare nazere nga gu munganga re aya: ‘Munganga nga guko nahusa agu akaza nga ga berã boro nika ye Myanmar yo ku Japan no barambeda. Mi nika yugo ro ayugo fuko. Ka imawirianya mangi ro berewe, ko ima rengba ka undo ro.’ Mi abi gu karagapai munganga afuhe fere re nga si angia karagapai be Yekova.”

Kazuhiro akedi e-mail nibasa fu gu be-basunge nga ga Myanmar ki pe gupai nga ko na diako na nyemu ka mangasunge ni abazakigene rogo gu ringara re. Fuo areme gbua bisue kusa, be-basunge akaragapai ki ya, “Oni ye, ani naida badungu abazakigene!” AKazuhiro na diako nga, Mari, abagi gayo atarambiri, i ki kusi awaraga ida pa rimo boro ku rogo kura ringara, na i ki tumo marã gayo nduge na tiyara (avion) ku rogo gu ringara re. Areme, i na ngbarago rogo gu badona nga ga fugo-ni-bee du Mandalay yo. Kazuhiro aya: “Ani nabihe nga gipai re ima nyakasa gaani idapase kuti gu ga Mbori kidohe du rogo Atambuahe 37:5, nga gu naya: ‘Mo fú ga pai ku be Yekova; ki kida kuti ko a, ko amánga pai tipa ha.’”

Rogo 2014, agu aDezire Yekova du Myanmar yo adu na gu momu nga ga manga kparakpara bakere dunguratise. Badungu aboro aye rogo kura aringara kadu pati ni. Boro sa dagba agu aboro naye tipa gu kparakpara bakere dunguratise re, angia wirina naye Amerika yo nga Monique du garãri 34, ri aya: “Fuo yego mi ba gu bakere dunguratise yo re, mi amangi kparakpee fu Yekova tipa gupai mi aaida ka mangaha berewe rogo gimi raka. Mi aima fura a na avungure tipa gimi asasa nga ga toro. Ani abi gupai nga si naida aida mi karaga tire ku Myanmar yo, ono si aima dia regbo na bakere kparakpee mbata fu mi mangi yangara diaberã.” Monique asaki ndu gupai si amangi ti ni wo.

“Yesu angarasi apefuoko nga i ‘sungu mbata ka wisigo pa marã ka ngia u rengbe arengba.’ Sidu, mi asana tire nga: ‘Ya mo marã bere rengbe arengba tipa ka ndu? Ya mo mi adu na rengba ka undo tire zanga gupai nga kaa dia bakere regbo kuti sunge marã rogo gu ringara re?’” Ri aya: “Mi aini gupai ni ipo nga marã aadunga bere rengbe arengba tipa ka ndu ku rogo gu papara zegino re te.” Sidu tie, wai du ri arengbe ka ndu ku rogo gu ringara re?​—Rk. 14:28.

Monique aya: “Rogo kura uru sa, gimi nairasunge aya ri naida ka bire. Mi aagunde agunde kini berẽ gupai nga i nika mbure ambu ti sunge. Ono kuba gure, gimi nairasunge atambua re tipa gimi wene sunge. Fuani, ri ki pe gupai fere nga ri ima manga mbakadapai tipa ka fu kura marã fere tipa gimi nyanyaki sunge, na si aye kadu nga kina boro gu bakio marã re mi aaidaha!”

Natona rogo Banduru 2014, Monique naamangasunge tungusapai kindi Myanmar yo. Wai du ri abi gari sunge tungusapai ni gu boro du rogo gu ba du na bakere zingo abatungusipai rogoho? Ri aya, “Mi na bakere ngbarago tipa kadu ane. Mi nawisigo Ziazia Kekeapai na aboro biata. Boro sa dagba agu aboro yo mi awisigo Ziazia Kekeapai na yo na garã ni 67. Ri naafu sene fere ti aregbo dũ na mongo kpakpuri yo na kini dungo re wenengai. Ho ri aini gupai ni nga rimo Mbori nga Yekova, ri akpari ni aume. Ri aya: ‘Gere nga bambata regbo fere rogo gimi raka yo mi gi gupai nga rimo Mbori nga Yekova. Mi nga kuru unvuru foro, ono mo yugu yangara nyanyakipa pai fere rogo gimi raka yo.’ Nirengo, mi aima ye ki kpari ni aume a. Ngbatunga agi apai re nasa raka boro tingba sunge tungusapai rogo gu ba du na bakere zingo abatungusipai rogoho, si du na bakere ngbarago.” Bambeda kusayo, Monique agbia gu momu nga ga ndu tipa Gu Sukuru Du Tipa Abatungusipa Kindo.

Gu kurapai naasa kura aboro i ye ku Myanmar yo angia gu pangbanga naadu tipa gu ringara re rogo gu Yearbook nangia ga 2013. Wirina garãri naima susa 30 du rimori nga Li aima tona niraki rogo gu Papara Asia du Bangbanda Sudiyo na Uroyo. Ri aamangasunge marã ti aregbo dũ, ono gu pangbanga naadu rogo gu Yearbook re afõngbaduriyo ri berẽpa mangasunge tungusapai Myanmar yo. “Ho mi andu ni rogo 2014 ku Yangon yo tipa kparakpara bakere dunguratise, mi agbia arogotise nga aguyo naamangasunge ni agu abatungusipai du rogo gu ba du na bakere zingo abatungusipai rogoho nga gu du rogo gu dagbarago i ape pa aboro China rogoho Myanmar yo. Wa duhe nga mi nape pa aboro China ape, mi adiberã ka ga ku Myanmar yo tipa ka songoda gu badona nga ga pa aboro China du yo. Mi agbia Monique yo, na ani ki ga na ri ku Mandalay yo. Yekova aundo rani ani gbia sunge yugopai rogo bangisa sukuru sa nga gu ani anaamangangaha na aʹuru dunduko ya, na ani agbia ba mbembedi na gu sukuru re ani aaraka rogoho. Wa vura du rago no ni fofoihe na kura akpakarapai, mi nagbia ngbarago agbia ti gimi sunge tungusapai. Agu aboro du Myanmar no naraka taata raka, ono i ni zezeredi yo na kidu na nyemu ka dia regbo ka degatuyo kuti wene pangbanga. Si nipa ngbarago ka bi wai Yekova aipiso sunge tungusapai. Mi ima ida kuti gupai nzunzu nga Yekova du kpinyemu gupai nga mi du Mandalay ane.”

Badungu agu aboro namangasunge tungusapai rogo agu aba du na bakere zingo abatungusipai rogoho ima bi gu ome du ti kparakpee. Mo bingo gupai du tipa  Jumpei du garãko nga 37 gbiati diako nga, Nao du garãri nga, 35. I aima du mbata rogo gu dungurati nga ga fugo-ni-bee Japan yo. Tipagine i aga ti ni ku Myanmar yo? Jumpei aya: “Ani na diare aima du ti aregbo dunduko na gu sasa nga ga mangasunge rogo kura ringara rogo gu ba du na bakere zingo abatungusipai rogoho. Wirina ni kumba rogo gu gaani dungurati nga ga fugo-ni-bee naadu Japan yo aga ku Myanmar yo. Wa si avura du nga marã akiongo berani te, ani aima ye ki ga koyo a rogo Merekoko 2010. Agu awirina du Myanmar no adi rani kugume wenengai!” Wai du ko abi mangasunge tungusapai rogo gu dagbarago nga ga fugo ni bee du Myanmar yo? “Aboro no na bakere nyemupai. Ho ani naayugo agu avidio ni nga ga fugo-ni-bee fu agu airakporo nga irangbiängä, kina ngbayo ni naazera. Ani a na bakere ngbarago nga ani amangi diaberã ka ye ka mangasunge fu Yekova ane!”

Wai du aJumpei na Nao naagbia marã? “Fuo garã biata, ani aima mangasunge na gu marã naadu berani, ka marã akiongo berewe tipa ani tumoho tipa bambu rame rogo kura garã ya. Ani amangi badungu kakaka akparakpee na diare. Pai aye ka manga nga gu ani aaberãnga ha nga si nika manga ya, waraga aye be-basunge yo furani nga ani ndu ni kparakpara abazakigene tipa bete regbo! Ani adu na kido kuti Yekova, na ani ki bi gupai nga ko aambunga rani te. Ko aima digo ni ngerefuo rani rogo agene yo dunduko.” Bambeda kusayo, aJumpei na Nao aima ndu a tipa Gu Sukuru Du Tipa Abatungusipa Kindo.

Ginipai naafõngbadu Simone yo, nga wirina du garãko 43, ni boro Italy, gbiati diako nga, Anna, du garãri nga 37, ni boro New Zealand, i ga ku Myanmar yo? Anna akaragapai kuti gu sanahe re ki ya, “gu pangbanga naadu rogo gu Yearbook nangia ga 2013 du naafõngbadu rani yo!” Simone aya: “Si ni bakerepa momu kadu Myanmar ane. Raka ane ni taataha kisusi, na mi ima du na rengba ka dia bakere regbo kuti ga Yekova sunge. Si nipa ngbarago ka bi gupai nga Yekova nangerafuo rani wa ani atungusapai rogo gu ba du na bakere zingo abatungusipai rogoho.” (Tam. 121:5) Anna aya: “Mi na bakere ngbarago kisusi gu nidu mbata. Ani naraka taata raka. Mi nadia bakere regbo na kumbami, na ani ima ye kidu mbembedi na tirani gbe. Ani ima gbia vovo nyanyakipa abakure a. Aboro na iraira bipai tipa aDezire Yekova te, na aboro na bakere nyemupai rogo agu adagbarago nga ga tungusapai!” Ngba gini agene?

Anna aya: “Rogo kura uru sa, mi amangi dezirepai fu gude sukuru nga ga yunivasiti bangbeahe yo na ani ki mangi mbakadapai na ri tipa mi gbia ri berewe. Ho ani agbiatirani ni berewe, ri aye na nakureari. Ho ani agbiatirani ni berewe fuo gure, ri ki ye na kura akuari. Ti kura regbo kusa, ri ki ye na agu akurayo berewe. Mi nawisigo Ziazia Kekeapai awere na aguyo bisue.” Simone aya: “Agu aboro ani agbiayo gene tungusapai yo dawedawe na aboro na i na bakere nyemu ka inopai. Badunguyo du na nyemupai. Regbo berani ni bakerehe tipa ka ngerafuo gayo nyemupai dunduko te.”

Ono na ginipai tigaha du tipa agu adiandue si aida boro mangihe tipa ka diaberã ka ga ku Myanmar yo? Mizuho nga boro Japan aya: “Ani na kumbami nga Sachio, aima du ti aregbo dũ na nyemu ka mangasunge tungusapai rogo gu ringara du na bakere zingo abatungusipai  rogoho​—ono wari? Fuo geda ani gu pangbanga naadu rogo gu Yearbook nangia ga 2013 tipa Myanmar, agu apai ani agedipai tipaha aima zio ngbadurani yo na si ki sa gupai nga ani tona berã singia ani rengbe ka ga ku Myanmar yo tipa sunge tungusapai.” Sachio aya: “Ani adiberã ka ndu ka ta tipa poso sa vuru Yangon, nga bakere gbata sa Myanmar yo, tipa ka wisigo wai du gu rago re. Gu guru nunguro re afu gu kido furani nga si naida ani yego ku herẽ.”

Natona rogo 2010, Rodney na diako nga Jane, nga aboro Australia, garãyo naima susa 50, na wiriyo nga kumba nga Jordan gbiati wiriyo nga dee nga Danica, aima digo nimangisunge rogo gu ba du na bakere zingo abatungusipai rogoho Myanmar yo. Rodney aya: “Gu gomoro nga ga toro aboro adu na ni aima fõngbaduraniyo gbe. Mi ima rengba ka pe gupai fu kura boro nga i asadingo ka ye ka mangasunge tungusapai rogo ba wa Myanmar were.” Tipagine? “Gupai pa yego ani kono namangihe na gaani aborokporo rogo toro yo ima ngba kisusi! Badungu paranga aboro nadia bakere regbo kina kuti gayo aterefuni, arabia, asunge gbiati gu kuraapai. Awirani nadia bakere regbo kuti wirika vovo afugo tipa ka mangasunge na ni gene tungusapai yo. I naasada ka wirika wai ka sakapai na agu aboro ainongo pai wenengai tipa Ziazia Kekeapai ya na wai ka fu akaragapai ti regbo adunguratise rogo gu fugo i apehe rogo gi ringara re, na kura badungu apai kinaho a nga ga toro i amangaha.”

Oliver, nga wirina sa du garãko nga 37, nga guko naye Amerika yo, ape ndu gupai ko aya fu kura aboro ti ni i mangi gi ngbatunga sunge tungusapai re, ko aya: “Dungu aundo duti mangasunge fu Yekova rogo gu ba mo ainidonga tiro na ni ya. Guari kusayo rogo gimi ringara aundo re mi sonosi gimi kido kuti Yekova ka apai vura du wai vurũ. Mi namangasunge tungusapai na agu aboro mi aainongo yo mbata ya, ono ani ni kodikodi rani rogo idapase yo, na ngbatunga pai wa gure rengbe ka manga sa kina rogo ga Mbori riigbu.” Areme, Oliver na diako nga Anna, natungusapai kindi zaaza rogo gu dagbarago i ape pa aboro China rogoho.

Naatona rogo 2004, Trazel, nga wirina du garãri nga 52 ni boro Australia, aima digo nimangisunge tungusapai Myanmar yo. Ri aya: “Agu aboro rengbe agu apai du tipa yo ka mbugene fuyo i mangisunge tungusapai rogo gu ba du na bakere zingo abatungusipai rogoho, mi nape gupai fuyo nga i berãnga pa mangaha aberã. Mi ima bi gupai nitire nga ka mo du na nyemu ka mangasunge fu Yekova, ko nika fu maku afu kurii gu ome mo amangaha. Mi aainongo ho nga mi araka wa gere te. Si nga gu yangara raka du na dungu amosoro gbiati ngbarago rogoho ka mi arengbe ka berãpaha.”

Afugo agi awirina namangasunge tungusapai Myanmar yo re ngarasinga ro angarasa tipa mo berẽpa undo agu aboro du na wene ngbaduyo yo rogo agu adagbarago i ata tungusanga pai rogoho ya. Nirengo, agu awirina namangasunge tungusapai rogo agu aba du na bakere zingo abatungusipai rogoho Myanmar yo naapaa kuari niya, “Ani nahõpai bero, mo ye ku Myanmar no ka undo rani!”