Ra zidiʼdiʼ dxi jma nagana raca para stale binni ganna xii nga ni dxandíʼ ne ni cadi dxandíʼ. ¿Ñee zacaca riníʼ íqueluʼ la? Stale binni maʼ qué ruyúbicaʼ gánnacaʼ ni dxandíʼ, rinándacaʼ ni ná íquecaʼ ne ni runadiágasicaʼ. Ne para guiníʼcabe de ni cuzé’tenu ri’ la? bizá’cabe diidxa’ posverdad, a ne nabé caquiiñecabe ni yanna para guiní’cabe de xiixa ni cazaaca lu guidubi Guidxilayú: ma’ qué ganna binni xii nga ni dxandí’.

 Peru cadi deru’ yanna nga riní’ ique binni zacá. Ma raca bia’ chupa mil iza gunabadiidxaʼ Poncio Pilato, ni naca gobernador de Roma, Jesús: «¿Xii nga ni dxandíʼ yaʼ?» (Juan 18:38). Neca cadi cabeza Pilato nicabi Jesús laa, peru nabé risaca pregunta riʼ. Zándaca zadxagayaaluʼ ora gú’yalu’ ximodo ricabi Biblia ni ne zacané ni lii para ganda guibániluʼ ndaaniʼ ti Guidxilayú ra ma’ qué ganna binni xii nga ni dxandíʼ.

¿Ñee zanda gánnanu ni dxandí’ la?

 Zanda. Purti’ riquiiñe’ Biblia diidxa’ dxandí’ para guiní’ de xiixa ni dxandí’ bizaaca o guni binni ni jneza. Rusiidiʼ ni ra nuu Jehová b nga cadá ni dxandí’, nga runi Biblia ribee lá Jehová «Dios ni riní’ ni dxandí’» (Salmo 31:5). Laaca rusiidiʼ ni laanu ni dxandí’ de Dios ne ruchaagani ni dxandíʼ ca casi ti biaaniʼ ni ruzaaniʼ ne ni ruluíʼ laanu gunáʼ nga ni dxandíʼ ndaaniʼ ti Guidxilayú ra maʼ qué ridxela binni gunáʼ peʼ nga ni dxandíʼ (Salmo 43:3; Juan 17:17).

¿Ximodo zanda ganna’ xii nga ni dxandí’?

 Qué racala’dxi’ di’ Dios guni crenu ni ná lu Biblia pur tisi caquiiñe’ gúninu ni o para si chu’nu galán. Racalá’dxibe iquí’ñenu xquendabiaaninu para guyúbinu xii nga ni dxandí’ (Romanos 12:1). Cumu racalá’dxibe gunibia’nu laabe ne gannaxhiinu laabe de guidubi xquendabiaaninu la? cayábibe laanu chuʼnu seguru dxandí’ nga guirá’ ni rizí’dinu lu Biblia (Mateo 22:37, 38; Hechos 17:11).

¿Tuu nga bisiguii primé?

 Biblia ná Binidxabaʼ, enemigu stiʼ Dios, nga bisiguii primé. Nga runi, ribee lá laabe «bixhoze guiráʼ ni rusiguii» (Juan 8:44). Gúdxibe ca primé binni guyuu lu Guidxilayú cusiguii Dios laacaʼ (Génesis 3:1-6, 13, 17-19; 5:5). Dede dxi que, qué na’ Binidxaba’ ganna binni ni dxandíʼ de Dios ne rusiguiibe ora riniʼbe de laa (Apocalipsis 12:9).

¿Xiñee nabé rusiguii binni?

 Nabáninu ti tiempu ni ribee lá Biblia «ca últimu dxi». Ca dxi riʼ, jma ma’ stale binni ma’ gudxite Binidxabaʼ laaca. Nga runi, ma’ normal ruuya’ binni gusiguii para quite’ xcaadxi ne gaca aprovecharcaʼ de laacabe (2 Timoteo 3:1, 13). Laaca nabé rusiguiicabe ndaani’ stale religión. Sicarí’ ruzeete’ Biblia de ca binni ni zabani tiempu ri’: «Zuyúbicabe binni gusiidiʼ laacabe ca cosa si ni riuuláʼdxicabe gánnacabe […] ne maʼ qué zanácabe gucaadiágacabe ni dxandíʼ» (2 Timoteo 4:3, 4).

¿Xiñee nabé risaca gánnanu ni dxandí’?

 Caquiiñe’ gapa binni confianza tuuxa para ganda guiní’ ni dxandí’. Purti’ pa gasti’ confianza la? qué zanda gaca xhamigu chupa binni ne qué zanda chu’ binni tobi si. Lu Biblia riete racala’dxi’ Dios gusiidiʼ religión stinu ni dxandí’, sicarí’ ná ni: «Ca ni runi adorar [Dios] naquiiñeʼ gúnicaʼ ni né espíritu ne ni dxandíʼ» (Juan 4:24). Ora runibia’nu ni dxandí’ rusiidi’ Biblia, rudiʼnu cuenta cadi dxandíʼ ni rusiidiʼ stale religión ne maʼ qué runi crenu ca ni. Para ganda gúnilu’ ni la? biinda’ serie de artículo ni lá’ «Cani rucaa binni guni cré cadi nachaʼhuiʼ Dios».

¿Xiñee racala’dxi’ Dios ganna’ ni dxandí’?

 Racala’dxi’ Dios guibánilu’ sin qué chu’ dxi gátilu’. Ne para nga la? Racalá’dxibe gánnalu’ ni dxandí’ de laabe (1 Timoteo 2:4). Pa gunibia’lu’ ca ley sti’ Dios ne gánnalu’ xii nga ni jneza ne ni cadi jneza, ne chinándalu’ ca ni la? zaca xhamígulu’ Dios (Salmo 15:1, 2). Biseenda’ Dios Jesús lu Guidxilayú ri’ para gacané binni ganna ni dxandí’. Nga runi, racala’dxi’ Dios gucaadiáganu ca ni bisiidi’ Jesús (Mateo 17:5; Juan 18:37).

¿Ñee ziuu dxi zunduuxe’ Dios guendarusiguii la?

 Ziuu dxi. Qué riuula’dxi’ Dios gaca aprovechárcabe de binni ne quítecabe laaca’. Ma’ bi’ni’ prometerbe zunduuxebe guirá’ ca binni ni nabé ricá ique gusiguii (Salmo 5:6). Dxi gúnibe ni, laaca zuni cumplirbe promesa ri’: «Ca binni ni siempre riní’ ni dxandí’ la? zabánica’ sin qué chu’ dxi gática’» (Proverbios 12:19).