Xi reeda ndaaniʼ íqueluʼ ora gunadiágaluʼ guiníʼ binni: «Maʼ gaxha nuu fin». Ñee riníʼ íqueluʼ zanitilú Guidxilayú riʼ pur ti xu naroʼbaʼ, pur ti tormenta o pur ti guerra naroʼbaʼ la? Nuu tu ridxibi ora guiníʼ ique ca cosa ni bizéʼtenu riʼ, peru nuu xcaadxi ni qué rizaalaʼdxiʼ ni.

Stiidxaʼ Dios na sicaríʼ: «Zeeda fin» (Mateo 24:14, TNM). Fin riʼ nga na Biblia láʼ «Armagedón» ne «dxi uzulú cuidxi [Dios] cuenta binni» (Apocalipsis 16:14, 16). Gadxé gadxé ni rusiidiʼ stale religión ora maʼ caniʼcaʼ de fin riʼ, ne laaca riníʼ binni stale cosa ni cadi jneza de laani para guchíbicaʼ stobi. Peru, xii nga fin ni ruzeeteʼ Biblia yaʼ. Laaca Biblia nga rusiene laanu xipeʼ nga laani. Peru cadi ngasi, laaca racaneni laanu gánnanu maʼ gaxha nuu fin riʼ ne xi caquiiñeʼ gúninu para guilanu. Yanna gudiʼnu lugar gacaneni laanu guiénenu xiñee cadi jneza caadxi cosa riníʼ ique binni ne gudiʼnu lugar gacaneni laanu gánnanu xipeʼ nga fin riʼ. De racá maʼ zadúʼyanu xipeʼ nga chiguinitilú.

1. QUÉ ZACÁ GUÍ DIʼ GUIDXILAYÚ

   Biblia na: «Guluu [Dios] guidxilayú riʼ ra naquiiñeʼ guiaana ni; qué ziuu dxi guiniibini de ra nuuni» (Salmo 104:5). Lu relatu stiʼ Biblia riʼ ne lu xcaadxi ni zeeda luni, cayabi Dios laanu qué ziuu dxi guinitilú Guidxilayú ne qué zudiibe lugar chuʼ xiixa o tuuxa gunitilú ni (Eclesiastés 1:4; Isaías 45:18).

2. MAʼ NEXHEʼ DXI NE HORA GUEEDA FIN

   Neca nuu tu riníʼ ique cadi nexheʼ diʼ ti dxi gueeda fin riʼ, Biblia cayabi laanu maʼ gudixhe Dios ti dxi para laani. Sicaríʼ nani: «Peru padxí ne pora la? iruti ganna, nin ca ángel ni nuu ibáʼ, dede nin naa qué gannaʼ, sínuque Bixhoze siaʼ nga nanna. Nga runi lachuu listu ne lagataná. Lainíʼ né Dios purti qué ganna tu padxí ganda ora guendaʼ» (Marcos 13:32, 33). Zanda guininu maʼ nanna Dios, «Bixhoze» Jesús, «padxí ne pora» gueeda fin.

3. CADI BINNI DIʼ NGA GUEDANÉ FIN NE QUÉ ZÁCANI PUR TI METEORITO

   Ximodo guzulú fin riʼ yaʼ. Guidúʼyanu xiná libru stiʼ Apocalipsis: «Biiya zuxele ibáʼ ne biree ti caballu quichiʼ. Nuu tobi runi jneza peʼ ne riníʼ irá ni dxandíʼ, ne laa dxiʼba laame [...]. Ne biiya dxa mani ngola que ne ca rey sti guidxilayú ne ejércitu sticaʼ. Bidxiña ca para ucaa lú ca dxa ni dxiʼba caballu quichi que ne ejércitu stiʼ» (Apocalipsis 19:11-21). Ñee nannuʼ xi cusiidiʼ relatu riʼ laanu la? Rusiidini laanu zuseendaʼ Dios ti ejércitu de ángel para gunitilú ca xhenemigu.

1. ZANITILÚ CA GOBIERNU

   Biblia na: «Dios ni nuu guibáʼ zucuí ti reinu [ti gobiernu] ni qué ziuu dxi guinitilú. Ne reinu riʼ qué zadiʼdiʼ ni lu náʼ sti guidxi. Zunideni ne zunduuxeni guiráʼ ca reinu riʼ, ne laani ziaana ni ne qué ziuu dxi guiluxe ni» (Daniel 2:44). Casi  bidúʼyanu lu guionna puntu que, zaca «ca rey sti guidxilayú» tobi si «para ucaa lú ca dxa ni dxiʼba caballu quichi que ne ejércitu stiʼ» (Apocalipsis 19:19). Peru zunitilú Reinu stiʼ Dios laacabe.

2. MAʼ QUÉ ZACA GUERRA, NIN GUENDAQUÉIQUIIÑEʼ NE NI CADI JNEZA

   Zunduuxe Dios guiráʼ «guendaridinde» ni cayaca lu guidubi Guidxilayú (Salmo 46:9). Yanna guidúʼyanu xiná sti relatu riʼ: «Purtiʼ binni si ni runi jneza ne ni qué gapa donda nga zabani lu guidxilayú. Peru, ca binni qué iquiiñeʼ ne cani rudxiideche stobi ni nuu lu guidxilayú la? zanitilucaʼ» (Proverbios 2:21, 22, La Palabra de Dios para Todos [PDT]). Ne Apocalipsis 21:4, 5 cayabi laanu zuni Dios «irá xixé cosa nacubi».

3. ZANITILÚ CA RELIGIÓN NI QUÉ RUNI NI NA DIOS NE CANI RIGUITE BINNI

   Sicaríʼ na libru stiʼ Jeremías: «Cadi dxandíʼ ni riníʼ ca profeta ne cayuni mandar ca sacerdote modo racaláʼdxicaʼ [...]. Peru, xi gúnitu ora maʼ gueeda fin stini yaʼ» (Jeremías 5:31, PDT). Ximodo guiluxe ca profeta riʼ yaʼ. Guidúʼyanu xi guníʼ Jesús: «Stale tu zabi naa dxi que [ora gueeda fin]: “Señor, ñee cadi byuí du stiidxa lu la? ne cadi pur lá lu gulee du binidxaba de binni la? ne cadi laca pur lá lu bini du stale milagru la?”. Oraque zabe laacaʼ: “Qué runebiaʼya laatu. Laguiree de ra nuaaʼ, purti qué ñuu dxi ñuni tu jneza”» (Mateo 7:21-23).

4. ZANITILÚ BINNI RIUULAʼDXIʼ COSA MALU NE CANI QUÉ RUNI NI JNEZA

   Jesucristu guníʼ: «Ma dxiʼba donda ique cani qué runi cre purti beeda biaani guidxilayú peru jma gunaxhii ca guelacahui que biaani, purti malu ni runi caʼ» (Juan 3:19). Tiempu bibani Noé que binitilú Dios guiráʼ binni malu nuu lu Guidxilayú. Biblia na lu 2 Pedro 3:5-7: «Nisa binitilú guidxilayú chiqué, dxi bilaahua ni que. Peru ibáʼ ne guidxilayú ni nuu yanna ri la? [...] ma gudixhe Dios unitilú ni ne gui. Ne laca gui que unitilú irá cani qué rulabi laabe, dxi cuidxi be cuenta laacaʼ».

Cásica binitilú «guidxilayú» ca dxi stiʼ Noé que, zaqueca nga guinitilú «irá cani qué rulabi [Dios], dxi cuidxi be cuenta laacaʼ». Peru naquiiñeʼ gánnanu qué nunitilú diʼ Dios Guidxilayú riʼ, sínuque ca binni malu, o ca xhenemigu. Ngaca nga ni chigaca «dxi cuidxi [Dios] cuenta» binni, zunitilube guiráʼ cani riuulaʼdxiʼ guni cosa malu ne ca xhenemígube. Peru zulabe ca xhamígube, cásica bilabe Noé ne familia stiʼ (Mateo 24:37-42).

¡Nabé sicarú zabáninu ora maʼ cuee Dios guiráʼ cosa malu nuu lu Guidxilayú riʼ! Nga runi, ora guzeeteʼ Biblia maʼ zeeda fin la? naquiiñeʼ chuʼnu nayecheʼ. Peru zándaca caníʼ íqueluʼ pa cayaadxaruʼ stale para gueeda fin riʼ ne xi caquiiñeʼ guʼnuʼ para guilaluʼ. Guidúʼyanu xi ricabi Biblia.