Ca especialista ni racané binni ni huará xquendabiaaniʼ nacaʼ caquiiñeʼ chuʼ binni gaxha de Dios para ganda guibani binni nayecheʼ. Ne zacá ni purtiʼ ridúʼyanu riuu binni nayecheʼ ora racané stobi. Xcaadxi binni riuucaʼ nayecheʼ ora iquiiñecaʼ tiempu sticaʼ para gúʼyacaʼ guiráʼ cosa ni bizáʼ Dios ne gápacaʼ cani, o gutieecaʼ xiixa cuadru o guxhídxicaʼ saa. Peru stale binni qué lica riuu nayecheʼ neca guni zacá.

Cani ruundaʼ Biblia qué ridxagayaadicaʼ gánnacaʼ dede ora gale binni nga maca riuulaʼdxiʼ chuʼ gaxha de Dios. Ca primé capítulo stiʼ Génesis rusihuínnicani bizáʼ Dios primé hombre ne primé gunaa guyuu lu Guidxilayú, gatigá guníʼnebe laacaʼ ne bidiibe lugar chuʼcaʼ gaxha de laabe (Génesis 3:8-10). Qué nuzáʼ diʼ Dios binni para guibani sin laa; bizaʼbe laacaʼ para guiníʼnecaʼ laabe. Ne gatigá ruzeeteʼ Biblia de laani.

Ne ti ejemplu de laani nga ora guníʼ Jesús ca diidxaʼ riʼ: «Nayecheʼ cani nanna naquiiñeʼ chuʼ gaxha de Dios» (Mateo 5:3, Traducción del Nuevo Mundo). Ca diidxaʼ riʼ rusihuinni cani naquiiñeʼ guyubi binni chuʼ gaxha de Dios para guibani nayecheʼ. Peru ximodo zanda gúninu nga yaʼ. Jesús guníʼ ximodo: «Cadi pan si nga ibani né binni sínuque irá ca diidxa ni iree de ruaa [Jiobá]» (Mateo 4:4). Zacá nga laani, cani riníʼ Jiobá, o cani riníʼ íquebe ne ca mandatu stibe ni zeeda lu Biblia, zanda gacanécani laanu guibáninu nayecheʼ. Guidúʼyanu chonna modo ni ruluíʼ zacá ni.

Yanna nuu stale especialista ni rudii conseju binni para ganna ximodo guidxaaga stobi, ximodo guibaniné binnilidxi ne gannaxhii sti binni, ne rábicabe binni ximodo guni chaahuiʼ ca guendanagana napa, rudiicabe conseju ximodo guibani binni nayecheʼ ne ganna xi pur nabani. Peru ñee cadi Jiobá nga jma nanna gudii conseju laanu lu ca tema ni maʼ guninu ca purtiʼ laabe nga bizaʼbe laanu la?

 Guníʼ ique guziʼluʼ ti cámara o ti computadora. Ñee cadi dxandíʼ ribézaluʼ gudii binni ni bizáʼ cani ti manual ra cusiene ximodo zanda iquiiñeluʼ cani la? Biblia zeeda gaca casi ti manual ni biʼniʼ Dios ni «bizáʼ» laanu para gusiidiʼ laanu ximodo guibáninu. «Manual» riʼ o Biblia cusiene xiñee bizaʼbe laanu ne ximodo naquiiñeʼ guibáninu ti cueendunu ni galán.

Cásica jneza modo rucaacabe ti manual para gusiene ximodo iquiiñeʼ xiixa cosa la? Biblia laaca caguixhená laanu de ca cosa ni zanda guniná laanu o ni zanda guxheleʼ laanu de Dios. Zándaca jma nagueenda nga gúninu ni gabi sti binni laanu. Peru para cadi gápanu guendanagana ne cueendunu ni galán, ñee cadi jma jneza nga chinándanu ni gabi Dios laanu purtiʼ laa «bizáʼ» laanu la?

Yanna, nécapeʼ rusiidiʼ Jiobá laanu xi guiráʼ naquiiñeʼ gúninu para guibáninu galán, peru qué rucaabe laanu gúninu módopeʼ nabe. Lugar de gúnibe zacá rábibe laanu sicaríʼ purtiʼ nadxiibe laanu ne racaláʼdxibe gacanebe laanu: «Naa, Jiobá, naa nga Dios stiluʼ, Ni cusiidiʼ lii para cueenduluʼ ni galán para lii. Ni cayabi lii gunáʼ nga neza ra naquiiñeʼ saluʼ. ¡Pa lii dxandíʼ nucaadiaʼguʼ ca mandamientu stinneʼ! Óraque guendariuudxi stiluʼ ñeeda gaca cásipeʼ ti guiiguʼ, ne guendaruni jneza stiluʼ casi ola nisadóʼ» (Isaías 48:17, 18). Nga runi, pa chinándanu ni gabi Dios laanu zabeendunu ni galán. Zacá nga laani, para guibáninu nayecheʼ la? caquiiñeʼ gacané Dios laanu.

Nuu binni na cadi caquiiñeʼ gacané Dios laa o qué lica runi crecaʼ laabe. Riníʼ íquecaʼ pa ñuu ti Dios ni nadxii laanu la? qué ñuu diʼ stale cosa malu. Rinabadiidxacabe: «Xiñee racaná binni ni nachaʼhuiʼ. Xiñee rale stale baʼduhuiiniʼ huará pa qué gápacaʼ donda. Xiñee ridxaagalú binni stale guendanagana». Gastiʼ naca guinabadiidxaʼ binni zacá, ne zuchaa xquendanabani binni ora ganna xiñee rizaaca cani bizéʼtenu ca. Peru lugar de ugáʼninu donda ique Dios pur guiráʼ cosa malu ni rizaaca, guidúʼyanu xi rusiene Biblia, Stiidxaʼ Dios, de laani.

Lu guionna capítulo stiʼ Génesis rieeteʼ biquiiñeʼ Binidxabaʼ ti beendaʼ para bicaabe primé hombre ne primé gunaa cadi guzuubacaʼ stiidxaʼ Dios. Gudxi Dios laacabe záticabe pa gócabe cuananaxhi stiʼ yaga stiʼ guendananna ni jneza ne ni cadi jneza. Peru guidúʼyanu xi gudxi Binidxabaʼ Eva: «Dxandipeʼ qué zátiditu. Purtiʼ Dios nanna dxi goto cuananaxhi stini la? zaxeleʼ lutu ne zácatu casi laabe, ne zunibiaʼtu xii nga jneza ne ni cadi jneza» (Génesis 2:16, 17; 3:4, 5).

Né ca diidxaʼ ca, cadi guníʼ si Binidxabaʼ rusiguii Dios, sínuque casi ñaca niniʼbe cadi jneza modo runi mandar Dios. Guniʼbe jma galán zabani binni pa gucaadiaga laabe lugar de gucaadiaga Dios. Yanna, ximodo zanda guihuinni pa dxandíʼ ngue ni caníʼ Binidxabaʼ yaʼ. Bidii Jiobá lugar tiidiʼ tiempu para gusihuinni Binidxabaʼ ne ca binni ni chuʼ  pur laa pa dxandíʼ zanda guibánicaʼ jma galán sin Dios.

Lii yaʼ, xi riníʼ íqueluʼ. Ñee zanda guibani binni jma galán sin Dios ne guni mandar saa sin gacané Dios laacaʼ la? Guníʼ ique modo cayacaná binni yanna, ca cosa ni cadi jneza cayaca, ca guendahuará ni nuu ne modo cayati binni. Laaca nuu binni ni cucheené ley ne binni ni cadi nabani casi modo na Dios; ne laaca cayaca guerra ne cayuuticabe binni ni qué gapa donda... Ca cosa ni maʼ bizéʼtenu ca ne xcaadxi guendaquéiquiiñeʼ ni huayuniná binni ra huadiʼdiʼ tiempu, rusihuínnicani qué zanda diʼ guibani binni jneza pa qué gacané Dios laa. Biblia qué riníʼ diʼ Dios nga napa donda pur guiráʼ guendananá cadiʼdiʼ binni, sínuque cusiéneni xi pur rizaaca binni zacá ne ca diidxaʼ riʼ: «Binni runi mandar binni para gacanacaʼ» (Eclesiastés 8:9).

Pur guiráʼ ni maʼ bizéʼtenu ca, ñee qué rusihuinni cani caquiiñeʼ guyúbinu Dios para ganda guiénenu xiñee cazaaca stale cosa malu ne ximodo gaca chaahuiʼ ca guendanagana stinu la? Xi zuni Dios yaʼ.

Maca xadxí riuulaʼdxiʼ binni guibani sin gaca huará, sin guioʼxhoʼ ne sin gatiʼ. Nga runi huaquiiñecabe stale tiempu stícabe, stipa ne guiráʼ ni nápacabe para ganda guibánicabe zacá, peru qué huabeendúcabe gastiʼ. Nuu tu laa ribeza guidxela xiixa remediu o xiixa medicina ni gueʼ para cadi gatiʼ o para cadi guioʼxhoʼ, peru qué huadxélacabe ni.

Dios racalaʼdxiʼ guibani binni nayecheʼ. Ne zacá nga gudíxhebe nibani binni ora bizaʼbe laacaʼ, ne caʼruʼ diʼ guchaabe ni gudixhe íquebe (Génesis 1:27, 28; Isaías 45:18). Laanu nánnanu guiráʼ ni maʼ gudixhe ique Dios guni dxandipeʼ zaca cani (Isaías 55:10, 11). Biblia ruzeeteʼ maʼ guníʼ Dios zuni ti paraísu lu Guidxilayú riʼ cásica ni biniti Adán ne Eva. Apocalipsis 21:4 na: «Zuchaa [Dios] nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué». Xi zuni Dios para guedané ca ndaayaʼ ni bizéʼtenu ca yaʼ. Xi naquiiñeʼ gúninu para guicaanu ca ndaayaʼ ni maʼ guníʼ Dios ca yaʼ.

Jesucristu, Xiiñiʼ Dios, bisiidiʼ ca discípulo stiʼ guinábacaʼ lu oración sticaʼ gaca ni na Bixhoze. Stale binni nanna oración stiʼ padrenuestro ne riníʼcani stale biaje. Sicaríʼ na oración ca: «Bixhózedu ni nuu guibáʼ guisácapeʼ laluʼ. Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mateo 6:9, 10, TNM). Casi maʼ bidúʼyanu ca, zaquiiñeʼ Jiobá Reinu stiʼ para guni chaahuiʼ guiráʼ ra maʼ bininá ca gobiernu ni nuu lu Guidxilayú riʼ ne zuuyabe gaca ni jneza lu guidxilayú cubi ni maʼ guniʼbe chigaca (Daniel 2:44; 2 Pedro 3:13). * Peru  laanu laaca naquiiñeʼ gúninu xiixa. Xii nga ni naquiiñeʼ gúninu yaʼ.

Jesucristu bisiene xi naquiiñeʼ gúninu né ca diidxaʼ riʼ: «Zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3). Casi na ca diidxaʼ ca, zanda guibáninu sin qué chuʼ dxi gátinu lu ti guidxilayú cubi. Yanna, ñee caquiiñenu gacané Dios laanu la? Caquiiñenu pue.

Raca chupa mil iza, dxi nuu apóstol Pablu ti lugar láʼ Areópago o colina de Marte ndaaniʼ guidxi Atenas, gúdxibe ca binni de Grecia, cani nanna stale, ca diidxaʼ riʼ de Dios: «Laabe rudii be laanu enda nabani ne irá ni caquiʼñe nu». Ne despué guniʼbe: «Laabe bizáʼ be laanu ne pur laabe nabani nu ne rizá nu. Casi na tobi de ca poeta stitu: “Za nu de Dios”» (Hechos 17:25, 28).

Dede yanna dxandíʼ ca diidxaʼ gudxi Pablu ca binni de Atenas. Dios ni bizáʼ laanu nga rudii bi ni ricaanu, guendaró ni ridoʼno ne nisa ni rideʼnu. Pa ñaca qué ñápanu ca cosa sicarú riʼ la? qué ñanda diʼ nibáninu. Peru xiñee cayacanérube binni guidxilayú pa stale de laacaʼ qué lica riníʼ íquecaʼ de laabe yaʼ. Sicaríʼ na Pablu: «Gudixhe be irá binni ndaani guidxilayú para uyubi laabe casi ñaca zixubi ná ca dede idxela ca laabe, purti cadi zitu nuu be, sínuque gaxha doʼ nuu be de cada tobi de laanu» (Hechos 17:27).

Ñuuláʼdxiluʼ ñunibiáʼ chaahuiluʼ Dios la? Ñuuláʼdxiluʼ niziidiluʼ jma de ni naguixhe íquebe gúnibe ne xi conseju rudiibe para guibani binni nayecheʼ yanna ne biaʼ dxi guibani la? Yanna, rinábadu lii guiníʼneluʼ binni ni bidii lii revista riʼ o guiníʼneluʼ cani bicaani. Ne laacaʼ ziuuláʼdxicaʼ gacanecaʼ lii.