LEY stiʼ Moisés ná nuu biaje naquiiñeʼ guni jurar binni. Peru tiempu bibani Jesús, stale judíu gúpacaʼ costumbre de guni jurarcaʼ para gusihuínnicaʼ dxandíʼ guiráʼ ni caniʼcaʼ. Zaqué nga racaláʼdxicabe gusihuínnicabe cadi cusiguiicabe. Chupa biaje gudxi Jesús laacabe cadi jneza costumbre huati riʼ ne gudxi laacabe: «Lainíʼ “ya” pa huandí zuni tu ni, o pa qué zuni tu ni la? lainíʼ “coʼ”» (Mat. 5:33-37; 23:16-22).

Ti diccionariu teológico ná lu caadxi pasaje ni zeeda lu Talmud rihuinni nabé runi jurar ca judíu que para gusihuínnicaʼ dxandíʼ ni caniʼcaʼ. Libru Talmud cusiene chaahuiʼ xi juramentu naquiiñeʼ guni cumplírcabe ne gunáʼ ni zanda guchiácabe.

Cadi Jesús si nga guníʼ cadi jneza costumbre riʼ. Guzéʼtenu ti ejemplu, historiador judíu Flavio Josefo guníʼ ca diidxaʼ riʼ de ti grupu de religión stiʼ ca judíu: «Rúnicabe stipa pur cadi guni jurárcabe, purtiʼ laacabe runi crécabe jma feu ni que gusiguiicabe. Laacabe nácabe ora gucaa tuuxa ridxi Dios para guni jurar, cayuni ni purtiʼ cusiguii». Libru apócrifo stiʼ ca judíu ni runibiáʼcabe casi Eclesiástico o Sabiduría de Jesús Ben Sirá ruzeeteʼ caadxi diidxaʼ zacaca: «Ti hombre ni runi jurar stale, ridxá ladxidóʼ de cosa malu» (23:11). Nga runi ni guníʼ Jesús cadi jneza nga gúʼyacabe ca juramentu que casi guendariguite. Pa rininu ni dxandíʼ guiráʼ ora la? cadi caquiiñeʼ guni jurarnu para guni crécabe ni rininu.