Lu ca 40 iza guzá ca israelita que lu desiertu, jma nga gudócabe maná (Éx. 16:35). Ne chupa biaje bidii Jehová laacabe bere xunaxi para gócabe (Éx. 16:​12, 13; Núm. 11:31). Peru laaca gupa ca israelita que xcaadxi guendaró, peru jma huaxiéʼ que maná que.

Stale biaje riné Jehová laacabe xiixa lugar «ra guiziiláʼdxicabe», ne raqué nga ridxélacabe nisa ne xcaadxi guendaró (Núm. 10:33). Tobi de ca lugar que nga oasis de Elim, «ra nuu 12 lugar ra cadá nisa ne 70 yaga ziña» (Éx. 15:27). Libru ni láʼ Plants of the Bible rusiene ni ca yaga ziña ni rudii dáctil, «rigaa ni stale lugar, […] ne laani nga tobi de ca yaga ni jma rudii binni ni iquiiñeʼ; rudiini millón de binni guendaró, aceite ne ti lugar ra guiziilaʼdxiʼ».

Ne zándaca biziiláʼdxicabe gaxha de ti oasis naroʼbaʼ ni runibiáʼcabe yanna casi Farán, ni riaana lu wadi stiʼ Farán. a Casi ná libru Discovering the World of the Bible, napa wadi (o valle) riʼ «130 km. de ziuulaʼ ne laani nga tobi de ca wadi jma ziuulaʼ, jma sicarú ne ni jma runibiáʼcabe ni nuu Sinaí». Laaca libru que ruzeeteʼ: «45 km. de ra riluxe wadi ca, nuu oasis sicarú stiʼ Farán ra nuu stale yaga ziña. Napa oasis riʼ 4,8 km. de ziuulaʼ, ne riaana ni 610 m. de nivel stiʼ nisadóʼ. Laani nga Edén stiʼ Sinaí. Dede dxiqué, guizáʼ stale binni huayé lugar riʼ, ra nuu ca yaga ziña ni rudii dáctil».

Dxi biree ca israelita de Egipto zinecaʼ cuba pan, traste para uguuchanacaʼ cuba ne, zándaca zinecaʼ caadxi biidxiʼ ne aceite. Peru casi nánnanu qué nindaa ca cosa riʼ laacabe. Ne laaca zinécabe «dendxuʼ, vaca, stale yuze» (Éx. 12:​34-39). Peru, cumu nabé nagana nga guibani binni lu desiertu la? zándaca stale de laacame gúticame. Ne zándaca gudó ca israelita que chupa chonna de ca maniʼ que, ne xcaadxi de laacame biquiiñecabe para gudiicabe sacrificiu, dede né ca dios ni cadi dxandíʼ (Hech. 7:​39-43). b Neca zacá, bisiroobaʼ ca israelita que dendxuʼ ne vaca. Ne nánnanu zacá ni, purtiʼ gudxi Jehová laacabe dxi qué nuzuubacabe  diidxaʼ: «Zapa ca xiiñitu dendxuʼ 40 iza lu desiertu» (Núm. 14:33). Ne pur ngue, zándaca gúpabe leche ne beela, peru qué zugaanda ni para guyaanacabe biaʼ chonna millón de binni 40 iza. c

Yanna, ¿ximodo gúpacabe nisa ne guendaró para ca maniʼ stícabe yaʼ? d Zándaca tiempu que jma biaba nisaguié, ne pur nga jma nagáʼ guyuu lu desiertu. Lu artículo «Arabia» ni nuu lu libru Perspicacia para comprender las Escrituras cusiene raca 3.500 iza «jma ziáʼ nisa guyuu Arabia que biaʼ nuu yanna». Ne ruzeeteʼ ni: «Cumu yanna nuu stale uadi o valle nabidxi ne gueteʼ, ni dxiqué guca guiiguʼ la? rusihuinni ca ni dxiqué nabé biaba nisaguié, ne pur ngue nabé bixooñeʼ nisa ndaaniʼ ca ni». Neca zaqué, puru yuxi nuu lu desiertu que ne ruchibi ni binni (Deut. 8:​14-16). Pa qué ñuni Jehová milagru ra nudii nisa ca israelita, ñáticaʼ ne laaca ñati ca maniʼ sticaʼ (Éx. 15:​22-25; 17:​1-6; Núm. 20:​2, 11).

Gudxi Moisés ca israelita que biyaanaʼ Jehová laacabe maná para gánnacabe: «Cadi de pan si nga guibani binni, sínuque de guiráʼ diidxaʼ ni guiree de ruaa Jehová» (Deut. 8:3).