STALE binni nanna bicaacabe Jesús lu ti yaga ne gucuá chupa gubaanaʼ cueʼbe, tobi ladu derechu ne stobi ladu bigaʼ (Mat. 27:35-38). Relatu que ná guti si Jesús guluucabe listu cuerpu stiʼ, ne guluucabe laa ndaaniʼ ti baʼ (Mar. 15:42-46). Peru nuu tu laa qué runi cré pa dxandíʼ bigaachiʼ Jesús ndaaniʼ ti baʼ casi rusiidiʼ Biblia.

Ca binni ni ruyubi ganna ni cá lu ca Evangeliu qué runi crecaʼ pa bidii ca romanu lugar igaachiʼ ca binni ni gucuá lu yaga, purtiʼ bíʼnicaʼ cosa malu ne qué runi merecercaʼ ni. Ni riníʼ íquecabe nga qué rigaachiʼ ca binni malu que. Sicaríʼ bisiene ti periodista láʼ Ariel Sabar lu revista ni láʼ Smithsonian xiñee nuu binni riníʼ ique zacá. Sicaríʼ bicaabe: «Ora gaca crucificar tuuxa laani nga ti castigu nadipaʼ ni ricaa ti binni ni biʼniʼ cosa feu, ne ca ni ruundaʼ de tema riʼ riníʼ íquecaʼ cadi jneza gucaachiʼ ca romanu ca clase binni ca». Bisituí ca romanu lú ca binni ni biʼniʼ cosa malu ne bininácabe laacaʼ stale dede ra gáticaʼ. Ngue runi stale biaje rusaanacabe ca cuerpu que lu yaga para gó maniʼ laacaʼ. Ne zándaca despué rulaacabe ca cuerpu que ndaaniʼ ti baʼ ra rigaachiʼ stale binni.

Peru ni maʼ bidxela ca arqueólogo rusihuínnini nuu judíu ni bicaacabe lu yaga bicaachicabe laacaʼ. Lu iza 1968, gaxha de guidxi Jerusalén, bidxélacabe ti baʼ ra gaʼchiʼ ti familia, ne laaca ndaaniʼ baʼ que bidxélacabe dxitabaala stiʼ ti hombre ni biiticabe lu yaga lu primé siglu. Bidxélacabe ca dxitabaala stiʼ hombre que ndaaniʼ ti caja de guié ni runibiáʼcabe casi osario. Ndaaniʼ caja que nuu ti dxita xatini ñee didi ti clavu cá lu ti ndaa yaga ne ziuulaʼ clavu que 11,5 centímetru. Sicaríʼ guníʼ Sabar: «Dxita xatini ñee que stiʼ ti hombre ni láʼ Jehohanán ni, ne gucaneni para guiene binni dxandíʼ nga bigaachiʼ Jesús ndaaniʼ ti baʼ casi ná ca Evangeliu». Nabé risaca ndiʼ, purtiʼ «dxita xatini ñee Jehohanán que bisihuínnini, tiempu bibani Jesús bidii ca romanu que lugar igaachiʼ ti hombre ni guca crucificar casi ná ca costumbre stiʼ ca judíu».

Ra bidxélacabe dxita xatini ñee riʼ, bicaani binni guiníʼ ique ximodo peʼ bicaacabe Jesús lu ti yaga. Peru rihuinni dxichi ca guyuu caadxi binni malu ni gucuá lu yaga ne bidiicabe lugar chuʼ tu gucaachiʼ laacaʼ ne qué nulaacabe laacaʼ ndaaniʼ ti baʼ ra rigaachiʼ stale binni. Racá ridúʼyanu biaʼsi ni rusiidiʼ Biblia ora riníʼ bigaachiʼ Jesús ndaaniʼ ti baʼ. Ne laaca biaʼsi ni pur ca ni maʼ bidxela ca arqueólogo.

Ne nuu sti cosa jma risaca, maca guníʼ Jehová zucaachicabe Jesús ndaaniʼ baʼ stiʼ ti hombre ricu, ne guirutiʼ zanda gucueeza para qué gaca cumplir ni maʼ guníʼ Dios (Is. 53:9; 55:11).