STALE iza, ca binni ni runi criticar Biblia naca cadi dxandíʼ bibani rey Belsasar, ni riete lu libru stiʼ Daniel (Dan. 5:1). Ne guníʼ íquecabe zacá purtiʼ nácabe qué nidxela ca arqueólogo nin ti prueba ni rusihuinni dxandíʼ bibani Belsasar. Peru lu iza 1854 bichaa ni guníʼ íquecabe que. ¿Xiñee yaʼ?

Iza que, John Taylor, ti cónsul británico, gudaañe caadxi ruina ni guyuu ndaaniʼ guidxi Ur, ni riaana tiempu riʼ ladu gueteʼ stiʼ guidxi Irak. Lu ti torre naroʼbaʼ bidxélabe caadxi cilindru de arcilla de chii centímetru de ziuulaʼ. Cá caadxi diidxaʼ né letra cuneiforme lú ca cilindru que ne laaca cá caadxi diidxaʼ ra canábacabe guibani rey Nabonido xadxí, laa ne Belsasar, xiiñiʼ ni jma huaniisi. Ra bidxélacabe ca cilindru riʼ, guníʼ ca hombre ni runi criticar Biblia dxandíʼ bibani Belsasar.

Biblia ná dxandíʼ bibani Belsasar, ne laaca gúcabe rey. Peru laaca guníʼ ca hombre riʼ cadi dxandíʼ gúcabe rey. Guzéʼtenu ti ejemplu, William Talbot, ti científicu ni bibani lu siglu diecinueve bicaa guyuu tu guníʼ biʼniʼ mandar «Bel-sar-ussur [Belsasar] tiempu ca biʼniʼ mandar bixhoze, Nabonido. Peru gastiʼ nin ti prueba ni rusihuinni zacá ni».

Peru bihuinni cadi dxandíʼ ni ná ca hombre runi criticar Biblia, purtiʼ despué bidxela ca arqueólogo que xcaadxi cilindru de arcilla ra cá qué ñuu diʼ rey Nabonido, bixhoze Belsasar, ndaaniʼ guidxi que caadxi iza. Yanna, ¿tu biʼniʼ mandar dxi qué guínnibe yaʼ? Encyclopaedia Britannica ná: «Dxi qué guinni Nabonido ndaaniʼ guidxi ra runi mandar la? gulibe Belsasar para gaca rey ne guni mandar guidxi que ne ti parte naroʼbaʼ de ejércitu stibe». Nga runi, guca Belsasar rey tiempu que. Ne Alan Millard, ti arqueólogo ne lingüista guníʼ biaʼsi ni cá lu libru stiʼ Daniel ora riete guca Belsasar rey.

Laanu ca xpinni Dios, runi crenu guiráʼ ni cá lu libru stiʼ Daniel ne Dios guníʼ xi guicá luni purtiʼ zeeda ni lu Biblia (2 Tim. 3:16).