¿Ñee nanna Dios pa nuuluʼ la?
XI RIZÍʼDINU DE MODO GUYÁʼ BINNI
Nabé risaca ca primé sesenta minutu stiʼ ti baʼduhuiiniʼ casi gale. ¿Xiñee yaʼ? Purtiʼ cariñu ni gusihuinni jñaabe laabe zacané ni baʼduhuiiniʼ ca para guiniisi galán. *
¿Xi rucaa ti gunaa gannaxhii baʼduhuiiniʼ stiʼ ne gapa laabe né stale cariñu yaʼ? Lu The Journal of Perinatal Education ti profesora láʼ Jeannette Crenshaw bisiene ora ti gunaa gapa baʼduhuiiniʼ, ti hormona láʼ oxitocina «rucaa ni gunaa ca guni sentir xiixa pur baʼduhuiiniʼ stiʼ ora guyadxí, xhubináʼ ne ugadxi xiiñiʼ». Ora guizaaca nga, raca liberar stiʼ hormona lu cuerpu stiʼ gunaa ca ni rucaa laa «guiniʼné ne quitené xiiñiʼ» ne zacá jma gannaxhiisaacabe. ¿Xiñee nabé risaca gánnanu ndiʼ yaʼ?
Guendarannaxhii ni rusihuinni ti gunaa para né xiiñiʼ, rusihuinni ni modo bizáʼ Jiobá * binni. Bidii rey David xquíxepeʼ Dios pur gulee laabe de ndaaniʼ jñaabe ne pur gupa jñaabe laabe ndaaniʼ náʼ. Biʼniʼ reconocerbe gupa Jiobá laabe dede dxi gúlebe. Ne gúdxibe laa lu ti oración: «Dede dxi nuaaʼ ndaaniʼ jñaa, lii nga Dios stinneʼ» (Salmo 22:9, 10).
GUNÍʼ IQUE NDIʼ: Pa bizáʼ Dios ca gunaa ca para gudiicaʼ ni caquiiñeʼ baʼduhuiiniʼ sticaʼ ne gapa laacabe né cariñu, ¿cadi dxandíʼ laaca rizaalaʼdxiʼ Dios cada tobi de laanu la? (Hechos 17:29).
XI RUSIIDIʼ BIBLIA LAANU DE MODO RAPA DIOS LAANU
Jesucristu, ni jma runibiáʼ chaahuiʼ Dios ni Bizáʼ guiráʼ xixé ni nuu, guníʼ: «Laaca tu nanna tu ridoo chupa mani huiini pur chupa domiʼ, peru neca qué risaca came, qué ziaba si tobi de laacame layú pa qué na Dios. Zaqueca ma bigaba be irá xixé guicha ique tu. Nga runi cadi idxibi tu, purti jma risaca tu que ca mani huiiniʼ» (Mateo 10:29-31).
Huaxiéʼ binni rundaachiʼ ca pajaruhuiiniʼ, ne jmaruʼ si cani riaba layú. Peru Bixhózenu ni nuu guibáʼ ruuyaʼ cada tobi de laacame. Neca stale ca pajaruhuiiniʼ ca peru jma rusisaca Dios ti binni qué laacame. Nga runi, zanda guininu: nanna Dios nuuluʼ. Peru cadi ngasi, laaca guizáʼ rizaaláʼdxibe lii.
Nabé rizaalaʼdxiʼ Dios chuʼnu galán ne rápabe laanu né stale guendarannaxhii
Biblia cayabi laanu:
-
«Purtiʼ cayuuyaʼ Jiobá guiráʼ ni cayaca lu guidxilayú para guluiʼbe stipa stibe cani runi ni nabe de guidubi ladxidóʼ» (2 CRÓNICAS 16:9).
-
«Guielú Jiobá cayuuyaʼ ca binni runi ni jneza, ne rucaadiágabe ora rinábacaʼ gacanebe laacaʼ» (SALMO 34:15).
-
«Ziuaaʼ nayecheʼ ne ziecheniáʼ guendanachaʼhuiʼ stiluʼ, purtiʼ maʼ biiyaluʼ guendananá stinneʼ; maʼ nannuʼ xi guiráʼ yuubaʼ cadideʼ» (SALMO 31:7).
«GUNÍʼ IQUEʼ CADI NADXII JIOBÁ NAA»
¿Ñee racané gánnanu rizaalaʼdxiʼ Dios laanu ne rápabe laanu né stale cariñu lu xquendanabáninu la? Racané pue. Hannah, * ti gunaa de Inglaterra guníʼ:
«Stale biaje guníʼ iqueʼ cadi nadxii Jiobá naa ne qué ricábibe ca oración stinneʼ purtiʼ huaxiéʼ fe napaʼ. Bineʼ cré cayuni castigarbe naa o cadi culábibe naa purtiʼ qué risacadiáʼ. Bineʼ sentir qué rizaaláʼdxibe naa».
Peru yanna, maʼ nanna Hannah nadxii ne rizaalaʼdxiʼ Jiobá laa. ¿Xi bicaa laabe guchaabe modo riníʼ íquebe yaʼ? Laabe guniʼbe: «Cadi ni málasi guca ni. Maʼ raca stale iza bicaadiagaʼ ti discursu ni biree de lu Biblia ni caníʼ de sacrificiu stiʼ Jesucristu ni bicaa naa guidxagayaaʼ ne gucané ni naa guuyaʼ nadxii Jiobá naa. Ne laaca rudieeʼ cuenta nadxiibe naa ora ricábibe ca oración stinneʼ, ne pur nga stale biaje biinaʼ. Guneʼ estudiar Biblia ne chaaʼ reunión laaca huayacané cani naa gunebiaʼyaʼ chaahueʼ Jiobá ne ganna xi runi sentirbe pur laanu. Yanna maʼ nannaʼ nadxii Jiobá laanu, racanebe ne racaláʼdxibe gápabe laanu».
¡Guizáʼ sicarú ca diidxaʼ ca! Peru ¿ximodo zanda gánnaluʼ pa rizaalaʼdxiʼ Dios ni runi sentirluʼ ne pa riénebe lii yaʼ? Lu sti artículo ca zadxélaluʼ respuesta ca.
^ párrafo 3 Pur ti guendahuará láʼ depresión posparto, zándaca gaca nagana para ti gunaa chuʼ tobi si ne baʼduhuiiniʼ stiʼ. Peru cadi naquiiñeʼ guiníʼ íquebe laabe nápabe donda. Según Instituto Nacional de la Salud Mental de Estados Unidos, depresión posparto ca «rapa gunaa ni pur caadxi cambiu físicu zaqueca emocional. [...] Qué rizaaca ni pur ni runi gunaa ca o ni rusaana de guni». Pa racaláʼdxiluʼ gánnaluʼ jma de tema riʼ, biiyaʼ artículo ni láʼ «¿Qué es la depresión posparto?» ni zeeda lu revista ¡Despertad! 8 de junio de 2003.
^ párrafo 5 Biblia rusiidiʼ Jiobá nga láʼ Dios (Salmo 83:18).
^ párrafo 15 Lu ca artículo riʼ bidxaa lá caadxi binni.
Laaca zándaca ziuuláʼdxiluʼ ca ndiʼ
TORRE STIʼ NI RAPA
¿Ñee riene Dios ni runi sentirluʼ la?
Riene Dios laanu purtiʼ guirútiruʼ runibiáʼ chaahuiʼ laanu casi laabe, runibiaʼbe dede modo naca genética stinu.
