Ca binni ni qué rudxiibaʼ laca laa o naca humilde runi respetarcaʼ binni. Qué raca crécabe ne qué ribézacabe guʼyaʼ binni laacabe casi tuuxa nabé risaca. Ca binni humilde dxandipeʼ rizaaláʼdxicaʼ binni ne nuucaʼ listu para guiziidicaʼ de xcaadxi.

Nuu binni riníʼ ique gaca tuuxa humilde rusihuinni ni qué ganna gaca defender, peru ni dxandíʼ nga naca ni ti guenda, purtiʼ racané ni laanu para gánnanu maʼ bicheʼnu ne racané ni laanu gánnanu nuu cosa qué zanda gúninu.

• Racané ni gapa xiiñiluʼ jma xhamigu. Ti libru ni láʼ La epidemia del narcisismo ná: «Ti binni humilde jma riuu binni gaxha de laa» ne «qué raca nagana para laa gapa xhamigu».

• Racané ni xiiñiluʼ guibani nayecheʼ. Guiziidiʼ xiiñiluʼ gaca humilde zacané ni laabe yanna ne dxi guiniisibe, casi ora chiyúbibe ti dxiiñaʼ. Ti doctor láʼ Leonard Sax bicaa: «Ti joven ni riníʼ ique puru para laa si ne qué riníʼ ique xi ca cosa ni qué zanda guni, zaca nagana para gudiicabe laa ti dxiiñaʼ ora chiyubi ni, peru ti joven ni gucaadiaga chaahuiʼ ora chinabaʼ dxiiñaʼ, jma nagueenda zudiicabe laa dxiiñaʼ ora chiyubi ni». *

Gucané ca xiiñiluʼ gúʼyacaʼ xi caquiiñeʼ xcaadxi binni ne cadi ni caquiiñesicaʼ

CONSEJU ZEEDA LU BIBLIA: «Pa nuu tu riníʼ ique risaca, peru cadi zacá ni la? caguite laca laa» (Gálatas 6:3, TNM).

• Gupa cuidadu né ni gábiluʼ ca xiiñiluʼ. «Pa guʼnuʼ dxiiñaʼ, zanda gápaluʼ guiráʼ ni gacaláʼdxiluʼ». «Zanda ugaandaluʼ guiráʼ ni quixhe íqueluʼ». Ca diidxaʼ riʼ, zándaca ruluíʼ riguu cani gana o naca cani motivador, peru stale biaje cadi dxandíʼ cani. Zándaca jma nayecheʼ zabani ca xiiñiluʼ pa gápacaʼ xiixa meta ni zanda ugaandacaʼ ne gúnicaʼ stipa pur ugaandacaʼ ni.

• Biʼniʼ felicitar laacabe pur ca cosa jneza gúnicabe. Pa gábiluʼ xiiñiluʼ guizáʼ nanna guni guiráʼ cosa, cadi cayacaneluʼ laabe para gácabe humilde. Biʼniʼ stipa pur guni felicitarluʼ laabe pur xiixa ni bíʼnibe jneza.

• Gudixhe pabiáʼ zanda iquiiñeʼ ca xiiñiluʼ red social. Stale binni nabé riquiiñeʼ ca red social para si guʼyaʼ binni laa ne guni presumir ca cosa  ni randa runi o cani huayuni. Ora guni binni ndiʼ, cadi lica cusihuinni naca humilde.

• Guluu gana ca xiiñiluʼ guinábacaʼ perdón. Ora guni xiiñiluʼ xiixa ni cadi jneza, gucané laabe gudiibe cuenta maʼ bicheebe.

Bisiidiʼ laacabe gudiicabe xquíxepeʼ

CONSEJU ZEEDA LU BIBLIA: «Laudii diuxquixe» (Colosenses 3:15).

• Pur ca cosa ni bizáʼ Dios. Naquiiñeʼ guiziidiʼ ca xiiñiluʼ gusisácacaʼ naturaleza, gudiicabe cuenta caquiiñenu bi, nisa ne guendaró para guibáninu, purtiʼ sin laaca ni zátinu. Né ca ejemplu riʼ, zucaaluʼ laacabe guni respetárcabe ne gudiicabe xquíxepeʼ pur guiráʼ cosa ni bizáʼ Dios.

• Gúʼyacabe ca guenda o cualidad ni napa xcaadxi. Bisiidiʼ xiiñiluʼ gudii cuenta nuu binni jma nanna guni xiixa qué laabe, ne lugar de guidxiichibe o chuʼbe celoso jma galán gúnibe pa guiziidibe de ca binni ca.

• Bisiidiʼ laacabe gusihuínnicabe cudiicabe xquíxepeʼ. Bisiidiʼ ca xiiñiluʼ gudiicaʼ xquíxepeʼ cadi de diidxaʼ si, sínuque naquiiñeʼ guiree ni de ndaaniʼ ladxidoʼcaʼ. Pa gúnicabe ni, zacané ni laacabe gácacabe humilde.

Bisiidiʼ laacabe nabé risaca nga gacanécabe xcaadxi binni

CONSEJU ZEEDA LU BIBLIA: Lagaca humilde ne laguiníʼ ique «jma risaca xcaadxi que laatu, siempre laguizaalaʼdxiʼ binni, ne cadi guicá íquetu puru si ni caquiiñetu» (Filipenses 2:3, 4).

• Gunabaʼ ca xiiñiluʼ gacanecaʼ né ca vuelta ni raca ra yoo. Ora qué gudiiluʼ lugar guni xiiñiluʼ ca vuelta raca ra yoo, casi ñaca cayábiluʼ laabe: «Cadi gúniluʼ ca vuelta riʼ purtiʼ nabé risácaluʼ». Primeru naquiiñeʼ gacané xiiñiluʼ né ca vuelta raca ra yoo, ne despué zanda chichítebe. Biluíʼ laabe pabiáʼ racanebe xcaadxi binni ra gúnibe ni ne pabiáʼ zannaxhiicabe laabe ne zuni respetárcabe laabe.

• Bisiidiʼ laacabe gudiicabe cuenta pabiáʼ risaca nga gacanécabe binni. Ora laacabe rizaaláʼdxicabe xcaadxi binni racané ni laacabe guiníʼ íquecabe casi ti binni huaniisi neca nahuiinicabe. Nga runi guniʼné xiiñiluʼ de ante ne bisiene laabe tuu nga ca binni zanda gacanebe ne ximodo gúnibe ni. Biʼniʼ felicitar laabe ne guluu gana laabe ora gúnibe xiixa galán pur xcaadxi.