甘心捨己——土耳其
公元一世紀嘅基督徒為咗傳講“王國嘅好消息”，盡力接觸更多人。（馬太福音24:14）有啲甚至去到異國他鄉，例如使徒保羅喺海外傳道旅程期間，曾經喺而家土耳其嘅各個地區向人作見證。 * 二千幾年之後，喺2014年，土耳其再一次成為傳道活動嘅焦點。點解要組織呢個特别傳道活動？有邊啲人參加呢？
“發生咩事呀？”
雖然土耳其有超過2800個傳道員，但係整個國家嘅人口總數有成7900萬，噉意味住傳道員同人口嘅比例係1:28000。可想而知，傳道員喺呢個國家能够接觸到嘅住户只係好少嘅一部分。特别傳道活動嘅目標係，喺短時間内盡量接觸更多人。大約550個識得講土耳其語嘅弟兄姊妹，從唔同國家嚟到土耳其，同當地嘅傳道員一齊參加呢次特别嘅活動。有乜嘢成果呢？
一次廣泛嘅見證工作。伊斯坦布爾嘅一個會衆報道:“啲人一睇到我哋，就問:‘呢度係咪有個特别嘅大會呀？我哋見到四周圍都係耶和華見證人喎！’”伊兹密爾市嘅一個會衆又報告話:“一個喺的士站做嘢嘅男人問一個本地長老:‘最近你哋嘅活動好似多咗喎，發生咩事呀？’”特别傳道活動真係引起咗好多人嘅注意。
斯特芬
嚟參加特别傳道活動嘅外國弟兄姊妹，都非常享受呢個傳道工作。嚟自丹麥嘅斯特芬話:“每一日，我都可以向嗰啲未聽過耶和華嘅名嘅人傳道。我覺得自己真係喺度彰顯緊耶和華嘅聖名。”從法國嚟嘅讓-戴維寫道:“我哋淨係傳咗一條街就用咗幾嗰鐘嘞。感覺實在太好嘞！大多數人都未聽過耶和華見證人。幾乎每間屋，我哋都有機會同住户傾計，分享短片，同留低啲出版物。”
讓-戴維（中間）
只係短短兩個星期，550個傳道員就分發咗6萬本出版物！呢個特别傳道活動確實有效作咗一次廣泛嘅見證。
對傳道工作熱心大增。呢個特别活動推動當地嘅好多弟兄開始考慮參與全時服務。喺特别傳道活動結束後嘅一年之内，土耳其正規先驅嘅數目增加咗百分之二十四。
西林
即使呢個特别傳道活動結束咗，外國嘅弟兄姊妹返到家鄉之後，佢哋依然從中得益。德國嘅西林寫道:“土耳其嘅弟兄做非正式見證做得好輕鬆好自然。不過，我做非正式見證嗰時就好怕醜。我好開心可以參加呢次活動，亦都好多謝當地弟兄嘅榜樣，同好多人嘅禱告。因為呢一切，我做到嗰啲之前做唔到嘅嘢。我仲喺土耳其嘅地鐵度傳道同派傳單添！而家，我冇以前咁怕醜喇。”
約翰内斯
嚟自德國嘅約翰内斯話:“我喺傳道方面學到好多。土耳其嘅弟兄真係好想同人分享聖經真理，佢哋盡可能把握每一個機會作見證。當時我就下定決心，返到德國之後都要噉樣做。而家我接觸到嘅人真係比以前多咗。”
澤伊内普
“呢次活動對我嘅傳道工作有好大嘅影響，使我更加勇敢，亦都更加信賴耶和華。”嚟自法國嘅澤伊内普講。
傳道員之間嘅關係更親密。嚟自唔同國家嘅弟兄姊妹之間充滿愛心，精誠團結，呢種氣氛令人留低深刻嘅印象。之前提到嘅讓-戴維話:“我哋‘品嘗’到弟兄姊妹嘅好客精神。”跟住佢又話:“當地嘅弟兄姊妹熱情噉招待我哋，就好似對待朋友同家人噉。我知道我哋係一個國際弟兄團體，呢一點，我已經喺組織嘅出版物度睇過好多次嘞，但呢一次我先至真正親身體驗到。有咗呢次經歷，我更加覺得，身為耶和華嘅子民係好值得自豪嘅。我衷心感謝上帝俾我呢個殊榮。”
克萊爾（中間）
法國嘅克萊爾姊妹話:“無論嚟自丹麥、法國、德國，抑或土耳其，我哋都係一家人。就好似上帝用一個大膠擦將啲國界都擦甩晒噉。”
絲特凡妮（中間）
絲特凡妮都係嚟自法國嘅，佢話:“我哋從呢個特别傳道活動睇出，使我哋團結起嚟嘅，唔係文化或語言，而係我哋所有人對耶和華嘅愛。”
長遠嘅益處
好多外國嘅傳道員開始考慮搬到土耳其，去呢個需求極大嘅地區幫手，甚至有啲傳道員已經搬咗過去嘞。我哋真係好感激呢啲願意搬到去外國服務嘅弟兄姊妹。
例如，喺一個偏遠嘅地區，有一個由25位傳道員組成嘅小組。好多年嚟，呢個小組只有一個長老。喺2015年，有六位嚟自德國同荷蘭嘅傳道員，搬去支持呢個小組。可想而知，當地嘅弟兄姊妹幾咁高興！
喺屬靈嘅前線服務
喺土耳其服務咗一段時間嘅傳道員有乜嘢心聲呢？呢啲傳道員喺需求較大嘅地區服務，時不時都會遇到一啲挑戰，但係佢哋生活得好有意義。請留意佢哋點樣講:
費得里科
一位四十幾歲嘅已婚弟兄費得里科，嚟自西班牙，佢噉樣講:“少咗物質嘅嘢，我成個人都輕鬆晒，因為我可以將精力放喺最重要嘅事上。”佢會唔會鼓勵其他弟兄姊妹搬到需求更大嘅地區服務呢？“當然會啦！”佢話，“如果你搬去外國嘅目的，係為咗幫助人認識耶和華，你就係將自己放喺耶和華嘅手中。嗰時你就會真正感受到耶和華關心自己。”
魯迪
魯迪係一位五十幾歲嘅已婚弟兄，嚟自荷蘭。佢話:“喺屬靈嘅前線服務，能够同咁多未聽過真理嘅人分享聖經知識，呢個使我哋感到極大嘅滿足。見到當地嘅人因為接受真理而得到快樂，我哋都覺得非常喜樂。”
薩沙
一位四十幾歲嘅已婚弟兄叫薩沙，嚟自德國，佢話:“喺土耳其傳道嘅時候，我每次都可以遇到第一次聽見真理嘅人。有機會幫助佢哋認識耶和華，俾我好大嘅滿足感。”
温子
温子係一位三十幾歲嘅已婚姊妹，嚟自日本，佢話:“之前，我成日都想哈米吉多頓即刻嚟到。但係，搬到土耳其之後，我好感激耶和華一直以來表現耐心。我越清楚了解耶和華點樣指引全球嘅傳道工作，我就越渴望親近佢。”
阿莉薩係一位三十幾歲嘅姊妹，嚟自俄羅斯，佢講:“以呢種傳道方式為耶和華服務，幫助我體驗到佢嘅所有良善。”（詩篇34:8）佢又話:“耶和華唔單止係我嘅父親，亦都係我親密嘅朋友。經歷過唔同嘅情況之後，我對佢嘅認識更加深入。我嘅人生充滿快樂嘅時刻、令人振奮嘅經驗，同慷慨嘅祝福！”
“睇吓啲田”
喺土耳其舉行嘅呢個特别傳道活動，使更多嘅人聽到好消息。但係，仲有好廣大嘅地區，係冇傳道員去過嘅。嚟土耳其服務嘅傳道員，每日都會遇到一啲從來未聽過耶和華嘅人。你想唔想喺呢啲地區服務呢？如果想嘅話，我哋就鼓勵你:“舉目睇吓啲田，已經發白，可以收割莊稼嘞。”（約翰福音4:35）你可唔可以去一啲“已經發白”咗嘅，又可以“收割莊稼”嘅地區幫手呢？如果可以嘅話，而家就要為呢個目標詳細噉計劃。我哋可以肯定嘅係:如果我哋更加努力將好消息傳到“地極”，就會得到超越我哋所能想像嘅福分。（使徒行傳1:8）
^ 2段 請睇《看看這片美地》册子32-33頁。
