甘心捨己——緬甸
“莊稼實在好多，但工人好少。所以要懇求莊稼嘅主人，派工人去收割佢嘅莊稼。”（路加福音10:2）耶穌喺兩千幾年前講嘅呢番話非常適用於今日嘅緬甸。點解？喺緬甸，只有大概4200個傳道員，不過佢哋要向5500萬人傳道。
數以百計嚟自唔同國家嘅弟兄姊妹受“莊稼嘅主人”耶和華推動，嚟到呢個東南亞國家幫手收割屬靈嘅莊稼。乜嘢推使呢啲人甘願離鄉别井？乜嘢使佢哋決定搬到緬甸？佢哋又得到乜嘢福分？等我哋一齊嚟睇吓佢哋點講。
“請過嚟啦，我哋需要更多先驅！”
和浩係一個日本嘅先驅。佢幾年前有一次突然癲癇病發作，失去意識，即刻被送去醫院。醫生同佢講，兩年之内唔可以開車。和浩大受打擊，佢問自己：“噉我點樣繼續做我喜愛嘅先驅工作啊？”佢懇切禱告，祈求耶和華為佢打開出路，使佢可以繼續從事先驅服務。
和浩同真理
和浩話：“一個月之後，有個喺緬甸服務嘅朋友聽到我嘅情況，就打電話同我講：‘緬甸嘅基本交通工具係巴士。你喺呢度唔使開車都可以繼續做傳道工作！’我問醫生，我嘅情況容唔容許我搬去緬甸。令我驚喜嘅係，醫生話：‘啱啱好而家有一位緬甸嘅腦科專家到訪日本，我可以介紹俾你識。如果你喺緬甸再次病發，佢可以幫到你。’我將醫生呢番話視為耶和華嘅回應。”
和浩即刻發電郵同緬甸分部講，佢同太太好想去嗰度做先驅。五日後，分部就回覆話：“請過嚟啦，我哋需要更多先驅！”於是和浩同太太真理就賣咗佢哋嘅車，辦好簽證，買咗機票。而家，佢哋好開心喺曼德勒手語小組服務。和浩話：“我哋通過呢個經歷更加深信詩篇37:5嘅應許：‘要將你嘅前途交託俾耶和華，倚靠佢，佢就成全你。’”
耶和華打開出路
2014年，耶和華見證人喺緬甸舉辦咗一個特别大會。好多國家嘅代表都參加咗呢次大會。一位34歲嘅美國姊妹莫妮克話：“從大會返屋企之後，我向耶和華禱告，求佢指引我之後嘅人生道路。我亦都同父母傾過我嘅屬靈目標。我哋大家都認為我應該搬去緬甸，不過我等咗一段時間先達到呢個目標，其間我亦都不斷禱告。”接住落嚟，莫妮克會解釋原因。
莫妮克同肖立
佢話：“耶穌鼓勵佢嘅門徒要 ‘計算費用’，所以我問自己：‘我有冇足够嘅經濟能力搬去緬甸呢？我喺緬甸就算唔用太多時間做世俗工作，係咪都可以維持到生計呢？’”莫妮克承認話：”我好快就意識到自己冇足够嘅錢搬去世界嘅另一邊。”噉後來佢點樣做到呢？（路加福音14:28）
莫妮克話：“有一日我老闆叫我去見佢。我好緊張，以為公司要裁員。但原來老闆係想稱讚我工作出色，仲話會俾我一筆獎金。呢筆錢啱啱好就係我需要嘅！”
從2014年12月開始，莫妮克就一直喺緬甸服務。對於喺需求更大嘅地方傳道，佢有乜嘢睇法？佢話：“我喺呢度好開心！我主持緊三個聖經課程，其中有個學生係一個67歲嘅婆婆。婆婆每次見到我都好開心，仲會攬實我。佢知道上帝嘅名係耶和華嗰陣，感動到喊。佢話：‘呢個係我人生中第一次知道上帝嘅名叫耶和華。你年紀比我細一半，但係你就幫我認識咗一件最重要嘅事。’當然，我都喊埋。類似噉嘅經驗令嗰啲喺需求更大地區服務嘅人覺得自己嘅人生充滿意義。”最近，莫妮克有榮幸參加咗王國傳福音者訓練班。
有啲人搬去緬甸服務，係因為睇咗《2013耶和華見證人年鑑》有關緬甸嘅記載。一個三十出頭叫肖立嘅姊妹本來就已經喺東南亞嘅一個國家服務。佢有一份全職工作，但係《年鑑》嘅記載推使佢考慮搬去緬甸服務。佢話：“2014年，我參加喺仰光舉行嘅特别大會，當時我認識咗一對搬去緬甸中文地區服務嘅夫婦。我識講中文，於是決定搬去緬甸支持嗰度嘅中文小組。我同莫妮克決定搬去曼德勒。我哋得到耶和華嘅祝福，兩個人都喺同一間學校揾到一份部分時間嘅工作，喺學校附近亦都揾到一間公寓。雖然呢度天氣好熱而且有啲唔方便，但係我鍾意呢度嘅傳道工作。緬甸人嘅生活好簡樸，佢哋亦都好有禮貌，而且願意聽好消息。睇到耶和華正加快當地傳道工作嘅發展，真係令我好興奮。我深信，我喺曼德勒服務就係遵行耶和華嘅旨意。”
耶和華垂聽禱告
好多去需求更大嘅地區服務嘅弟兄姊妹都體驗過禱告嘅力量。純平同奈央嘅經歷就係其中一個例子。佢哋係一對三十幾歲嘅夫婦，曾經喺日本嘅一個手語會衆服務。點解佢哋會搬到緬甸？純平話：“一直以來，我同太太都有個目標，就係去國外需求更大嘅地區服務。我哋喺日本嘅手語會衆嗰陣，一個弟兄搬咗嚟緬甸。雖然我哋嘅積蓄唔係好多，但係2010年5月我哋都搬咗過嚟。緬甸嘅弟兄姊妹熱情噉歡迎我哋！”佢哋喺緬甸嘅手語地區服務有乜嘢感覺？佢繼續講：“地區嘅人有好好嘅反應。失聰嘅住户睇到手語嘅影片都好驚喜。我哋真係慶幸當初決定嚟呢度為耶和華服務！”
奈央同純平
純平同奈央點樣維持生活？純平話：“三年過後，我哋嘅積蓄已經用晒，冇錢俾下一年嘅租金。我同太太經常為呢件事懇切禱告。出乎意料嘅係，我哋收到分部嘅一封信，受邀請做臨時特别先驅！我哋體驗到，只要信賴耶和華，佢絶對唔會捨棄我哋。佢一直都用各種方式照顧我哋。”最近，純平同奈央亦都參加咗王國傳福音者訓練班。
耶和華打動人心
一個43歲叫西蒙嘅意大利弟兄，同一個37歲叫安娜嘅新西蘭姊妹係一對喺緬甸服務嘅夫婦。乜嘢推動佢哋搬到緬甸呢？安娜話：“因為2013年《年鑑》對緬甸嘅記載！”西蒙話：“可以喺緬甸服務係好大嘅殊榮。呢度嘅生活好簡單，所以我可以用更多時間為耶和華服務。我哋喺呢個需求更大嘅地區服務，可以體驗到耶和華嘅關愛，真係令人振奮。”（詩篇121:5）安娜話：“我比以前更加快樂。我哋而家過住簡樸嘅生活。我有更多時間同丈夫一齊，我哋嘅關係變得更親密。我哋亦都揾到好多寶貴嘅新朋友。當地人對見證人冇咩偏見，而且對真理都有好好嘅反應！”喺邊啲方面呢？
西蒙同安娜
安娜話：“有一日，我喺市場向一個大學生作見證，而且約好時間同佢再次見面。我去續訪佢嘅時候，佢同一個朋友一齊嚟。下一次見面，佢又帶咗另外幾個朋友。之後，佢又帶咗更多人嚟。而家，我同其中五個人討論緊聖經。”西蒙話：“當地人待人友善，有好奇心。好多人都對真理有興趣，多到我哋冇時間去照顧。”
幸雄同瑞穗
決定搬去緬甸之前，可以採取乜嘢實際嘅步驟呢？嚟自日本嘅瑞穗話：“我同先生幸雄一直都好想喺一個需求大嘅國家服務。不過去邊度好呢？睇完2013年《年鑑》關於緬甸嘅感人記載之後，我哋深受打動，於是考慮係咪可以喺緬甸服務。”幸雄又話：“我哋決定去緬甸首都仰光旅遊一個星期，就好似探子去迦南地噉。呢次短期嘅實地考察使我哋下定決心搬過嚟。”
你能唔能够響應呼籲？
簡恩、達妮卡、羅德尼同佐敦
羅德尼同太太簡恩係一對五十幾歲嘅夫婦，嚟自澳大利亞。佢哋同仔女佐敦同達妮卡喺2010年就搬到緬甸呢個需求更大嘅地區服務。羅德尼話：“我哋見到當地人喺屬靈上如飢似渴，深受感動。我極力推薦其他家庭試吓去好似緬甸噉嘅地方服務。”點解呢？“我哋全家人喺緬甸服務所得到嘅屬靈益處係錢都買唔到嘅！好多年輕人關注嘅係佢哋嘅手機、汽車、工作等等，而我哋嘅仔女因為地區嘅需要就忙於學習新語言。佢哋努力學習點樣同嗰啲唔熟識聖經嘅人推理，點樣喺聚會嘅時候發表評論，亦都專注於其他充滿意義嘅屬靈活動。”
奧利弗同安娜
37歲嘅奧利弗弟兄嚟自美國，佢推薦呢種形式嘅服務，話：“為咗事奉耶和華而離開自己熟識嘅環境，使我大大得益。噉樣做幫助我建立自信，亦都使我學識喺任何情況下信賴耶和華。同新認識嘅弟兄姊妹一齊事奉耶和華使我睇出，世上冇任何事比上帝嘅王國更重要。”今日，奧利弗同太太安娜繼續熱心喺中文地區服務。
特拉澤
52歲嘅特拉澤姊妹嚟自澳大利亞，2004年佢就已經喺緬甸服務。佢話：“如果對方嘅情況允許，我會鼓勵佢哋喺需求更大嘅地區服務。我已經體驗到，只要你甘願付出努力為耶和華服務，就會得到佢嘅祝福。我從來都冇諗過自己可以過而家噉嘅生活。呢個係最有收穫同最令人心滿意足嘅生活方式，亦都係我夢寐以求嘅。”
世界上有好多地區仲未有傳道員探訪過，當中有好多誠心正意嘅人。願喺緬甸服務嘅弟兄姊妹嘅感人言詞可以鼓勵你去呢啲需求更大嘅地區幫手。喺緬甸服務嘅弟兄姊妹都發出邀請嘅呼籲：“請嚟緬甸幫助我哋啦！”
