Marta, juntúul u testigo Jéeoba kajaʼan Guatemalaeʼ, táan u kanik kekchí utiaʼal u tsikbaltik u Tʼaan Dios tiʼ le máaxoʼob tʼanik le idioma jeʼeloʼ. Juntéeneʼ tu yilaj u jóokʼol juntúul nojoch máak tiʼ junpʼéel hospital. Yoʼolal bix u vestirmiluba le nojoch máakoʼ tu tsʼáaj cuentaeʼ ku tʼanik kekchí yéetel tiʼ u taal tiʼ junpʼéel tiʼ le mejen kaajoʼob yanoʼob teʼ montañaʼoboʼ. Le tuʼux kajaʼan le nojoch máakoʼ maʼatech u jach kʼuchul u testigoʼob Jéeoba u tsikbaltoʼob u Tʼaan Diosiʼ, le oʼolal le kiikoʼ kex maʼ u jach ojel le idiomaoʼ tu tʼanaj le nojoch máakoʼ.

 Martaeʼ tu kʼáatajtiʼ wa u kʼáat u xok le Biblia tu yéeteloʼ. Le nojoch máakoʼ tu yaʼalaj u kʼáat xook pero tu yaʼalaj xan minaʼan taakʼin tiʼ utiaʼal u boʼotik. Marta túuneʼ tu yaʼalajtiʼeʼ u testigoʼob Jéeobaeʼ maʼatech u cobrarkoʼob ikil u kaʼanskoʼob le máakoʼoboʼ. Tu yaʼalaj xan tiʼeʼ jeʼel u páajtal u xookoʼob tiʼ teléfonoeʼ yéetel jeʼel u páajtal u invitartik xan u láakʼtsiloʼobeʼ. Le nojoch máak túunoʼ tu yaʼalaj jeʼel u xookeʼ le oʼolal Martaeʼ tu tsʼáaj junpʼéel libro tiʼ ich kekchí, lelaʼ ku kʼaabaʼtik ¿Baʼax jach tu jaajil ku kaʼansik le Bibliaoʼ? Tsʼoʼoleʼ tu yilaj xaneʼ le nojoch máakoʼ ku naʼatik español le oʼolal tu tsʼáaj junpʼéel u Biblia ich español. Le Bibliaoʼ U Suttʼaanil Túumben Luʼum. Ka máan junpʼéel semanaeʼ le nojoch máakoʼ, junmúuchʼ yéetel u yatan bey xan kaʼatúul u paalaleʼ, káaj u xookoʼob yéetel Marta tiʼ teléfono. Kaʼatéen tiʼ junpʼéel semana ku xookoʼob. Martaeʼ ku yaʼalik: «Como maʼ yaʼab kekchí in wojleʼ, ich español in tsʼáaik le xookoʼ. Le mejen paalaloʼoboʼ ku naʼatkoʼob español bey xan le nojoch máakoʼ, letiʼ túuneʼ ku tsolik tiʼ u yatan ich kekchí».

 Le kiikoʼ maʼ u yojel kaʼacheʼ wa le nojoch máakoʼ u pastoril junpʼéel iglesia. Tsʼoʼoleʼ le baʼax ku kanik teʼ xookoʼ ku tsolik xan tiʼ le máaxoʼob ku muchʼkubaʼob tu yéeteloʼ. Letiʼob túuneʼ tu kʼáatoʼobtiʼ tuʼux táan u kanik le baʼax ku tsolikoʼ tumen jach táaj jatsʼuts. Le ka tu yaʼalajtiʼob táan u tsʼaʼabal xook tiʼ yéetel le Bibliaoʼ letiʼobeʼ taakchaj xan u kaanbaloʼob. Ka máan kʼiineʼ 15 u túulal máakoʼob tu muchʼkubaʼob xook tiʼ teléfono yéetel Marta. Utiaʼal u páajtal u yuʼubikoʼob tubeel le baʼax ku tsolik Martaoʼ ku tsʼáaikoʼob kaʼach junpʼéel micrófono tu tséel le celularoʼ.

 Le ka tu tsikbaltaj Marta tiʼ le ancianoʼob tsʼoʼok u yaʼabtal le máaxoʼob ku xookoʼob tu yéeteloʼ, juntúul tiʼ letiʼobeʼ tu yaʼalaj yaan u bin teʼ chan kaaj tuʼux yanoʼoboʼ. Le ka bin u yiloʼobeʼ tu invitartoʼob utiaʼal ka xiʼikoʼob u yuʼuboʼob junpʼéel discurso ken u máans le superintendente tiʼ circuitooʼ a tiʼ uláakʼ junpʼéel chan kaajoʼ. Utiaʼal leloʼ kʼaʼabéetchaj u viajaroʼob junpʼéel hora tiʼ coche yéetel u xíimbaloʼob uláakʼ kaʼapʼéel hora utiaʼal u kʼuchloʼobiʼ. Diecisiete u túulal máakoʼob binoʼob u yuʼuboʼob le baʼax kaʼansaʼaboʼ.

 Ka máan wa jaypʼéel semanaʼobeʼ le superintendente tiʼ circuito yéetel le uláakʼ Testigoʼoboʼ binoʼob tu yiknal le máaxoʼob ku xookoʼoboʼ yéetel pʼáatoʼob cuatro díasiʼ. De tempranoeʼ ku chaʼantikoʼob le videoʼob yaan teʼ jw.org ich kekchíoʼ, tsʼoʼoleʼ ku xokikoʼob le folleto ¿Máaxoʼob beetik baʼax u kʼáat Jéeoba bejlaʼeʼ? De tarde xaneʼ ku chaʼantikoʼob u videoiloʼob JW Broadcasting. Le superintendente tiʼ circuito xanoʼ tu kaxtaj máax kun tsʼáaik xook tiʼ cada juntúul tiʼ le máakoʼobaʼ.

 Le kanpʼéel kʼiinoʼob tiaʼanoʼob teʼeloʼ tu yiloʼob u biskoʼob u Tʼaan Dios tiʼ uláakʼ mejen kaajoʼob tuʼux ku tʼaʼanal kekchí. Tsʼoʼoleʼ tu invitartoʼob le máakoʼob utiaʼal ka xiʼikoʼob tiʼ junpʼéel reunión especial beetaʼaboʼ. Cuarentisiete máakoʼob binoʼobiʼ yéetel tiʼ cada juntúuleʼ kʼáataʼab wa jeʼel u kʼamik junpʼéel xook yéetel le Bibliaoʼ. ¡Bey túun káajik u tsʼaʼabal xook tiʼ once familiaʼoboʼ!

 Ka máan wa jaypʼéel meseseʼ le ancianoʼoboʼ tu chʼaʼtukloʼob u beetkoʼob le reunión ku beetaʼal tu jóokʼbal semanaoʼ, lelaʼ beetaʼab tu kaajal le nojoch máak yáax káaj u xookoʼ. Teʼ kʼiinoʼobaʼ kex 40 máakoʼob ku muchʼkubaʼob cada semanaiʼ. Tsʼoʼoleʼ le ka beetaʼab le Kʼaʼajsajil úuchik u kíimil Cristooʼ 91 máakoʼob binoʼobiʼ. ¡Don yaʼabchajoʼob!

 Kéen u kʼaʼajs Marta bix káajik tuláakal le baʼax úuchoʼ ku yaʼalik: «Kin tsʼáaik gracias tiʼ Jéeoba tumen jach ku yáantken. Yaan horaeʼ kin wuʼuyik yaan baʼaxoʼob maʼ tu páajtal in beetik, pero Jéeobaeʼ ku usarkoʼon utiaʼal k-kaʼansik le máakoʼoboʼ. Letiʼeʼ u yojel baʼax yaan kaʼach tu puksiʼikʼal le máakoʼoboʼ le oʼolal tu yáantoʼob utiaʼal ka náatsʼkoʼob tu yiknal. Chíikaʼan u yilaʼal jach yaabiltaʼanoʼob tumen Jéeoba».