«Junpuliʼ maʼ a sen chiʼichnaktaleʼex yoʼolal u kʼiinil sáamal, tumen sáamaleʼ yaan xan u yantal baʼaloʼob jeʼel u beetik a chiʼichnaktaleʼexeʼ. Cada kʼiineʼ yaan yéetel le bukaʼaj chiʼichnakiloʼob ku taaskoʼ» (Mateo 6:34, Túumben Luʼum).

 «Maʼ a sen tukultikeʼex túun u kʼiinil sáamal, tumen u kʼiinil sáamaleʼ yaan u kʼuchul yéetel u sen tuukuliloʼob. Tuláakal kʼiineʼ ku kʼuchul yéetel u yaayam óolaloʼob» (Mateo 6:34, Nuevo Testamento de Nuestro Señor Jesucristo ich Maya; túumbenkuntaʼan u tsʼíibil).

 Le ka tu yaʼalaj Jesús le tʼaanoʼobaʼ tu yóotaj u yaʼaleʼ maʼ unaj u sen chiʼichnaktal máak yoʼolal le problemas ku yantal tuláakʼ kʼiinoʼ. Tu lugar leloʼ maas maʼalob ka u yil u aktáantik máak le problemas ku yantaltiʼ cada kʼiinoʼ.

 Jesúseʼ maʼ tu yóotaj u yaʼal wa jach junpuliʼ maʼ unaj k-tuklik baʼax ken k-beet tu kʼiinil sáamaliʼ (Proverbios 21:5). Letiʼeʼ tu yóotaj u yaʼaleʼ maʼ unaj u píitmáan k-chiʼichnaktal yoʼolal baʼax jeʼel u yúuchleʼ. Wa k-sen chiʼichnaktaleʼ yaan u pʼáatal maʼ kiʼimak k-óoliʼ, tsʼoʼoleʼ maʼ ken k-tsʼáa k-óol tiʼ le baʼaxoʼob k-beetkoʼ. U jaajileʼ chéen kunel u sen tuklik máak le problemas jeʼel u yantaltiʼ tuláakʼ kʼiinoʼ tumen maʼ ken u yutskíintoʼob chéen ikil u sen tuklikoʼob. Yaan hora xaneʼ le baʼaxoʼob ku tuklik máak jeʼel u yúuchleʼ maʼ tu yúuchul, yéetel wa ku yúuchleʼ maʼ jach difícil u aktáantaʼaliʼ.

 Le tʼaanoʼobaʼ táakaʼan ichil le baʼax tu tsikbaltaj Jesús teʼ montañaoʼ yéetel tiʼ tsʼíibtaʼan teʼ capítulo 5 tak 7 tiʼ Mateooʼ. Ichil le tsikbal tu beetaj Jesúsoʼ tu tsoleʼ kex ka sen chiʼichnakchajkoʼoneʼ mix tu maas kiʼimaktal k-óol yéetel maʼ xan t-maas chowakkíintik k-kuxtal (Mateo 6:27). Tu yaʼalaj xaneʼ wa k-tsʼáaik Dios táanil ichil k-kuxtaleʼ maʼ unaj k-chiʼichnaktaliʼ. Wa Dios ku kanáantik le baʼalcheʼob yéetel xíiwoʼoboʼ, ¿máasaʼ maas jeʼel u kanáantik le máaxoʼob adorarkoʼ? (Mateo 6:25, 26, 28-33).