TEKSTOʼOB KU MAAS TSOʼOLOL

Mateo 6:33 | «Yáax táanileʼ kaxteʼex u [Reino] Jajal Dios»

PAX ICH

«Maʼ u xuʼulul a kaxtikeʼex táanil u Reino Dios yéetel u justicia, beyoʼ tuláakal le uláakʼ baʼaloʼobaʼ yaan xan u tsʼaʼabalteʼex» (Mateo 6:33, Túumben Luʼum).

«Yáax táanileʼ kaxteʼex u [Reino] Jajal Dios yéetel u [justicia], tuláakal le baʼaloʼobaʼ bíin tsʼaʼabakteʼex xan» (Mateo 6:33, Le tumben Nuptʼan (1970).

Baʼax u kʼáat u yaʼal Mateo 6:33

U Reino Dioseʼ junpʼéel gobierno yaan teʼ kaʼanoʼ, le gobiernoaʼ yaan u béeykuntik baʼax u tukultmaj Dios utiaʼal le Luʼumaʼ (Mateo 6:9, 10). ¿Bix u yeʼesik máak ku kaxtik táanil le Reinooʼ? Letiʼe kéen u tsʼáa táanil ichil u kuxtaloʼ. a Ku yeʼesik xan kéen u kan máak u maasil yoʼolal le Reinooʼ yéetel kéen u tsikbalt tiʼ uláakʼ máakoʼob le jatsʼuts baʼaloʼob ken u béeykuntoʼ (Lucas 11:2).

Ichil u justicia Dioseʼ táakaʼan le leyoʼob u tsʼaamajtoʼon utiaʼal k-ojéeltik baʼax uts yéetel baʼax kʼaasoʼ (Salmo 119:172). Le máax ku kaxtik u justicia Diosoʼ ku kuxtal jeʼex u yaʼalik letiʼoʼ, le oʼolal mantatsʼ ku bin utsil tiʼ (Isaías 48:17).

Le tʼaan tuláakal le uláakʼ baʼaloʼob yaan xan u tsʼaʼabalteʼexoʼ u kʼáat u yaʼaleʼ Dioseʼ ku prometertik u tsʼáaik tuláakal le baʼaxoʼob kʼaʼabéet tiʼ le máaxoʼob ku tsʼáaikoʼob le Reino táanil ichil u kuxtaloʼoboʼ (Mateo 6:31, 32).

U contekstoil Mateo 6:33

Le tʼaanoʼob ku chíikpajal tiʼ Mateo 6:33, aʼalaʼab tumen Jesús le ka tu máansaj le discurso kʼaj óolaʼan bey Sermón del Monteeʼ. Lelaʼ jeʼel u páajtal k-xokik tu Evangelioil Mateo capítulo 5 tak 7. U maas yaʼabil tiʼ le máaxoʼob uʼuy Jesús teʼ kʼiin jeʼeloʼ óotsiloʼob, utiaʼal letiʼobeʼ le baʼax maas importanteoʼ letiʼe u yantal baʼax u jaantoʼob yéetel u familiaʼoboʼ, le oʼolal maʼ fácil u tsʼáaikoʼob táanil le Reino ichil u kuxtaloʼoboʼ. Le beetik Jesúseʼ tu yaʼalajtiʼobeʼ wa ku kaxtikoʼob táanil le Reinooʼ yaan u kanáantaʼaloʼob tumen Dios jeʼex u kanáantik le baʼalcheʼoboʼ yéetel le looloʼoboʼ (Mateo 6:25-30).

Baʼaloʼob maʼ jaajtak ku creertaʼal yoʼolal Mateo 6:33

Baʼax ku creertaʼal: Le máaxoʼob ku kaxtikoʼob táanil le Reinooʼ ku ayikʼaltaloʼob.

U jaajil: Jesúseʼ tu yaʼaleʼ le máaxoʼob ken u tsʼáaʼob le Reino táanil ichil u kuxtaloʼoboʼ maʼ ken u beet falta tiʼob janal mix u nookʼoʼob (Mateo 6:25, 31, 32). Pero mix juntéen tu yaʼalaj wa Dioseʼ yaan u beetik u ayikʼaltaloʼob wa yaan u bendecirkoʼob yéetel baʼaloʼob de lujo. Baʼaxeʼ Jesúseʼ hasta tu yaʼalajtiʼobeʼ wa ku muchʼkíintikoʼob ayikʼaliloʼobeʼ jeʼel u beetik u maas difíciltaltiʼob u tsʼáaikoʼob táanil le Reino ichil u kuxtaloʼoboʼ (Mateo 6:19, 20, 24). Apóstol Pabloeʼ tu tsʼáaj táanil le Reino ichil u kuxtaloʼ. Maʼ ayikʼalchajiʼ pero anchajtiʼ le baʼax kʼaʼabéet utiaʼal u kuxtaloʼ. Jeʼex tu yaʼalil Jesúseʼ, Pablo xaneʼ tu yaʼaleʼ, jeʼel u bin kʼaasil tiʼ máak wa ku bin chéen tu paach taakʼineʼ (Filipenses 4:11, 12; 1 Timoteo 6:6-10).

Baʼax ku creertaʼal: Le máaxoʼob meyajtik Diosoʼ maʼ kʼaʼabéet u kíimskubaʼob meyaj utiaʼal u yantal le baʼaxoʼob kʼaʼabéettiʼoboʼ.

U jaajil: Le Bibliaoʼ ku yaʼalikeʼ le máaxoʼob meyajtik Diosoʼ unaj u meyajoʼob utiaʼal u tsʼáaikoʼob baʼax kʼaʼabéet tiʼ u familiaʼob (1 Tesalonicenses 4:11, 12; 2 Tesalonicenses 3:10; 1 Timoteo 5:8). Jesúseʼ maʼ tu yaʼalaj wa u discípuloʼobeʼ chéen u Reino Dios ken u kaxtoʼob. Baʼaxeʼ tu yaʼaleʼ letiʼe baʼax unaj u tsʼáaikoʼob táanil ichil u kuxtaloʼoboʼ.

Le máaxoʼob ku meyajoʼob pero ku tsʼáaikoʼob táanil le Reino ichil u kuxtaloʼoboʼ u yojloʼob yaan u yáantaʼaloʼob tumen Dios utiaʼal u yantaltiʼob le baʼaxoʼob kʼaʼabéettiʼoboʼ (1 Timoteo 6:17-19).

a Le tʼaan «maʼ u xuʼulul a kaxtikeʼexoʼ» ku taal tiʼ junpʼéel tʼaan ich griego ku tsʼáaik naʼatbil maʼ unaj u xuʼulul u beetaʼal junpʼéel baʼaliʼ. Leloʼ u kʼáat u yaʼaleʼ mantatsʼ unaj k-tsʼáaik táanil le Reino ichil k-kuxtaloʼ, maʼ chéen kéen kʼaʼajak tiʼ máakiʼ.