«Maʼ u xuʼulul k-beetik baʼax maʼalob, tumen wa maʼ t-kaʼanleʼ yaan k-jooch jach tu kʼiinil (Gálatas 6:9, Túumben Luʼum).

 «Bey túunoʼ, maʼ unaj k-kaʼanal k-beet utsiʼ, tumen wa maʼ tu lúubul k-óoleʼ tu kʼiinil bíin joochnakoʼon» (Gálatas 6:9, Quiliʼich Biblia ich Maya).

 Teʼ tekstoaʼ le apóstol Pablooʼ táan u líiʼsik u yóol le cristianoʼob utiaʼal maʼ u xuʼulul u beetkoʼob baʼax maʼalob tu táan Diosoʼ. Tumen wa ku beetkoʼobeʼ yaan u kʼamkoʼob yaʼab bendiciónoʼob.

 «Maʼ u xuʼulul». Le tʼaanoʼobaʼ jeʼel xan u béeytal u traducirtaʼal bey «maʼ unaj k-kaʼanal». Teʼ idioma originaloʼ ku tsʼáaik naʼatbil xan maʼ u lúubul u yóol wa maʼ u xuʼulul u kiʼimaktal u yóol maak u beet wa baʼax. Úuchik u yaʼalik apóstol Pablo le tʼaanoʼobaʼ tu reconocerteʼ yaan kʼiineʼ tak letiʼ lúub xan u yóol (Romanos 7:21-24).

 «Baʼax maʼalob» wa baʼax utseʼ, letiʼ tuláakal le baʼaxoʼob unaj u beetik juntúul máax meyajtik Diosoʼ. Jeʼex u yeʼesik u yutsil tiʼ le sukuʼunoʼoboʼ bey xan tiʼ le máaxoʼob maʼatech u meyajtikoʼob Diosoʼ (Gálatas 6:10).

 «Yaan k-jooch jach tu kʼiinil». Pabloeʼ tu kʼaʼajsaj tiʼ le sukuʼunoʼoboʼ ku bisik tiempo u yilik máak u yutsil u beetik baʼax maʼalob. Jeʼex juntúul kolnáaleʼ ku bisik tiempo u yilik u yich u paakʼal. Úuchik u tʼaan apóstol Pablo tiʼ joocheʼ tu kʼaʼajsaj le baʼax u yaʼalmaj teʼ versículo 7, «jeʼel baʼaxak ka u pakʼ máakeʼ le xan ken u joche». Lelaʼ u kʼáat u yaʼaleʼ wa ku tsʼáaik u yóol máak u beet baʼax maʼalob tu táan Dioseʼ yaan u kʼamik yaʼab bendiciónoʼob, ichileʼ táakaʼan le kuxtal minaʼan u xuuloʼ (Romanos 2:6, 7; Gálatas 6:8).

 Le cartaaʼ Pablo tsʼíibt tiʼ le múuchʼuliloʼob yanoʼob Galacia kex tu añoiloʼob 50 tak 52. Tu túuxtaj tiʼ le sukuʼunoʼoboʼ tumen jujuntúul máaxoʼob ku yaʼalikubaʼob cristianoʼobeʼ táan kaʼach u jelbesikoʼob le kaʼansaj tu yoʼolal Jesúsoʼ (Gálatas 1:6, 7). Le máakoʼobaʼ táan kaʼach u yaʼalikoʼobeʼ kʼaʼabéet u seguer u tsʼoʼokbesaʼal u Ley Moisés (Gálatas 2:15, 16). Pero Pabloeʼ tu tsolajtiʼobeʼ le Leyoʼ xuʼul u meyaj, yéetel le máaxoʼob meyajtik Diosoʼ maʼ kʼaʼabéet u tsʼoʼokbeskoʼobiʼ (Romanos 10:4; Gálatas 3:23-25).

 Le ka tu yaʼalaj Pablo tiʼ le cristianoʼob ‹maʼ u xuʼulul u beetkoʼob baʼax maʼaloboʼ› maʼ táan u yaʼaliktiʼob ka seguernak u beetkoʼob baʼax ku yaʼalik u Ley Moisésiʼ, baʼaxeʼ ka u tsʼoʼokbesoʼob «u ley Cristo». U kʼáat u yaʼaleʼ ka u beetoʼob tuláakal le baʼax tu kaʼansaj Jesús yaan yil yéetel u yeʼesaʼal yaabilaj tiʼ u maasiloʼ (Gálatas 6:2; Mateo 7:12; Juan 13:34).

 Utiaʼal a wilik tiʼ uláakʼ baʼaxoʼob ku tʼaan u libroil Gálataseʼ chaʼant le videoaʼ.