¿Bix jeʼel in chʼaʼik maʼalob decisiónoʼobeʼ?
Baʼax ku yaʼalik le Bibliaoʼ
Le Bibliaoʼ ku yáantkoʼon utiaʼal ka yanaktoʼon naʼat yéetel ku yáantkoʼon k-tukult tubeel baʼax ken k-beete. Wa k-chaʼik u nuʼuktikoʼoneʼ yaan k-chʼaʼik maʼalob decisiónoʼob (Proverbios 4:5). Yaan kʼiineʼ le Bibliaoʼ juntaatsʼ u yaʼalik baʼax unaj k-beetik, pero yaan kʼiineʼ chéen ku tsʼáaiktoʼon consejoʼob utiaʼal k-chʼaʼik junpʼéel maʼalob decisión.
Teʼ xookaʼ yaan k-ilik le baʼaloʼobaʼ:
Consejoʼob jeʼel u yáantkech a chʼaʼ junpʼéel maʼalob decisióneʼ
Tukult tubeel baʼax ken a beete. Le Bibliaoʼ ku yaʼalik: «Le máax yaan u naʼatoʼ ku jach ilik tuʼux ku tsʼáaik u yook» (Proverbios 14:15). Wa séebaʼan a jáan chʼaʼik junpʼéel decisióneʼ yaan baʼaloʼob jach importanteʼob maʼ ken a chʼaʼ en cuenta. Le oʼolaleʼ jóoʼs tiempo utiaʼal a tuklik tubeel baʼax ken a beete (1 Tesalonicenses 5:21).
Maʼ a jáajan beetik wa baʼax wa maʼ maʼalob a wuʼuyikabaiʼ. Le Bibliaoʼ ku yaʼalikeʼ le puksiʼikʼaloʼ séebaʼan jeʼel u tusik máakeʼ (Proverbios 28:26; Jeremías 17:9). Le oʼolal maʼ maʼalob ka a chʼaʼ junpʼéel decisión wa kʼuuxech, wa lubaʼan a wóol, wa jach kaʼanaʼanech bey xan wa yaʼab baʼaloʼob ka beetik (Proverbios 24:10; 29:22).
Kʼáat tiʼ Dios ka u tsʼáatech naʼat (Santiago 1:5). Dioseʼ uts tu tʼaan u tsʼáaik naʼat tiʼ le máaxoʼob kʼáatiktiʼoʼ. Jeʼex juntúul taatatsil u yaabiltmaj u paalaleʼ letiʼ xaneʼ maʼ u kʼáat ka xiʼiktoʼon kʼaasiliʼ. Le Bibliaoʼ ku yaʼalikeʼ «Jéeoba tsʼáaik le naʼatoʼ, tiʼ le baʼaxoʼob ku jóokʼol tu chiʼoʼ ku kaanbal máak yéetel ku yojéeltik baʼax unaj u beetik» (Proverbios 2:6). a Dioseʼ u kʼáat ka yanaktoʼon naʼat le oʼolal u tsʼaamaj maʼalob consejoʼob teʼ Bibliaoʼ (2 Timoteo 3:16, 17).
Ilawil wa maʼalob baʼax ken a beete. Le Bibliaoʼ ku yaʼalikeʼ «le máax yaan u naʼatoʼ ku yuʼubik baʼax ku yaʼalaʼaltiʼ yéetel ku maas kaanbal» (Proverbios 1:5). Le oʼolaleʼ antes a chʼaʼik junpʼéel decisióneʼ kʼaʼabéet a investigar. ¿Baʼax jeʼel u yáantkech a wil wa maʼalob baʼax taak a beetkeʼ?
Yáaxeʼ ilawil baʼax ku yaʼalik le Biblia yoʼolal baʼax taak a beetkoʼ. Como Dios beetmiloʼoneʼ u yojel baʼax jeʼel u yáantkoʼon utiaʼal ka xiʼiktoʼon maʼalobileʼ. Le oʼolal u tsʼaamajtoʼon le Biblia utiaʼal u yáantkoʼonoʼ (Salmo 25:12). Teʼeloʼ yaan leyoʼob ku yaʼalikoʼob tiʼ máak jach baʼax unaj u beetik (Isaías 48:17, 18). Chéen baʼaleʼ yaan kʼiineʼ ku tsʼáaiktoʼon consejoʼob wa principioʼob jeʼel u yáantkoʼon k-naʼat baʼax u kʼáat Dios ka k-beeteʼ. Como maʼ juntaatsʼ u yaʼalikoʼob baʼax unaj u beetaʼaleʼ, yaan baʼaloʼobeʼ ku chaʼabal tiʼ máak ka u chʼaʼtukle. Utiaʼal a wilik le tekstoʼob jeʼel u meyajtechoʼ jeʼel u páajtal a kaxtik le publicaciónoʼob yaan teʼ sitio jw.org. Le baʼaxoʼob yaan teʼ sitiooʼ gratis. b
Yaan kʼiin xaneʼ yaan u kʼaʼabéettal a investigar yaanal tuʼux. Jeʼex wa taak a manik junpʼéel baʼal jach koʼojeʼ maʼalob ka a wil baʼax ku yaʼalaʼal tu yoʼolal, bix le garantía ku tsʼaʼabaloʼ yéetel baʼax jeʼel u páajtal a beetik utiaʼal a sutik wa ku kʼaʼabéettaleʼ. Tsʼoʼoleʼ jach ilawil tubeel wa letiʼe baʼax táan a kaxtikoʼ.
Le Bibliaoʼ ku yaʼalikeʼ «le baʼaloʼob chéen tu juunal máak ku chʼaʼtuklikoʼ maʼatech u jóokʼol maʼalobil» (Proverbios 15:22). Antes a chʼaʼik junpʼéel decisióneʼ maʼalob ka a tsikbalt tiʼ juntúul máax de confianza. Por ejemploeʼ wa yaan u yil yéetel junpʼéel kʼojaʼanileʼ tsikbalnen yéetel juntúul doctor (Mateo 9:12). Yaan kʼiin xaneʼ maʼalob ka tsikbalnakech yéetel juntúul máax bey uchaʼaniktiʼoʼ. Chéen baʼaleʼ maʼ u tuʼubultecheʼ teech ken a chʼaʼtukult baʼax ken a beete yéetel teech ken a wil bix kun bintech (Gálatas 6:4, 5).
Chʼaʼ en cuenta tuláakal baʼax jeʼel u yúuchleʼ. Kéen tsʼoʼokok a investigareʼ beet junpʼéel lista tiʼ le utsiloʼob jeʼel u taasiktechoʼ bey xan tiʼ le maʼatechoʼ. Tsʼoʼoleʼ tukult bix jeʼel u bintech yoʼolal le baʼax ta chʼaʼtukloʼ (Deuteronomio 32:29). Por ejemploeʼ tukult bix ken u afectartilech, bix ken u afectartil a familia bey xan uláakʼ máakoʼob (Proverbios 22:3; Romanos 14:19). Wa ka chʼaʼik en cuenta le baʼaloʼobaʼ bey xan le consejoʼob wa le principioʼob yaan teʼ Bibliaoʼ le baʼax ken a chʼaʼtukloʼ yaan u taasik utsil tak tiʼ u maasil.
Beet baʼax tsʼoʼok a chʼaʼtuklik. Yaan horaeʼ maʼ t-chʼaʼtuklik k-beetik wa baʼax tumen maʼ seguroʼon tiʼ bix kun bintoʼoniʼ. Wa ku yúuchul tiʼ máak beyoʼ maʼ táan u tsʼáaik u oportunidadil u yilik bix kun bintiʼiʼ. Chéen baʼaleʼ wa maʼ tu beetik máak baʼax tsʼoʼok u chʼaʼtuklikeʼ láayliʼ maʼ maʼalobeʼ tumen bey jeʼex ka u chʼaʼtukult u beet baʼax maʼ maʼalobeʼ. Le Bibliaoʼ bey u comparartikaʼ: «Le máax táan u jach ilik tuʼux banda ku taal le iikʼoʼ maʼ kun paakʼal, le máax táan u jach ilik le múuyaloʼoboʼ maʼ kun cosechar» (Eclesiastés 11:4).
Maʼ u tuʼubultecheʼ yaan horaeʼ le baʼax ta chʼaʼtukloʼ maʼ kun jóokʼol jach jeʼex a tukultmiloʼ. Yaan kʼiineʼ yaan baʼaxoʼob kun kʼaʼabéettal a kʼexik wa yaan baʼax jeʼel u jáan úuchleʼ (Eclesiastés 9:11). Le oʼolaleʼ investigart tuláakal le ku páajtaleʼ yéetel chʼaʼtukult a beetik le baʼax maas jeʼel u taasiktech utsiloʼ.
Wa tsʼoʼok in chʼaʼik junpʼéel decisióneʼ, ¿jeʼel wa u páajtal in kʼexikeʼ?
Yaan decisiónoʼobeʼ jeʼel u páajtal u kʼeʼexloʼobeʼ, maʼ xaaneʼ tumen kʼexpaj bix u kuxtal máak wa maʼ jóokʼ jeʼex a tuklik kaʼachoʼ. Wa bey úuchiktechoʼ tukult tubeel baʼax uláakʼ jeʼel u páajtal a beetkeʼ.
Chéen baʼaleʼ yaan jujunpʼéel baʼaloʼobeʼ deporsi maʼ tu páajtal u kʼeʼexloʼob (Salmo 15:4). Por ejemploeʼ Dioseʼ ku yaʼalikeʼ le máaxoʼob tsʼokaʼan u beeloʼoboʼ unaj u tsʼoʼokbeskoʼob le baʼax tu prometertoʼoboʼ (Malaquías 2:16; Mateo 19:6). c Tu lugar u jáan tuklik u pʼatkuba le máaxoʼob tsʼokaʼan u beeloʼoboʼ unaj u yilik u yutskíintikoʼob le problema yaan ichiloʼoboʼ.
¿Baʼax unaj in beetik wa maʼ tin chʼaʼaj junpʼéel maʼalob decisióniʼ?
Jeʼel baʼaxak kʼiineʼ yaan u chʼaʼik máak junpʼéel decisión maʼ jach maʼalobiʼ (Santiago 3:2, nota). Kéen úuchuk beyoʼ yaan u yaatal u yóol máak (Salmo 69:5). Maʼ kʼaas ka yaachajak u yóol máakiʼ, chéen baʼaleʼ unaj u kanáantik maʼ u kaʼa lúubul tiʼ le decisión maʼ maʼalob tu chʼaʼajoʼ (Proverbios 14:9). Le Bibliaoʼ ku yaʼalikeʼ maʼ maʼalob ka u sen tukult máak le baʼax úuchoʼ tumen jeʼel u lúubul u yóoleʼ wa jeʼel tak u kʼojaʼantaleʼ (2 Corintios 2:7). d Kʼaʼajaktecheʼ Jéeobaeʼ ku chʼaʼik óotsilil yéetel jach ku yeʼesik u yutsil (Salmo 103:8-13). Wa ta chʼaʼtuklaj junpʼéel baʼax maʼ jóokʼ maʼalobileʼ kaanbalnen tiʼ le baʼax úuchoʼ yéetel ilawil wa yaan baʼax jeʼel u páajtal a beetik utiaʼal a wuʼuyikaba maʼalobileʼ.
a Le Bibliaoʼ ku yaʼalikeʼ u kʼaabaʼ Dioseʼ Jéeoba (Salmo 83:18).
b Teʼ sitio jw.org yaan a wilik yaʼab consejoʼob jach jeʼel u yáantkecheʼ. Teʼ buscadoroʼ jeʼel u páajtal a tsʼíibtik le tʼaan a kʼáat a kaxtoʼ. Teʼ jaats «Tʼaanoʼob yaan teʼ Bibliaoʼ» jeʼel u páajtal xan a kaxtik le tʼaanoʼob a kʼáat a wojéelt u maasil tu yoʼolaloʼ. Le jaatsaʼ tiaʼan teʼ Biblia U Tʼaan Dios utiaʼal u Kajnáaliloʼob le Túumben Luʼumoʼ.
c Dioseʼ maʼ u kʼáat ka u pʼatuba le máaxoʼob tsʼokaʼan u beeloʼoboʼ. Chéen jeʼel u páajtal u pʼatkubaʼob wa u kaʼa tsʼoʼokol u beeloʼob wa juntúul tiʼ letiʼob tu tusaj u núup yéetel yaanal máakeʼ (Mateo 19:9). Wa yaantech problemas yéetel a núupeʼ, le consejoʼob yaan teʼ Bibliaoʼ jach jeʼel u yáantkech a wutskíinteʼ.
d Wa taak a wojéeltik u maasileʼ ilawil le xook «Bix jeʼel u yáantken le Biblia utiaʼal maʼ u jach yaatal in wóoloʼ».