Le atantsiloʼ tu yojéeltaj yaan junpʼéel baʼax maʼ maʼalob ku beetik u yíichamiʼ. Le íichamtsiloʼ tu kʼáataj perdón tiʼ u yatan yéetel tu yaʼalaj maʼ ken u kaʼa beete. Chéen baʼaleʼ maʼ xáanchaj tiʼ leloʼ lúub tu kaʼatéen tiʼ le viciooʼ.

 ¿Táan wa a aktáantik junpʼéel baʼal beyaʼ? Wa beyoʼ maʼalob ka a chʼaʼ en cuenta bix u afectartik a núup le pornografíaoʼ yéetel maʼalob ka a wil bix jeʼel a xúumpʼattik le vicioaʼ. a

Teʼ xookaʼ yaan a kanik:

•  ¿Baʼax unaj a chʼaʼik en cuentail?

•  ¿Baʼax jeʼel u páajtal a beetkeʼ?

•  Wa ku chaʼantik pornografía a wíicham

 Le pornografíaoʼ jeʼel u beetik u pʼatkuba le máaxoʼob tsʼokaʼan u beeloʼoboʼ yéetel jeʼel u beetik u yantal baʼatelil ichiloʼobeʼ. Tsʼoʼoleʼ le íichamtsil wa atantsil ku chaʼantik pornografíaoʼ jeʼel u xuʼulul u confiar u núup tiʼeʼ. b

 Wa juntúul íichamtsil ku chaʼantik pornografíaeʼ maʼ xaaneʼ u yataneʼ jeʼel u yuʼubikuba beyaʼ:

•   Ku yuʼubik bey traicionartaʼabeʼ. Juntúul atantsil ku kʼaabaʼtik Saraeʼ ku yaʼalik: «Tin wuʼuyaj bey tu tusen in wíicham yaʼab u téenel yéetel yaanaleʼ».

•   Ku yuʼubik bey mix baʼal u biilaleʼ. U yatan juntúul máak ku chaʼantik pornografíaeʼ ku yaʼalikeʼ ‹maʼ kiʼichpan u yuʼubikubaiʼ yéetel bey mix baʼal u biilaleʼ›.

•   Ku desconfiar. Juntúul atantsil ku kʼaabaʼtik Heleneʼ ku yaʼalik: «Mantatsʼ táan in tuklik yaan baʼax maʼ maʼalob ku beetik in wíichamiʼ».

•   Ku tsaʼayal ansiedad tiʼ. Juntúul atantsil ku kʼaabaʼtik Catherineeʼ ku yaʼalik: «Jach kʼojaʼanchajen ikil in sen tuukul tiʼ le vicio yaan tiʼ in wíichamoʼ».

 Tuukulnen tiʼ lelaʼ: Le Bibliaoʼ ku yaʼalikeʼ juntúul íichamtsileʼ unaj u yaabiltik u yatan (Efesios 5:25). Wa táan a beetik u yuʼubikuba a watan jeʼex tsʼoʼok u tsoʼolol teʼ kaʼanaloʼ, ¿táan wa a weʼesik a yaabiltmaj?

 Maʼ chéen chʼaʼabil u pʼatik máak le pornografíaoʼ. Juntúul atantsil ku kʼaabaʼtik Staceyeʼ ku yaʼalik: «In wíichameʼ tsʼoʼok u pʼatik u tsʼuʼutsʼik chamal, marihuana bey xan u káaltal. Pero le baʼax maas istikyaj u pʼatkoʼ letiʼe u chaʼantik pornografíaoʼ».

 Wa istikyaj xan a wilik a pʼatik le pornografíaoʼ le baʼax kun tsolbil teʼ kabalaʼ jach jeʼel u yáantkech a pʼat le viciooʼ.

•   Tukult baʼaxten kʼaas le pornografíaoʼ. Le pornografíaoʼ ku beetik u tuukul máak chéen tu yoʼolal, ku beetik u xuʼulul u yeʼesik yaabilaj máak yéetel ku beetik u xuʼulul u confiar u maasil tiʼ, leloʼ jach maʼ tu yáantaj ichil junpʼéel familia. Le máax chaʼantik pornografíaoʼ jach séeb jeʼel u tusik u núupeʼ, tsʼoʼoleʼ maʼ táan u respetartik Jéeoba le máax tsʼaamil le tsʼoʼokol beeloʼ.

   Le Bibliaoʼ ku yaʼalik: «Tuláakal máakeʼ unaj u respetartik le tsʼoʼokol beeloʼ» (Hebreos 13:4).

•   Maʼ a culpartik a núup. Maʼ a waʼalik: «Wa ka u maas eʼesten u yaabiltmen in wataneʼ bejlaʼa maʼ tin chaʼantik pornografíaeʼ». Maʼ a culpartik a watan ikil a chaʼantik pornografía tumen leloʼ maʼ ken u yáantech, baʼaxeʼ le kéen baʼatelnakeʼexeʼ yaan a kaʼa lúubul tiʼ le viciooʼ.

   Le Bibliaoʼ ku yaʼalik: «Cada juntúuleʼ ku probartaʼal kéen jíiltaʼak yéetel kéen táabsaʼak tumen u tsʼíibolal» (Santiago 1:14).

•   Aʼal u jaajil tiʼ a núup. Juntúul íichamtsil ku kʼaabaʼtik Kevineʼ ku yaʼalik: «Sáamsamal kin tsikbal yéetel in watan, kin waʼaliktiʼ wa tin tsʼáaj in wóol utiaʼal maʼ in chaʼantik junpʼéel baʼal jeʼel u beetik u yantalten kʼaakʼas tsʼíibolaleʼ. In beetik beyoʼ jach ku yáantken tumen in wataneʼ maʼ tu tuklik wa yaan baʼax táan in taʼakik tiʼ».

   Le Bibliaoʼ ku yaʼalik: «K-kʼáat k-beet tuláakal baʼal tu nuʼuk» (Hebreos 13:18).

•   Maʼ u náayal a wóol. Kex tsʼoʼok u máan yaʼab años a pʼat le pornografíaoʼ jeʼel u tocar a kaʼa chaʼantikeʼ. Kevin, le máax tsʼoʼok k-yáax chʼaʼchiʼitikoʼ ku yaʼalik: «Máan diez años xuʼuluk in chaʼantik pornografía, le oʼolal tin tuklaj kaʼach tsʼoʼok in xúumpʼattikeʼ, chéen baʼaleʼ jeʼel bakáanaʼ le vicioaʼ bey juntúul tsʼíitsʼik baʼalcheʼ táan u páaʼtik u kaʼa pulkuba tin wóokʼoleʼ».

   Le Bibliaoʼ ku yaʼalik: «Le máax ku tuklik waʼalakbal maʼalobeʼ u kanáant maʼ u lúubul» (1 Corintios 10:12).

•   Maʼ a lúubul tiʼ baʼax kʼaas. Yaan horaeʼ maʼ ta tsʼáaik cuenta bix u jáan taal kʼaakʼas tsʼíibolaloʼob ta tuukul, pero jeʼel u páajtal a decidirtik wa yaan a lúubul tiʼ le kʼaakʼas tsʼíibolaloʼoboʼ wa maʼ. Kéen yanaktech le kʼaakʼas tsʼíibolaloʼoboʼ ilawil a tuukul tiʼ yaanal baʼal, beyoʼ séeb kun tuʼubultech.

   Le Bibliaoʼ ku yaʼalik: «Cada juntúul tiʼ teʼexeʼ unaj u kanik u controlart u wíinklil, bey túunoʼ yaan u pʼáatal santoil yéetel yaan u lúubul utsil tiʼ Dios. Teʼexeʼ maʼ unaj u píitmáan a tsʼíiboltkeʼex a sen núupchitaleʼex» (1 Tesalonicenses 4:4, 5).

•   Náachkuntaba tiʼ le tentaciónoʼ. Junpʼéel libroeʼ ku yaʼalik: «Wa ka wantal naatsʼ tiʼ le tentaciónoʼ bey tsʼoʼok a chepik junpʼéel fósforoeʼ chéen kʼaʼabéettech junpʼíit gasolina utiaʼal u chʼaʼik kʼáakʼ» (Willpowerʼs Not Enough).

   Le Bibliaoʼ ku yaʼalik: «Maʼ a chaʼik in beetik mix baʼal kʼaas» (Salmo 119:133).

•   Jeʼel a béeytaleʼ. Kex ka máanak yaʼab añoseʼ jeʼel a beetik u kaʼa confiar a watan tiʼ techeʼ, tumen yaʼab máaxoʼob tsʼokaʼan u beeloʼobeʼ tsʼoʼok u logrartikoʼob.

   Le Bibliaoʼ ku yaʼalik: «Le máax yaan u yaabilajeʼ yaan u paciencia» (1 Corintios 13:4).